ماڭعىستاۋلىق ءوزىن سوققىعا جىققان ادامدى اتىپ كەتتى

اقتاۋ. قازاقپارات - ماڭعىستاۋ تۇرعىنى ءوزىن سوققىعا جىققان ازاماتتىڭ باسىنان وق اتقان، دەپ حابارلايدى قازاقپارات.

سوت ءىسى دەرەكتەرىنە قاراعاندا، ن ەسىمدى ازامات 2016-جىلى تۋىسىنىڭ ۇيلەنۋ تويىنا بارعان. ونى سىرتتا بۇزاقىلىق نيەتپەن بەلگىسىز تۇلعالار ۇرىپ-سوعىپ كەتەدى. كەلەسى كۇنى ول كەك قايتارۋ ماقساتىندا ن. ۇيىندە زاڭسىز ساقتاعان «وسا-لازەر» ماركالى اتىس قارۋىن الىپ، دوستارىن ەرتىپ، باسقۇدىق سەلوسىنا كەلەدى. سول ماڭدا ءوزىن ۇرعان ا- نى كەزدەستىرىپ، باسىنىڭ سول جاق بولىگىنە تاقاپ تۇرىپ ءبىر رەت وق اتىپ، وقيعا بولعان جەردەن بوي تاسالاعان.

وقيعا سالدارىنان ا. باسىنان العان اۋىر جاراقاتىمەن وقيعا ورنىندا ەس-ءتۇسسىز كۇيدە قالعان. دەر كەزىندە جەدەل-جاردەم قىزمەتى كەلىپ، ماڭعىستاۋ وبلىستىق اۋرۋحاناسىنا جەتكىزىلەدى. كەيىن قىلمىستىڭ بەتى اشىلىپ، قىلمىسكەر ۇستالادى.

«ماڭعىستاۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ق ر قىلمىستىق كودەكسىنىڭ 287-بابىنىڭ 2-بولىگىمەن، 24-بابىنىڭ 3-بولىگىمەن، 99-بابىنىڭ 2-بولىگىنىڭ 9 تارماعىمەن ن. -عا قاتىستى قىلمىستىق ءىس بويىنشا سوت ۇكىمى تاعايىندالدى. سوت ۇكىمىمەن ن. جوعارىدا اتالعان باپتارمەن كىنالى دەپ تانىلىپ، وعان تۇپكىلىكتى وتەۋگە 8 جىل 3 اي مەرزىمگە باس بوستاندىعىنان ايىرىلدى»، - دەدى ماڭعىستاۋ سوتىنىڭ باسپا ءسوز قىزمەتى.

ەندى ول جازاسىن قىلمىستىق- اتقارۋ جۇيەسىنىڭ قاۋىپسىزدىگى بارىنشا جوعارى مەكەمەسىندە وتەيدى. سونداي-اق، سوتتالعاننان جابىرلەنۋشى وكىلىنە رۋحاني زالال سوماسى 1 ميلليون تەڭگە جانە سوت ساراپتاماسىن جۇرگىزۋگە جۇمسالعان شىعىندار ءۇشىن 510390 تەڭگە سوت شىعىندارى ءوندىرىلدى.

سوت ۇكىمى زاڭدى كۇشىنە ەنگەن جوق.