وقۋشى كەزىندە مەكتەپتەن كىتاپحانا اشقان قىتاي قازاعى كوپكە ۇلگى بولدى - شەتەلدەگى قازاق ءتىلدى ب ا ق-قا شولۋ

استانا. قازاقپارات - «قازاقپارات» ح ا ا ادەتتەگىدەي وسى اپتادا شەتەلدەگى قازاق تىلىندە اقپارات تاراتاتىن ب ا ق كوزدەرىنە شولۋ ۇسىنادى.

يران ەۋرازيالىق وداققا قوسىلماقشى - TRT

مەدۆەدەۆ ەۋرازيالىق ەكونوميكالىق وداق پەن يران يسلام رەسپۋبليكاسى اراسىندا ەركىن ساۋدا ايماعىن قۇرۋدى كوزدەيتىن 4 جىلدىق كەلىسىمدى بەكىتتى. وسىلايشا، يران ەۋرازيالىق ەكونوميكا وداعىنا قوسىلماقشى. بۇل تۋرالى وسى اپتادا تۇركيا راديو تەلەديدار مەكەمەسىنىڭ رەسمي اقپاراتتىق پورتالى حابارلادى.

رەسەي ۇكىمەتىنىڭ ينتەرنەت بەتىندە جاريالانعان كەلىسىم جوباسى ە ا ە و ەلدەرى مەن يران اراسىندا بەلگىلى ونىمدەردى قامتيتىن ەركىن ساۋدا ايماعىنىڭ قۇرىلۋىنا مۇمكىندىك بەرەدى. رەسەي مەن يران ۇكىمەتتەر اراسىنداعى كوميسسياسىنىڭ تەڭ ءتوراعاسى رەسەي ەنەرگەتيكا ءمينيسترى الەكساندر نوۆاكتىڭ ايتۋىنشا، كەلىسىم ەكىجاقتى ساۋدانىڭ دامۋى مەن ينۆەستيتسيانىڭ ىنتىماقتاستىعىن ارتتىرادى.

«ەكى ەل اراسىندا ەركىن ساۋدا ايماعىن قۇرۋ جونىندەگى كەلىسسوزدەر ءۇش جىل بۇرىن باستالىپ ەدى. ەۋرازيالىق ەكونوميكالىق وداق رەسەي، قازاقستان، بەلارۋس، قىرعىزستان جانە ارمەنيادان تۇرادى» دەپ جازدى TRT.

ق ر پارلامەنتى ءماجىلىسىنىڭ ۆيتسە- سپيكەرى قىتايلىق ارىپتەستەرىمەن كەزدەستى - «جەنمين جيباو» (People Daily)

ق ح ر مەملەكەتتىك حالىق قۇرىلتايى تۇراقتى كوميتەتىنىڭ باستىعى لي جانشۋ مەن ق ك پ ورتالىق كوميتەتى ساياسي بيۋروسىنىڭ مۇشەسى، مەملەكەتتىك حالىق قۇرىلتايى تۇراقتى كوميتەتى باسشىسىنىڭ ورىنباسارى ۋاڭ چىن 22-23 -ءساۋىر كۇنى حالىق سارايىندا قازاقستان پارلامەنتى ءماجىلىسى ءتوراعاسىنىڭ ورىنباسارى گۇلميرا يسىمبايەۆامەن كەزدەستى. بۇل تۋرالى «جەنمين جيباو» حابارلاعان بولاتىن.

ق ح ر مەملەكەتتىك حالىق قۇرىلتايى تۇراقتى كوميتەتىنىڭ باستىعى لي جانشۋ جانە حالىق قۇرىلتايى تۇراقتى كوميتەتى باستىعىنىڭ ورىنباسارى ۋاڭ چىن بۇل كەزدەسۋدىڭ ماڭىزى تۋرالى وزدەرىنىڭ ورتاق ويلارىن ءبىلدىردى.

«ءتوراعا شي جينپيڭ مەن پرەزيدەنت ن. نازاربايەۆتىڭ ستراتەگيالىق جەتەكشىلىگى مەن شىنايى قامقورلىعىندا، قىتاي مەن قازاقستاننىڭ جان-جاقتى ستراتەگيالىق سەرىكتەستىك قاتىناسى تاعى ءبىر جاڭا دەڭگەيگە كوتەرىلدى. قىتاي حالىق قۇرىلتايى قازاقستان پارلامەنتىمەن بىرگە ىنتىماقتاستىعىن جوعارلاتىپ، ەكى ەلدىڭ دامۋ ستراتەگياسىنىڭ تۇتاسۋىن بىرلىكتە كۇشەيتىپ، ء«بىر بەلدەۋ ءبىر جول» قۇرىلىسىن بىرلىكتە قۇرۋعا جاقسى زاڭدىق ورتا جاساۋعا پەيىلدى» دەدى قىتايلىق قوس باسشى.

