استاناداعى «كەرۋەن سيتي» ساۋدا ءۇيى جابىلىپ قالۋى مۇمكىن

None
None
استانا. قازاقپارات - استاناداعى ءىرى ساۋدا ورتالىقتاردىڭ ءبىرى «كەرۋەن سيتي» جابىلىپ قالۋى مۇمكىن   

بۇل تۋرالى قازاقپارات ك ت ك- عا سىلتەمە جاساپ حابارلايدى.

ىشكى ىستەر مينيسترلىگى ءورت قاۋىپسىزدىگى بويىنشا ءىرى ساۋدا نىساندارىندا جۇرگىزىلىپ جاتقان تەكسەرۋ ناۋقانىنىڭ دەرەكتەرىن تاعى ءبىر جاريا ەتتى.

ءساۋىردىڭ ەكىسى مەن 13 ى ارالىعىندا ەل اۋماعىندا 460 تەكسەرۋ اياقتالىپ، 6081 ەرەجە بۇزۋشىلىق انىقتالىپتى. سونىڭ ىشىندە ءبىر ايتقانعا قۇلاق اسپاعان ساۋدا ورنى باس وردادان شىقتى. استانانىڭ قاق ورتاسىندا تۇرعان KeruenCity ساۋدا ءۇيى ءورت قاۋىپسىزدىگىن ساقتاماي، ەكىنشى قايتارا كوزگە تۇسكەنى ءۇشىن ماماندار ءىستى سوتقا جولداعان. ەندى سوت ەڭ كەمى ەكى جارىم ميلليون تەڭگە ايىپپۇل سالۋى مۇمكىن. نەمەسە جاۋىپ تىنادى.

«قازىرگى ۋاقىتتا قايتارا تەكسەرۋ جۇرگىزىپ، كىنارات تابىلعان KeruenCity ساۋدا، ويىن- ساۋىق ورتالىعىنىڭ ءىسىن اكىمشىلىك سوتقا جىبەردىك. ەندى اكىمشىلىك ايىپپۇل سالا ما، الدە جاۋىپ تاستاي ما، ونى سوت شەشەدى»، - دەدى ق ر ءى ءى م- نىڭ ورىنباسارى يۋري يلين

ساۋدا ورتالىعىنان بىلتىر 16 بىردەي ولقىلىق شىعىپ، سونى تۇزەۋ جونىندە ەسكەرتۋ العان ەكەن. ءبىراق، اقشاعا سەمگەن بيزنەسمەندەر بۇل تالاپتى ۋاقىتىلى ورىنداۋعا اسىقپاعان. ەندى كەلىپ باسىنا بۇلت ۇيرىلگەندە ايىپپۇلدى تولەيمىز، ءبىز ءبارىن جوندەدىك دەپ «تۇستەن كەيىن»... ايتىپ جاتىر.

«بارلىعى دەرلىك دۇرىستالدى. قايتارا تەكسەرۋ بارىسىندا تەك ەكى ەسكەرتپە عانا ورىندالماي قالعان بولاتىن. دايىن ونىمدەر قوياتىن الاڭقايىمىز بوس بولماي جانە شىعۋ جولدارىندا كەدەرگىلەر بولعان. قازىر ولار دا تۇزەتىلدى. سوندىقتان، بىزدە ەشقانداي كەمشىلىك جوق»، - دەدى «KeruenCity» ساۋدا ورتالىعىنىڭ ءورت قاۋىپسىزدىگى ينجەنەرى قانات ىدىرىسوۆ.

جالپى، ستاتيستيكا بويىنشا، ءىرى ساۋدا ۇيلەرى قاراعاندى وبلىسىندا كوپ ەكەن - 171 نىسان. توتەنشە جاعداي وكىلدەرى دە قاۋىپ وسى وبلىستا كوپ دەيدى.

ال استانانىڭ اكىمى اسەت يسەكەشەۆ بۇگىن توسىننان باستاما كوتەردى. تەكسەرۋدىڭ كوبەيۋى كوررۋپتسياعا اكەلەدى دەگەن بيزنەسمەندەردىڭ ۋاجىنە قاراماستان، شاعىن بيزنەس نىساندارىنا دا باقىلاۋدى كۇشەيتۋ كەرەك دەيدى. ىشكى ىستەر مينيسترلىگىنىڭ بۇيرىعى بويىنشا، جالپى اۋدانى مىