اتىراۋداعى ۇيلەنۋ تويىندا كوكپار تارتىلىپ، بالۋاندار بەلدەستى
تەمىربەك پەن قىمباتتىڭ شاڭىراق كوتەرۋ تويىندا مەكتەپ وقۋشىلارى اراسىندا قازاق كۇرەسى، ەرەسەكتەر اراسىندا تۇيە بالۋاندار بەلدەسۋى، تاي جارىسى مەن كوكپار تارتىسى سياقتى ۇلتتىق ويىن تۇرلەرى ۇيىمداستىرىلدى.
ۇيلەنۋ تويىنا جينالعان قاۋىم ەڭ ءبىرىنشى وقۋشىلار اراسىندا قازاق كۇرەسىن تاماشالادى. قاجىمۇقان اتالارىنىڭ جولىن قۋعان بالعىن بالۋانداردىڭ بەلدەسۋىندە اتانياز ءدالۋبايدىڭ باعى جانسا، ەكىنشى ورىندى اقجول جاردەمعالي، ءۇشىنشى ورىن نۇرحات جىلقىبايەۆقا بۇيىردى. ال، ەرەسەكتەر اراسىندا نۇربەك ەگىنبايەۆتىڭ جاۋىرىنى جەرگە تيمەي، «تۇيە بالۋان» اتاعىن يەلەندى.
بۇدان كەيىن جينالعان جۇرتشىلىقتىڭ نازارى تاي جارىسىنا اۋدى. ون ەكى تاي اراسىنداعى تارتىستى دودادا ازات ءراشيدتىڭ اتى بايگەدەن وزىپ كەلدى.
سونىمەن قاتار، اۋدان جاستارى دەن قويىپ جۇرگەن كوكپار ويىنى دا تارتىستى ءوتتى. ءۇش كوماندا قاتىسىپ، باقتارىن سىناعان دودادا «سۇڭقار» توبى جەڭىسكە جەتتى.
«دوستارىمىزبەن اقىلداسىپ، حالقىمىزدىڭ سالت- داستۇرلەرىن، ۇلتتىق سپورت تۇرلەرىن، سالاۋاتتى ءومىر سالتىن ناسيحاتتاۋ ءۇشىن وسىنداي شارانى ۇيىمداستىردىق. ۇلتتىق سپورت ويىندارى تەك قانا بەلگىلى ءبىر مەرەكەلەردە ەمەس، ءتۇرلى تويلاردا، اس بەرۋلەردە ۇيىمداستىرىپ تۇرساق جاس جەتكىنشەكتەردىڭ وعان دەگەن قىزىعۋشىلىعى ارتاتىنى ءسوزسىز»،- دەيدى ەرەكشە تويدى ۇيىمداستىرۋشى اسحات ەسەنقۇلوۆ.
اۆتورى: اباي اقمۇرزيەۆ