«قازاقستان رەسپۋبليكاسى پارلامەنتى ءماجىلىسى ءتوراعاسىنىڭ ورىنباسارى گۇلميرا يسىمبايەۆا قازاقستان - قىتاي دوستىعى كۇننەن- كۇنگە كۇشەيۋدە، قازاقستان پارلامەنتى قازاقستان - قىتاي جان- جاقتى ستراتەگيالىق سەرىكتەستىك قاتىناسىن دامىتۋ ءۇشىن ۇلكەن ۇلەس قوسۋعا نيەتتى ەكەنىن ايتتى»، دەپ جازدى People Daily اقپاراتتىق پورتالى.

ءوز ۇيىندە 2600 دانا كىتاپتى ساقتاپ كەلگەن زەينەتكەر - «اعاجاي- التاي» پورتالى

وسى اپتادا قىتاي حالقى «دۇنيە‎جۇزىلىك كىتاپ وقۋ كۇنىن» جاپپاي اتاپ ءوتتى. بۇل مەرەكەلىك باستاما ۇلكەن قالالاردا عانا ەمەس، ايماق، اۋدانداردا دا جالعاسىن تاپقان بولاتىن. وسى حالىقارالىق شاراعا وراي، قازاقتار تۇراتىن ەلدى مەكەندەردەگى كىتاپ وقۋدا كوپكە ۇلگى بولارلىق ازاماتتاردى اقپارات كوزدەرى كوپشىلىككە تانىستىردى. سولاردىڭ ءبىرى ناۋان قىزمەت ۇلى ەكەن. بۇل تۋرالى «اعاجاي- التاي» پورتالى جازادى.

ناۋان قىزمەت ۇلى 1951 -جىلى قىتايدىڭ شىڭگىل اۋدانىنداعى شاعانعول وزەنى بويىندا تۋعان. قوعامدىق قىزمەتتى وقىتۋشى بولۋدان باستاپ، شاعانعول اۋىلدىق جاتاقتى مەكتەبىنىڭ ديرەكتورى، اعاشوبا اۋىلىنىڭ اكىمى، اۋداندىق ۇكىمەت اكىمىنىڭ ورىنباسارى، اۋكومنىڭ ءتوراعا ورىنباسارى، اۋداندىق ساياسي كەڭەستىڭ باستىعى سىندى مىندەتتەر وتەپ، 2012 -جىلى زەينەتكە شىعادى.

«جارىم عاسىردان استام ۋاقىتتان بەرى كىتاپ ماعان رۋحاني سەرىك بولىپ كەلەدى» دەيدى ن. قىزمەت ۇلى. كىتاپتى ءوزىنىڭ اينىماس دوسى، رۋحاني تىرەگىنە بالاپ، قاي كەزدە دە قولىنان تاستاماي 2600 دانا كىتاپ-جۋرنالدى ۇيىندە ساقتاپ كەلگەن ناۋان قىزمەت ۇلى كىتاپتى ومىرىنە ارقاۋ ەتەدى. ول مەكتەپتە وقىپ جۇرگەندە، مۇعالىمدەر قولىنداعى ساناۋلى كىتاپتاردى جيناپ، سونى مەكتەپ ىشىندە شاعىن كىتاپحانا ەتىپ اشادى. وزگەلەردى كىتاپ وقۋعا ۇگىتتەپ، سىنىپتىڭ قىزىل تاقتاسىنا وقىعان كىتاپتاردان العان اسەرلەرىن جازىپ، سىنىپتاستارىنىڭ كىتاپ وقۋعا ىنتالارىن وياتۋعا كۇش سالعان.

«كىتاپ وقىپ ۇيرەنۋ - مەنىڭ تۇرمىس- تىرشىلىگىمە، باسشىلىق جۇمىستارىمدا العا ىلگەرلەۋىمە دەمەۋشى كۇش بولدى» دەيدى زەينەتكەر.

«مەن قانشا تۇرمىس قيىنشىلىعىن تارتا ءجۇرىپ ەر جەتسەم دە، كىتاپ مەنىڭ رۋحاني دۇنيەمە نۇرىن سەۋىپ، قىزمەتتە ورلەۋىمە، ەمتيحاننان ءوتىپ، رەسمي اكىمشىلىك جۇمىس ىستەۋىمە، تومەنگى ساتىدان باستاپ، باسشىلىق ورىنعا كوتەرىلۋىمە دەيىن مىقتاپ نەگىز قالادى. بۇگىنگى كۇندە وتكەن ىستەرىمە قايىرىلا نازار سالسام، مەنىڭ ورتالاۋ مەكتەپتى (7 -سىنىپتى - اۆت. ) تولىق بىتىرمەگەن بولماشى وقۋ تاريحىم مەن ەرەسەكتەردىڭ ءبىلىم تولىقتىرۋ كلاسىنان ەكى جىل وقىپ العان ورتا تەحنيكۋم دارەجەلى ساۋاتتىق ءبىلىمىمنىڭ تەڭ جارتىسى وزدىگىمنەن ۇزبەي كىتاپ وقىپ ۇيرەنۋىمنىڭ جەمىسى ەكەندىگىنە ءشۇبا كەلتىرمەيمىن...» دەپ تۇيىندەيدى ءوز ويىن ناۋان قىزمەت ۇلى.

ول بالالارىنا ءاردايىم «ارتىق ءبىلىم كىتاپتا» ەكەنىن ەسكەرتىپ وتىراتىنىن، سونداي-اق زەينەتكەر كىتاپ سورەسىندەگى كىتاپتارىن باسقالاردىڭ وقۋىنا بەرۋ ارقىلى دوستارىنان وي ورتاقتىعىن ساقتاپ جۇرەتىنىن ايتادى.

«مەنىڭ كىتاپ سورەمنەن كىتاپ سۇراپ الىپ وقيتىندار نەشە ونداعان جىلداردان بەرى جالعاسىپ كەلەدى. ءتىپتى، كەيبىر كىتاپپاز زيالىلار، قالامگەرلەر دە قاجەت بولعان كىتاپتارىن مەنەن الادى. مەن ولارعا كىتاپتارىمدى بەرىپ، ولارمەن وقىعان كىتاپتارمىز تۋرالى اڭگىمەگە كىرىسىپ، ءوزارا تالقىلاپ، قۋانىسىپ قالامىز. مەن ۇزاق ۋاقىت اۋىل، اۋدان اكىمشىلىكتەرىندە باسشىلىق قىزمەتتەر اتقارعان بولسام دا، ءوزىمدى قاراپايىم وقىرمان سانايمىن. وقىرمان تۇرعىسىنان، قازاق تىلىندەگى باسىلىمدارمەن ابدەن تانىسپىن، جارتى عاسىردان بەرگى ونىمدەرىنەن قۇمارلانا سۋسىندادىم. جۋىق جىلدارى ءوزىمنىڭ وقۋشىلىق ءومىرىمدى تاقىرىپ ەتكەن ەسسە كىتاپتا جازدىم...»، - دەيدى ناۋان قىزمەت ۇلى.

ۇرىمجىدە قىزىقتى قوعامدىق سپورت ويىندارى ءوتتى - «تيانشاننەت» اقپاراتتىق پورتالى

«ۇشپا كىلەم جارىسى» سىندى قىزىقتى سپورتتىق ويىنداردىڭ ءوتۋىنىڭ باستى ماقساتى وسىنداي شارالار وتكىزۋ ارقىلى ءبىر اۋماقتا تۇراتىن ادامداردى ءبىر- بىرىنە جاقىنداتۋ.

سونداي-اق، بۇل جولعى الەۋمەتتىك شارا 1 -مامىر حالىقارالىق ەڭبەكشىلەر مەرەكەسىن قارسى الۋ ەكەن.

بۇل تۋرالى قىتايلىق kazakh.ts.cn اقپاراتتىق پورتالى حابارلاعان بولاتىن. اتالعان شاراعا ءارتۇرلى ۇل پەن ۇيىم وكىلدەرى قاتىسقان.

حالىقارالىق قوجا احمەت ياساۋي سيمپوزيۋمى باستالدى - TRT

بيىل ەكىنشى مارتە ۇيىمداستىرىلعان حالىقارالىق قوجا احمەت ياساۋي ەكى كۇندىك سيمپوزيۋمى انكارادا باستالدى. بۇل تۋرالى 26 -ءساۋىر كۇنى تۇركيا راديو تەلەديدار مەكەمەسىنىڭ رەسمي اقپاراتتىق پورتالى حابارلادى.

سيمپوزيۋمنىڭ بەتاشارىنا يسلام ەلدەرى ستاتيستيكا، ەكونوميكا جانە الەۋمەتتىك زەرتتەۋ جانە ءبىلىم ورتالىعى SESRİC باس ديرەكتورى مۋسا كۋلاكلىكايا، قوجا احمەت ياساۋي ۋنيۆەرسيتەتى وكىلەتتى كەڭەس ءتوراعاسى پروفەسسور مۋسا يىلدىز، وكىلەتتى كەڭەس مۇشەسى پروفەسسور مۋحيتدين شيمشەك، تۇرىك ىنتىماقتاستىق جانە كوورديناتسيا باسقارماسى ءتوراعاسىنىڭ ورىنباسارى مەحمەت سۇرەيا ەر مەن كوپتەگەن ۋنيۆەرسيتەت ۇستازدارى قاتىستى.

بەتاشاردا ءسوز سويلەگەن پروفەسسور مۋسا يىلدىز 2016 -جىلى TIKA- نىڭ قولداۋىمەن ديۋاني حيكمەت سۇحباتتارى باستالعانىن ەسكە سالدى.

«وسى سۇحباتتار باستالعاندا، قوجا احمەت ءياساۋيدىڭ ديۋاني حيكمەتىن شاعاتاي تىلىندەگى تۇپنۇسقاسىمەن جاريالادىق. بالالار ءۇشىن حيكايا كىتابىن باستىردىق. قوجا احمەتتى بالالارىمىز دا ۇيرەنسىن دەپ ماقسات ەتتىك» دەدى مۋسا يىلدىز.

يىلدىز سونىمەن بىرگە 2016-2017 يۋنەسكو قوجا احمەت ياساۋي جىلىنا وراي 850 -جىلدىق ماركاسى مەن حاتقالتا شىعارىلعانىن، ايىرىقشا كۇمىس مونەتا باستىرىلعانىن ايتقان.

«تۇركىستان ءپىرى احمەت ياساۋي ءبىز ءۇشىن - جول كورسەتۋشى. ورتالىق ازيادا تۇرىك- يسلام تۇسىنىگىن قالاي پىشىندەپ، ءبىز تۇرعان جاعرافياعا قالاي سوزىلعان بولسا، سول سەكىلدى ونىڭ پرينتسيپتەرى ءبىزدىڭ اتالارىمىز ارقىلى الەمگە تارادى. سول سۇيىسپەنشىلىككە تولى تۇسىنىك الەمدى شارلاپ ءجۇر. TIKA دا وسى تۇسىنىكتىڭ ءبىر بولشەگى بولۋ ءۇشىن جۇمىس جاساۋدا» دەدى تيكا ءتوراعاسىنىڭ ورىنباسارى مەحمەت سۇرەيا ەر.

ءدال وسى تۇركيا راديو تەلەديدار مەكەمەسىنىڭ رەسمي اقپاراتتىق پورتالىندا وسى اپتادا «جەر جانناتى جەتىسۋ» دەگەن تاعى ءبىر شاعىن اقپارات جارىق كوردى. «جەر جانناتى - جەتىسۋ» - بۇل مەكەن تاريحتا تۇركىلەر العاش ورنالاسقان جەر دەپ تە ەسەپتەلەدى. تابيعي سۇلۋلىقتارى جاعىنان ورتالىق ازيانىڭ جۇماعى دەپ ەسەپتەلگەن بۇل ءوڭىر كوكتەم كەلگەندە ەرەكشە كەلبەتكە ەنەدى.. . تەرريتورياسىنىڭ اۋقىمى جاعىنان الەمنىڭ توعىزىنشى ەلى بولىپ سانالاتىن قازاقستان كوپتەگەن ادام ءۇشىن - ءالى اشىلماعان، قۇپيا جەرلەرى كوپ مەكەن...» دەپ جازادى تۇركيالىق ب ا ق.

