سوت ۇكىمدەرىنە قاتىستى تەرىس پىكىرلەر نەگە كوپ كەزدەسەدى
بۇل تۋرالى بۇگىن ق ر جوعارعى سوتىنىڭ كەزەكتى جالپى وتىرىسىندا جوعارعى سوت سۋدياسى ەربول راحىمبەكوۆ ايتتى، دەپ حابارلايدى قازاقپارات.
«وتكەن جىلدىڭ ىشىندە ەلىمىزدىڭ سوتتارى شامامەن 35 مىڭ ادامعا قاتىستى 29 مىڭنان استام ۇكىم شىعاردى. ادامعا شىعارىلعان ءار ۇكىمنىڭ ارتىندا ونىڭ تاعدىرى، ونىڭ جاقىندارىنىڭ تاعدىرى تۇر. سوندىقتان ۇكىم زاڭدى، ال جازانىڭ تاعايىندالۋى ءادىل بولۋى ءتيىس. بارلىق ەرەجەلەر مەن فورمالارعا جاۋاپ بەرەتىن ساپالى شىعارىلعان ءارى جاسالعان ۇكىم سوتقا دەگەن قۇرمەت قارىم-قاتىناسىنىڭ قالىپتاسۋىنا، ازاماتتا ونىڭ ءىس-ارەكەتىنىڭ دۇرىستىعىنا نانۋمەن قاتار سوتقا دەگەن سەنىمنىڭ پايدا بولۋىنا سەپتىگىن تيگىزەدى»، - دەدى ول.
ونىڭ ايتۋىنشا، پروتسەسسكە قاتىسۋشىلار تاراپىنان ۇكىمنىڭ وزدەرىنە تۇسىنىكسىزدىگىنە قاتىستى شاعىم ءجيى تۇسەدى.
«سۋديا شەشىم شىعاردى، ءبىز ودان ەشتەڭە تۇسىنبەدىك» نەمەسە «بىرنەشە بەتتىك ۇكىم ءماتىنىن وقىپ شىقانىمەن ەشتەڭە تۇسىنە المادىق» دەيتىندەر كوپ. الەۋمەتتىك جەلىدە كەز كەلگەن ءبىر ۇكىمگە قاتىستى تەرىس پىكىرلەر مولىنان كەزدەسەدى. ەگەر ونى وقىپ شىقساڭ، وقىرمانعا بۇرمالانعان اقپاراتتىڭ جەتكەندىگى تۇسىنىكتى بولادى. ال بۇرمالانعان اقپارات قالاي پايدا بولادى؟ ارينە، ناقتى تۇزىلمەگەن، كۇردەلى تىلدە جازىلعان، ارتىق سوزدەرى كوپ ۇكىمنەن شىعادى»، - دەدى ەربول راحىمبەكوۆ.
وسى رەتتە جوعارعى سوت سۋدياسى ۇكىمدەردىڭ بارلىق ءتۇرىنىڭ قۇرىلىمىن قايتا قاراۋدى، سوت اكتىلەرىن ۇزىن-سونار جازۋدان باس تارتىپ، ۇكىمدى قىسقا ءارى تۇسىنىكتى شىعارۋدى ۇسىندى.
«ۇكىم رەت-رەتىمەن باياندالۋى ءتيىس. ىسكە تىكەلەي قاتىسى بار وقيعالاردى عانا كورسەتۋ قاجەت. بىرنەشە ەپيزودتى ىستە وقيعا حرونولوگياسىن ساقتاپ، ەپيزودتاردى سانمەن بەلگىلەۋ ارقىلى ءبولۋ ۇسىنىلادى»، - دەدى ول.