تۇڭعىش اسكەري ۇشقىش قازاق قىزى اۋە كەمەسىن ءوز بەتىمەن باسقاردى
ول العاشقى اسپانعا ۇشۋىن بالقاش اۆياتسيا وقۋ ورتالىعىندا جاساپتى. نازىك جاندى پيلوتتىڭ ءبىرىنشى قادامى ءساتتى شىققان، دەپ حابارلايدى الماتى ارناسى.
اردانا بوتاي بۇل ساتكە ۇزاق دايىندالعان. نازىك جاندى پيلوت جويعىش ۇشاقتا 4 اسكەري تاپسىرما ورىنداۋى كەرەك. اۆياتسيا ورتالىعىنىڭ كومانديرى ۇشاقتىڭ تىزگىنىنە وتىرماس بۇرىن الدىمەن پسيحولوگيالىق دايىن بولۋ كەرەك، دەيدى. كىشكەنتاي قاتەلىكتەردى جىبەرىپ الماس ءۇشىن نۇسقاۋشىمەن تاعى ءبىر مارتە دايىندالىپ الۋ قاجەت.
«اردانا العاش ۇشقىش بولام دەپ وقۋ ورنىنا كەلگەندە بارلىعى تاڭقالعان بولاتىن. كوبىسىنە ەرسى كورىندى. الايدا، اردانا تاباندىلىعىنىڭ ارقاسىندا ايەل ادام دا اسكەري ۇشاقتى باسقارا الاتىنىن دالەلدەدى. قازىر ەڭبەگىنىڭ جەمىسىن كورۋدە» ، - دەدى اۆياتسيالىق وقۋ ورتالىعىنىڭ كومانديرى تيمۋر ەسماعامبەتوۆ.
اردانا بوتاي بالا كەزىنەن ۇشقىش بولۋدى ارمانداپ، جويعىش ۇشاقتى تىزگىندەۋدى ماقسات ەتىپتى. وسى ارمان ون التى جاستاعى بويجەتكەندى مەملەكەتتىك اۆياتسيالىق ورتالىققا جەتەلەپ كەلگەن. وندا ۇزدىكتەردىڭ ءبىرى بولعان كۋرسانت جەڭىل موتورلى ۇشاقتاردى جۇرگىزۋدى ۇيرەنەدى. وسىدان ەكى جىل بۇرىن ءبىزدىڭ ارنا تىلشىلەرى اردانامەن كەزدەسكەن. ول كەزدە نازىك جاندى پيلوت ان-26 ۇشاعىن باسقارۋدى ۇيرەنىپ جۇرگەن بولاتىن. جاس ۇشقىشقا اسكەري ەكيپاج قاتارىنا كىرۋ ءۇشىن كەم دەگەندە 50 ساعات ۇشاق باسقارۋ قاجەت بولىپتى.
سوڭعى نۇسقاۋلار ارداناعا بەرىلدى. پيلوت ۇشۋعا دايىن. اردانا بوتايدىڭ اۋەدە ۇشقان 20 مينۋتى تاريحقا كىرەتىنى ءسوزسىز. ول اسكەري جويعىش ۇشاعىن باسقارعان العاشقى نازىك جاندى ۇشقىش.
«مەنىڭ ويىمشا ۇشقىشتىڭ ەر ازامات بولۋى ماڭىزدى ەمەس. مەن بۇگىن پيلوتتىڭ ەڭ باستى مىندەتى - كەز كەلگەن جاعدايدا دۇرىس شەشىم قابىلداۋ ەكەنىن سەزىندىم. ۇشقىشتار - اۋەدەگى قورعاۋشىلار ەمەس پە!؟ مەن مۇنىمەن توقتاپ قالمايمىن. بىلىكتىلىگىمدى ارتتىرامىن» ، - دەدى ۇشقىش اردانا بوتاي.
اردانا ءوزىن باسقا سالادا كورە المايتىنىن ايتادى. ۇشاقتى باسقارۋدى جانى سۇيەدى. نازىك جاندى پيلوتتىڭ ماقساتى ايقىن. ەندى ول بولاشاقتا كوسموسقا ۇشۋدى جوسپارلاپ ءجۇر.