بەيجىڭدە قازاقستاندىق بالالارعا ارنالعان ورتالىق اشىلدى

 بەيجىڭ. قازاقپارات - بۇگىن بەيجىڭدە ق ر سىرتقى ىستەر ءميينسترى قايرات ءابدىراحمانوۆ «بالدىرعان» بالالارعا ارنالعان دامۋ ورتالىعىنىڭ اشىلۋ سالتاناتىنا قاتىستى، دەپ حابارلايدى قازاقپارات اگەنتتىگىنىڭ قىتايداعى مەنشىكتى ءتىلشىسى.

قىتايداعى ق ر ەلشىلىگىنىڭ قولداۋىمەن اشىلعان بۇل مەكەمە ەل اۋماعىنان تىس جۇرگەن قازاق ءتىلدى بالالارعا ارنالعان العاشقى جەكە دامۋ ورتالىعى اتاندى. وعان قازاقستاندىق ديپلوماتتاردىڭ جانە بەيجىڭدە اككرەديتتەلگەن ۇلتتىق كومپانيا وكىلدەرىنىڭ ۇل- قىزدارى بارا الادى.

204 شارشى مەتر بولاتىن اۋماقتا مەكتەپ جاسىنا دەيىنگى بالالارعا قازاق ءتىلى، قازاقتىڭ ءداستۇرى مەن مادەنيەتى ۇيرەتىلەدى. وندا تاجىريبە، ماتەماتيكالىق، تىلدىك جانە گيمناستيكالىق دەپ اتالاتىن بىرنەشە ءبولىم بار.

دامىتۋ ورتالىعى جۇمىس كۇندەرى 08:00-17:00 ارالىعىندا جۇمىس ىستەيدى. قوسىمشا اعىلشىن ءتىلى، حورەوگرافيا، ءان سالۋ جانە بەينەلەۋ ونەرى ۇيىرمەلەرى جۇمىس ىستەيدى.

«قازىرگى ۋاقىتتا ورتالىقتا 13 تاربيەلەنۋشى بار، وندا قازاقستاندىقتار عانا ەمەس، قىرعىزستان بالالارى دا بار. ورتالىق ازيا ەلدەرى ءبىزدىڭ ورتالىققا ۇلكەن قىزىعۋشىلىق تانىتىپ وتىر» ، - دەيدى بالالارعا ارنالعان دامۋ ورتالىعىنىڭ باسشىسى، پسيحولوگ- پەداگوگ نازگۇل نازاربەكوۆا.

 

قىتايداعى ق ر ەلشىلىگى كەلتىرگەن دەرەكتەرگە سايكەس، بەيجىڭدە 90 نان استام مەكتەپ جاسىنا دەيىنگى قازاق بالالارى تۇرادى.

 

 بۇعان دەيىن ق ر سىرتقى ىستەر ءمينيسترى قايرات ءابدىراحمانوۆ، قازاقستاننىڭ قىتايداعى توتەنشە جانە وكىلەتتى ەلشىسى شاحرات نۇرىشيەۆ جانە قازاقستاندىق ديپلوماتتار مەن «جيڭتاي» مۋزەيىنىڭ قىزمەتكەرلەرى بەيجىڭنىڭ «چاويان» ورتالىق ساياباعىندا ورنالاسقان اباي ەسكەرتكىشىنە گۇل شوقتارىن قويدى.