 

قازاقستان يرانمەن تۋريزم سالاسىن دامىتۋعا ازىرلىگىن ءبىلدىردى - «فارس» اقپارات اگەنتتىگى

«يرانداعى قازاقستان ەلشىسىنىڭ ورىنباسارى ەكى ەل اراسىندا تۋريستەرمەن الماسۋدى سۇرادى» دەپ جازدى parstoday.com. بۇنداي ۇسىنىستى يرانداعى قازاقستان ەلشىسىنىڭ ورىنباسارى نۇرجان ابدۋللايەۆ كوتەرگەن. «ي ي ر- نىڭ پرەزيدەنتى «تابريز 2018» شاراسىنىڭ اشىلۋ راسىمىندە مۇسىلمان ەلدەرى اراسىندا تۋريستەرمەن الماسۋدى ارتتىرۋ قاجەتتىگىن قۋاتتاعانداي قازاقستان ۇكىمەتى دە وسى ءىستى جۇزەگە اسىرىپ، ءوز ازاماتتارىنا يران مەن ءتابريزدىڭ كورىكتى جەرلەرىن تانىستىرۋعا مۇددەلى بولىپ وتىر»، - دەگەن نۇرجان ابدۋللايەۆ.

نۇرجان ابدۋللايەۆ ءتابريزدى كوركەم، اۋا-رايى تازا، كورىكتى جەرلەرگە باي قالا دەپ سيپاتتاي كەلە، قازاقستاندىقتاردىڭ وسى تاماشا ءارى تاريحي قالانى كەلىپ كورۋى ءۇشىن تالپىنىس جاسالاتىنىن، يران مەن قازاقستان اراسىنداعى ۆيزالىق رەجيمدى جويۋ تۋريستەر الماسۋدى جەڭىلدەتىپ، يرانعا كەلەتىن قازاقستاندىقتاردىڭ سانىن ارتتىراتىنىن ايتقان. سونداي-اق، بۇل ءىستى ۇستىمىزدەگى جىلدىڭ سوڭىنا دەيىن جۇزەگە اسىرۋ جوسپارلانىپ وتىرعانىن مالىمدەگەن.

«ءتابريزدى 2018 -جىلداعى مۇسىلمان ەلدەرىنىڭ تۋريستىك استاناسى رەتىندە بەكىتكەن حالىقارالىق دەڭگەيدەگى سالتاناتتى ءراسىم سارسەنبى كۇنى يران پرەزيدەنتى حاسان رۋحاني مەن ءبىر توپ ەلشىلەر مەن ايماق ەلدەرىنىڭ تۋريزم مينيسترلەرىنىڭ قاتىسۋىمەن ءوتتى. 2018 -جىلى مۇسىلمان ەلدەرىنىڭ تۋريستىك استاناسى رەتىندە تاڭدالعان ءتابريز تابيعي جانە تاريحي كورىكتى مەكەندەرى مەن قولونەر بۇيىمدارىنا باي تاريحي قالا سانالادى» دەپ تۇيىندەيدى يراندىق ب ا ق.

ستۋدەنتتەر بەيجىڭدە قازاقتىڭ ايگىلى اقىنى ماعجان جۇمابايەۆتى ەسكە الدى - «جەنمين جيباو» (People Daily)

«ماعجان جۇمابايەۆ (1893 - 1938) قازاقستاننىڭ ايگىلى اقىنى، وسى زامان ادەبيەتىنىڭ نەگىزىن قالاۋشىلاردىڭ ءبىرى، «قازاقستاننىڭ پۋشكينى مەن شەكسپيرى» اتالعان ءىرى تۇلعا» دەپ جازادى قىتايلىق People Daily.

قىتاي حالىقارالىق مادەني ىقپالداستىق ورتالىعى مەن بەيجىڭ شەتەل ءتىلى ۋنيۆەرسيتەتىنىڭ «قازاقستان ورتالىعى» بىرلەسە وتىرىپ، بەيجىڭدە قازاقستاننىڭ ايگىلى اقىنى ماعجان جۇمابايەۆتىڭ دۇنيەگە كەلگەندىگىنىڭ 125 جىلدىعىن ەسكە الۋ كەشى وتكىزگەن.

«قىتاي مەن قازاقستاننىڭ ج و و- دان كەلگەن ستۋدەنتتەر ماعجاننىڭ شىعارماسىنان قىتايشا - قازاقشا ەكى تىلدە وقىدى. اتالعان مادەني شاراعا قازاقستاننىڭ قىتايداعى ەلشىلىگىنىڭ، قىتاي حالىقارالىق مادەني ىقپارلداستىق ورتالىعىنىڭ، قىتاي قوعامدىق عىلىمدار اكەدەمياسىنىڭ وكىلدەرى قاتىستى» دەپ جازدى قىتايلىق ب ا ق.

اۆتور بەيسەن سۇلتان ۇلى