ءجۇز وقۋلىق: ەل يگىلىگى جولىندا قولعا الىنعان بىرەگەي جوبا
قىزىلوردا قالاسىنداعى «بولاشاق» ۋنيۆەرسيتەتى جانىنداعى عىلىمي- زەرتتەۋ ينستيتۋتىنىڭ ديرەكتورى، ساياسي عىلىمدار كانديداتى مۇرات ناسىموۆ وسىلاي ءمالىم ەتتى، دەپ حابارلايدى قازاقپارات ءتىلشىسى.
ونىڭ ايتۋىنشا، ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا جۇزەگە اسىرىلىپ جاتقان «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى جاستار ءۇشىن كەمەل كەلەشەككە نەگىز قالاعان وڭ باستاما دەپ ساناۋعا تولىق نەگىز بار.
«الەمنىڭ بۇگىنگى دەمىنە ءۇڭىلىپ كورسەك، ءبىلىمدى مىڭدى جىعاتىن كەزەڭنىڭ كەلگەنىن ايقىن اڭعارتىپ وتىر. قاي سالانى الىپ قاراساڭىز دا، وسىنداي تىنىس-تىرشىلىك تالابىن تۇسىنۋگە بولادى. ءبىزدىڭ قازاقستان مەملەكەتى تاۋەلسىزدىكتىڭ العاشقى جىلدارىنان باستاپ دۇنيە جۇزىندەگى وزىق ەلدەردىڭ قاتارىنا قوسىلۋعا بارىنشا كۇش سالىپ كەلەدى. بۇگىنگى تاڭدا بۇل باعىتتا قول جەتكەن تابىستارىمىز كوپ. بۇل ورايدا عىلىم سالاسىنىڭ الاتىن ورنى ايرىقشا»، - دەيدى مۇرات ناسىموۆ.
ونىڭ ايتۋىنشا، جۇيەلى ءبىلىم الۋعا نەگىز بولاتىن جاڭا وقۋلىقتار - «رۋحاني جاڭعىرۋ» باعدارلاماسىنداعى بۇگىنگى بۋىن وكىلدەرىنىڭ بولاشاعى ءۇشىن قولعا الىنعان بىرەگەي جوبا.
«القالى جيىن بارىسىندا ەلباسى مۇنداي كەشەندى باعدارلامانىڭ جۇزەگە اسۋى الەم ەلدەرىندە سيرەك كەزدەسەتىنىنە نازار اۋداردى. بولاشاعىنىڭ باياندى بولۋىن ماقسات تۇتقان قازاقستان وسى باعىتتا ورايلى ءىستى قولعا الىپ وتىر. ايتا كەتەرلىگى، بۇگىندە حالىق تاراپىنان قىزۋ قولداۋ تاپقان «رۋحاني جاڭعىرۋ» باعدارلاماسى - بۇگىنگى بۋىن وكىلدەرىنىڭ بولاشاعى ءۇشىن قولعا الىنعان بىرەگەي جوبا. ۇلان- عايىر اتىراپتا ورىن تەپكەن ۇلى دالا ەلىندە ۇرپاعىمىز ۇلىق تۇتار قاستەرلى ورىندار، تاريحي مەكەندەر، ەڭسەلى ەسكەرتكىشتەر بار. قانشاما داۋىرلەردىڭ ءىزى قالعان بايتاق دالامىزدىڭ ۇلى قاسيەتتەرىن سەزىنىپ وسكەن بۇگىنگى ۇرپاق ەندى سول تۋعان ەلدىڭ تۋىن بيىكتە ۇستاۋ جولىندا تىنىمسىز تەر توگۋى ءتيىس»، - دەيدى مۇرات ناسىموۆ.
ادىلەت قاڭتاربايەۆ