+7 (701) 759 90 19 Лента
14 °С : استانا
28 °С : الماتى
USD 346.68 EUR 404.02
RUB 5.47 CNY 51.15
جاڭالىقتار

اقتوبەلىك عالىمدار قورعانداردىڭ جويىلىپ بارا جاتقانىنا الاڭداپ وتىر

17 ءساۋىر 19:07 379
:ءبولىسۋ
اقتوبەلىك عالىمدار قورعانداردىڭ جويىلىپ بارا جاتقانىنا الاڭداپ وتىر

اقتوبە. قازاقپارات -  ت م د ەلدەرىنىڭ عالىمدارى «مارعۇلان وقۋلارى - 2018» عىلىمي- پراكتيكالىق كونفەرەنسياسىندا باس قوسادى. كونفەرەنسيا كەزىندە «ۇلى جىبەك جولىنىڭ ساكرالدى گەوگرافياسى»، «تاريحي- مادەني مۇرا ەسكەرتكىشتەرىن قورعاۋ جانە پايدالانۋ تۋرالى» زاڭ جوباسى تالقىلانباق.

 اقتوبەلىك عالىمدار ءوندىرىس دامىعان كەزدە قورعانداردىڭ قورعاۋسىز قالعانىن العا تارتىپ وتىر، دەپ حابارلايدى قازاقپارات ءتىلشىسى.

«عالىمدار ەكونوميكانىڭ قارقىندى دامۋىنا قارسى ەمەس. ءبىراق ءبىز قورعاندى قورعاۋعا الماساق، جاعداي مۇنان ءارى قيىنداي تۇسەدى. اقتوبە قالاسىندا جەكە تۇرعىن ۇيگە جەر بەرىلىپ جاتىر. وتكەن جىلى سونداي قۇرىلىس جۇمىستارى كەزىندە تاريحي جادىگەرلەردى ساقتاپ قالۋعا مۇمكىندىك تۋدى. قازىر سازدى سۋ قويماسى، 41-رازەزدەن بەرىلگەن جەرلەردە قورعاندار بار. بارىنە جەر بەرىلدى، كوممۋنيكاتسيالىق جەلىلەر تارتىلدى. ءبارى شەشىلىپ بولعان سوڭ ءبىز بارىپ زەرتتەۋ جۇرگىزەمىز. ال شىن مانىندە اكىمدىك جەردى بەرمەس بۇرىن كوميسسيا قۇرامىنا ارحەولوگتاردى الۋى شارت. سوندا عانا ءبىز تاريحىمىزدى ساقتاپ قالا الامىز»، - دەدى ءا. مارعۇلان اتىنداعى ارحەولوگيا ينستيتۋتىنىڭ باتىس قازاقستان ايماعى بويىنشا وكىلى، ارحەولوگ ارمان بيسەنبايەۆ.


اقتوبەلىك عالىمدار قورعانداردىڭ جويىلىپ بارا جاتقانىنا الاڭداپ وتىر

عالىمدار مەن زەرتتەۋشىلەر دە قورعانداردىڭ ناقتى سانىن ايتا المايدى. ءبىراق ءار اۋىلدا كيەلى جەر بارىن، ءۇي سالماس بۇرىن زەرتتەۋ جۇمىستارىن جۇرگىزۋ ماڭىزدى ەكەنىن جاسىرمايدى. ءارى ءوندىرىس، اۋىل شارۋاشىلىعى قۇرىلىمدارى تەك ايىپپۇلمەن قۇتىلىپ، قىلمىستىق جاۋاپكەرشىلىككە تارتىلماسا بۇل ءۇردىس توقتامايدى دەپ وتىر.

«زاڭ جوباسىن ءبىلىم جانە عىلىم، مادەنيەت مينيسترلىكتەرى ۇسىنىپ وتىر. ۇلتتىق مۋزەي مەن ءا. مارعۇلان اتىنداعى ارحەولوگيا ينستيتۋتى تالقىلاۋعا قاتىسادى. 1992 -جىلى قابىلدانعان زاڭ ءبىزدىڭ قۇندى جارىگەرلەرىمىزدى ساقتاي الماي وتىر. زاڭداعى باپتار ءالسىز، كادەگە اسپاي جاتىر. پرەزيدەنت باي مۇرانى ساقتاۋ كەرەك دەپ تاپسىردى. ال وندىرىسكە، اۋىل شارۋاشىلىعىنا بەرىلگەن جەرلەردە ەسكەرتكىشتەر جويىلىپ جاتىر. ەشكىم وزىنە جاۋاپكەرشىلىكتى جۇكتەمەيدى. اكىمشىلىك جاۋاپكەرشىلىككە تارتىپ، ايىپپۇل سالادى. ال كەڭەس وداعىندا ەسكەرتكىشتى بۇزعان ادام 5-8 جىلعا بوس بوستاندىعىنان ايىرىلاتىن بولعان»، - دەدى ارمان بيسەنبايەۆ.

ايتا كەتەيىك، «مارعۇلان وقۋلارى - 2018» عىلىمي- پراكتيكالىق كونفەرەنسياسى ەكى كۇنگە جالعاسادى. كونفەرەنسياعا ماسكەۋ، سانكت- پەتەربۋرگ، قازان، ورىنبور، سامارا، ۋفا، نوۆوسىبىر، كيەۆ، باكۋ، تاشكەنت، بىشكەك، نوكىس، ازەربايجان مەن قىرعىزستاننان عالىمدار، تاريحشىلار قاتىسادى. مۋزەي قىزمەتكەرلەرى دە شاقىرىلعان.

اۆتور: التىناي ساعىندىقوۆا


باستى سوزدەر: قوعام,
:ءبولىسۋ
ونلاين قىزمەتكەرلەر
مۇراعات