قازاقستاننىڭ ءانشى-ارتىستەرى قازاق كۇرەسىنەن ءوزارا مىقتىنى انىقتايدى

قوستاناي. قازاقپارات - قوستانايدا ونەر ادامدارىنىڭ اراسىندا قازاق كۇرەسىنەن جارىس وتەدى، دەپ حابارلايدى «قازاقپارات» ح ا ا ءتىلشىسى.

وبلىستىق مادەنيەت باسقارماسىنىڭ باسشىسى ەرلان قالماقوۆتىڭ ايتۋىنشا، مۇنداي شارا وڭىردە تۇڭعىش رەت وتكىزىلگەلى وتىر. جارىس ءساۋىر ايىنىڭ سوڭىنا قاراي جوسپارلانعان.

«قوستانايداعى قازاق دراما تەاترىنىڭ ءارتىسى تولەندى ءالقوجا ونەر ادامدارىنىڭ اراسىندا سپورت باسەكەسىن وتكىزۋ تۋرالى ۇسىنىسپەن كەلدى. ءبىز بۇل يدەيانى قولدادىق. ءبىر جاعىنان «ونەر بارىسى» قايىرىمدىلىق ءۇشىن ۇيىمداستىرىلادى. جارىسقا قاتىسۋشىلار مەن كورەرمەندەردەن تۇسكەن قارجى «جيزن نا لادوني» قايىرىمدىلىق قورىنا جىبەرىلىپ، مۇمكىندىگى شەكتەۋلى جاندارعا كومەك رەتىندە بەرىلەدى. كۇرەس قاتىسۋشىلارىنا مادەنيەت باسقارماسى ەستەلىك سىيلىقتار تاپسىرادى»، - دەدى ە. قالماقوۆ.

جارىستىڭ وتكىزىلۋ بارىسى مەن شارتتارى تۋرالى اگەنتتىك تىلشىسىنە تولەندى ءالقوجا ايتىپ بەردى. ونىڭ سوزىنشە، «ونەر بارىسى» - وڭىردە قازاق كۇرەسىن ناسيحاتتاۋدىڭ ءبىر جولى.

«ءبىز وتكىزگەلى وتىرعان بۇل جارىستى «رۋحاني جاڭعىرۋدى» ىسپەن كورسەتۋدىڭ ۇلگىسى دەر ەدىم. ويتكەنى، ەلباسى ايتقان ۇلتتىق كود ءوزىمىزدىڭ رۋحانياتىمىزبەن استاسىپ جاتىر. وسى تۇستا ۇلتتىق ونەرىمىز - قازاق كۇرەسىنىڭ كەڭىنەن دارىپتەلۋى قۇپتارلىق ءىس دەپ ويلايمىن. راسىن ايتۋ كەرەك، قامكوڭىل جاندارعا كومەك كورسەتۋدى ەكىنىڭ ءبىرى جاساي بەرمەيدى. سول ءۇشىن دە رۋحاني سىلكىنىس كەرەك سەكىلدى. ءار ادام وزىنەن باستاۋى ءتيىس. ءبىر جاعىنان، مادەنيەت سالاسىندا جۇرگەن جىگىتتەردىڭ سپورتتان الشاقتاپ كەتپەۋىنە دە ۇلەس قوسقىمىز كەلدى. ءبىزدى قولداعان بيلىك وكىلدەرىنە العىس مول»، - دەيدى يدەيا اۆتورى.

تولەندى ءالقوجا ايتقانداي، ونەرپازدار 65 كەلىگە دەيىن جانە ودان جوعارى سالماقتا سىنعا تۇسەدى. جارىسقا 20-40 جاس ارالىعىنداعى اۋەسقوي سپورتشىلار قاتىستىرىلادى. ولاردىڭ اراسىندا تەاتر جانە كينو ارتىستەرى بار. بۇعان قوسا، «ونەر بارىسىنا» ەلىمىزگە تانىمال انشىلەر شاقىرتىلدى. ال تورەشىلەر قۇرامىن وبلىستىق سپورت باسقارماسى بەكىتەدى.