قوستاناي وبلىسىنداعى جاڭا قالا قالاي دامىماق؟

قوستاناي. قازاقپارات - قوستاناي وبلىسىنداعى بەسىنشى قالا - توبىلدا جاڭا شاعىن اۋداندار بوي كوتەرەدى. بۇل تۋرالى ءوڭىر باسشىسى ارحيمەد مۇحامبەتوۆتىڭ قاتىسۋىمەن وتكەن جيىندا ءمالىم ەتىلدى، دەپ حابارلايدى قازاقپارات.

ەسكە سالساق، قوستاناي وبلىسىنداعى زاتوبول كەنتىندە وسى ەلدى مەكەنگە قالا مارتەبەسىن بەرۋ جانە اتىن وزگەرتۋ ماسەلەسىنە ارنالعان جەرگىلىكتى قوعامداستىقتىڭ جينالىسى وتكەن ەدى. سول جيىندا قوستاناي اۋدانى اكىمىنىڭ ورىنباسارى بولات بەكەنوۆ ەلىمىز كارتاسىندا جاڭا توبىل قالاسى پايدا بولاتىنىن ايتقان بولاتىن.

قوستاناي اۋدانىنىڭ اكىمى قايرات احمەتوۆتىڭ سوزىنشە، قازىرگى زاتوبول كەنتىنىڭ دامۋى ءۇشىن ءالى بىرنەشە الەۋمەتتىك نىسان تۇرعىزۋ قاجەت.

«بۇگىندە اۋدانداعى 70 مىڭنان استام ادامنىڭ تەڭ جارتىسى زاتوبول، زارەچنىي جانە ميچۋرين اۋىلدارىندا تۇرادى. اتالعان ەلدى مەكەندەردەگى 135 شاقىرىم جولدىڭ 96 شاقىرىمى جوندەۋدى قاجەت ەتەدى. بيىل وسى ماقساتتا 500 ميلليون تەڭگە قاراستىرىپ وتىرمىز. جىل سايىن جاياۋ جۇرگىنشىلەر جولىن سالۋعا 35 ميلليون تەڭگە ءبولۋ كەرەك. 2021-جىلعا دەيىن بارلىق كوشەگە جارىقشامدار ورناتىلادى. وعان بيۋجەتتەن 188,5 ميلليون تەڭگە بولىنەدى»، - دەدى قايرات احمەتوۆ ءوز بايانداماسىندا.

وبلىس اكىمى ارحيمەد مۇحامبەتوۆ جول جوندەۋگە باعىتتالعان قارجىنى قولدايتىنىن جەتكىزدى. سونداي-اق، ول تاسجولدى رەسايكلينگ ادىسىمەن قالىپقا كەلتىرۋدى ۇسىندى. ارحيمەد مۇحامبەتوۆ ايتقانداي، سوڭعى ءۇش جىلدا رەسايكلينگ ادىسىمەن 100 دەن استام كوشە جوندەلگەن.

بيىل بولاشاق توبىل قالاسىندا بىرنەشە شاعىناۋدان پايدا بولادى. بۇعان قوسا «سيەۆەرنىي» شاعىناۋدانىندا قۇرىلىسى باستالعان 11 كوپ قاباتتى ءۇي حالىق يگىلىگىنە بەرىلمەك.

«قازىرگى ۋاقىتتا «سيەۆەرنىيعا» قاجەتتى ينفراقۇرىلىم - گاز، سۋ، ەلەكتر جارىعى وتكىزىلگەن. مۇنداعى 8 ءۇي نەسيەلىك باعىتتا، قالعان 3 ءۇي جەرگىلىكتى اتقارۋشى ورگاندار قىزمەتكەرلەرىنە تاپسىرىلادى. جاڭادان بوي كوتەرەتىن «بايتەرەك» جانە «استانا» شاعىناۋداندارىندا 72 كوپ قاباتتى ءۇي تۇرعىزىلادى»، - دەدى اۋدان اكىمى.

ارحيمەد مۇحامبەتوۆ زاتوبول كەنتىندەگى ەسكى عيماراتتاردى سىنعا الدى. ونىڭ سوزىنشە، توزىعى جەتكەن قۇرىلىس ورىندارى بولاشاق قالانىڭ دامۋىنا ايتارلىقتاي كەدەرگى كەلتىرەدى.

«بىرىنشىدەن، عيماراتتار قالانىڭ كوركى دەسەك، ونى رەتكە كەلتىرۋدى تەز ارادا قولعا الىڭىزدار. دامۋدى تەجەيتىن فاكتوردىڭ ءبىرى وسى. اۋەلى، تۇرعىن ۇيلەردىڭ قاسبەتىن دۇرىستاڭىزدار. ۇيلەردىڭ سىرتى ءبىر ءتۇستى بولسىن. اۋدان ورتالىعىندا زاڭسىز سالىنىپ جاتقان قۇرىلىس نىساندارى بار. مۇنداي ولقىلىققا جول بەرۋگە بولمايدى. يەسىز تۇرعان عيماراتتاردى پايدالانباساڭىزدار، مەملەكەتتىڭ مەنشىگىنە وتكىزۋ قاجەت»، - دەپ ەسكەرتۋ جاسادى ءوڭىر باسشىسى.

وبلىس اكىمى اۋدان ورتالىعىندا سپورت الاڭدارىن كوبىرەك سالۋدى تاپسىردى. ا. مۇحامبەتوۆ مەملەكەتتىك قىزمەتشىلەرگە جاڭا عيمارات سالۋ تۋرالى اۋدان اكىمىنىڭ ۇسىنىسىن قولداعان جوق.