مينيستر ابايەۆ حالىقتىڭ سيفرلىق ساۋاتتىلىعىن ارتتىرۋ باعىتتارىن اتادى

استانا. قازاقپارات - ق ر اقپارات جانە كوممۋنيكاتسيالار ءمينيسترى داۋرەن ابايەۆ حالىقتىڭ سيفرلىق ساۋاتتىلىعىنا بايلانىستى بەلگىلەنگەن ەكى باعىتتى اتادى، دەپ حابارلايدى قازاقپارات ءتىلشىسى

بۇگىنگى ۇكىمەت وتىرىسىندا بايانداما جاساعان ءمينيستردىڭ ايتۋىنشا، حالىقتىڭ سيفرلىق ساۋاتتىلىعىن ارتتىرۋ بويىنشا ەكى باعىت بەلگىلەنگەن.

«ءبىرىنشىسى - ورتالىق مەملەكەتتىك ورگاندار حالىق پەن كاسىبي كادرلارعا وسى سالا بويىنشا جان-جاقتى ءبىلىم بەرەدى. ال ەكىنشى باعىت بويىنشا ەل تۇرعىندارىن جەرگىلىكتى اتقارۋشى ورگاندار وقىتاتىن بولادى»، - دەدى داۋرەن ابايەۆ.

ءبىرىنشى باعىتتىڭ اياسىندا ەڭبەك جانە حالىقتى الەۋمەتتىك قورعاۋ، دەنساۋلىق ساقتاۋ، ءبىلىم جانە عىلىم، اۋىل شارۋاشىلىعى مينيسترلىكتەرى جاۋاپتى مەملەكەتتىك ورگاندار رەتىندە قاتىسادى. اتالعان مەملەكەتتىك ورگاندار سيفرلىق ساۋاتتىلىققا بايلانىستى قوسىمشا ءبىلىم بەرۋگە اتسالىسادى.

«ماسەلەن، ۇلتتىق ەكونوميكا مينيسترلىگى «بيزنەستى جۇرگىزۋ» اتتى كاسىپكەرلەردى اۋقىمدى وقىتۋ جۇمىستارىن جۇرگىزىپ جاتىر. دەمەك، وسى وقىتۋ باعدارلاماسىنا سيفرلىق سالانى قوسۋ جوسپارلانعان. وسىعان ۇقساس ءتاسىلدى پەداگوگ كادرلار مەن تاعى باسقا مامانداردىڭ بىلىكتىلىگىن ارتتىرۋ كەزىندە پايدالانۋ كوزدەلگەن. وقىتۋعا جوسپارلانعان كاسىبي مامانداردىڭ سانى - 385 مىڭ ادام. سونىمەن قاتار، 8 ميلليون ازاماتتى مەملەكەتتىك ەلەكتروندىق قىزمەت الۋعا جانە ونلاين- ساۋدا جۇيەسىن يگەرۋ بويىنشا بازالىق بىلىمگە ۇيرەتۋ كوزدەلگەن. بۇل «ازاماتتارعا ارنالعان ۇكىمەت» مەملەكەتتىك كورپوراتسياسى مەن «قازپوشتا» ا ق بازاسىندا جۇزەگە اسىرىلادى»، - دەدى داۋرەن ابايەۆ.

ءمينيستردىڭ بايانداماسىنا سايكەس، قازىرگى تاڭدا ەل تۇرعىندارىنىڭ سيفرلىق ساۋاتتىلىعىنىڭ بازالىق دەڭگەيى 77 پايىزدى قۇرايدى. جىل سوڭىنا دەيىن بۇل كورسەتكىشتى 78,5 پايىزعا جەتكىزۋ جوسپارلانىپ وتىر.