ەكى جىلدا مەكتەپتەردى اعىلشىنشا ساباق بەرەتىن ۇستازدارمەن قامتۋ كۇمان تۋدىرادى - دەپۋتات
ۇكىمەت باسشىسىنا بۇگىنگى پارلامەنت ءماجىلىسىنىڭ وتىرىسىندا دەپۋتاتتىق ساۋال جولداعان «نۇر وتان» فراكسياسىنان ءماجىلىس دەپۋتاتتارى وسىنداي ماسەلە كوتەردى، دەپ حابارلايدى قازاقپارات ءتىلشىسى.
«ءبىلىم جانە عىلىم مينيسترلىگى بەرگەن اقپارات بويىنشا ەلىمىز ءۇشىن ماڭىزدى وسى باعىتتا العا جىلجۋ بارى كورىنەدى. الايدا ءبىرقاتار ولقىلىقتار مەن كەمشىلىكتەردىڭ بار ەكەنى بەلگىلى»، - دەدى دەپۋتات ەرسۇلتان بەكتۇرعانوۆ.
ونىڭ ايتۋىنشا، اتقارىلعان جۇمىس تۋرالى ناقتىلاۋ ماقساتىندا ۋاكىلەتتى ورگانعا كەيىنگى كەزدەرى ماجىلىسمەندەر 2 رەت حات جولداپ، قاناعاتتانارلىق جاۋاپ الا الماعان.
«سوندىقتان، بۇگىن سىزگە ساۋال جولداۋعا ءماجبۇر بولىپ وتىرمىز. اتاپ ايتقاندا، مىناداي اقپاراتتاردى العىمىز كەلگەن. ءبىرىنشى - 2018-2020 -جىلدار ارالىعىندا جاراتىلىستانۋ پاندەرىن اعىلشىن تىلدەرىندە وقىتىلاتىن وقۋشىلاردىڭ سانى قانشا، 2018-2020 -جىلدارعا ارنالعان ناقتى وسى پاندەردى وقىتۋ بويىنشا سىنىپتاردىڭ سانى قانشا جانە ءبىلىم بەرۋ جۇيەسى ءۇشىن مەكتەپتەر قانداي ولشەم- شارتتار بويىنشا ىرىكتەلەدى؟ كەلەسى - جاڭا ءبىلىم جۇيەسى اۋىلدىق مەكتەپتەردە قالايشا ەنگىزىلەتىن بولادى؟ بەسىنشى - ءۇش تىلدىك ءبىلىم بەرۋدىڭ جول كارتاسىندا بەلگىلەنگەن قالالار، اۋداندار جانە اۋىلدار بولىگىندە ايتىلعان پاندەر بويىنشا اعىلشىن تىلىندە ساباق بەرەتىن قانشا ءمۇعالىم كەرەك ەكەنىن سۇراعان ەدىك. وكىنىشكە وراي ءتيىستى جاۋاپ الا المادىق»، - دەدى ول.
وسىعان بايلانىستى، ماجىلىسمەندەر مەملەكەتتىك ورگاندا ءتيىستى اقپاراتتار جوق نەمەسە ساراپتامالار جاسالمادى دەگەن تۇيىنگە كەلگەن.
«بۇگىنگى تاڭدا كەيبىر مەكتەپتەردە ءپاندى قازاق جانە ورىس تىلدەرىندە وقىتاتىن مۇعالىمدەر بويىنشا كادرلار تاپشىلىعىن ەسكەرسەك، 2020 -جىلعا دەيىن رەسپۋبليكامىزدىڭ بارلىق مەكتەپتەرىن اعىلشىن پاندەرىندە ساباق بەرەتىن مۇعالىمدەرمەن قامتۋ كۇمان تۋعىزادى. ونىڭ ۇستىنە، وڭىرلەرگە بارعان ساپارلارىمىزدا سايلاۋشىلارمەن كەزدەسۋ بارىسىندا ولاردان وسىناۋ ماڭىزدى ماسەلە بويىنشا كوپتەگەن سۇراقتار تۋىنداۋدا. قۇرمەتتى باقىتجان ءابدىر ۇلى! ۋاكىلەتتى ورگاندا دامۋدىڭ جول كارتاسىندا بەلگىلەنگەن ءۇش تىلدىك ءبىلىم بەرۋگە كوشۋ جانە ساۋالدا كورسەتىلگەن ماسەلەلەردى شەشۋگە بايلانىستى ناقتى تاپسىرمالاردى بەرۋدى وتىنەمىز»، - دەپ ءتۇيدى ەرسۇلتان بەكتۇرعانوۆ.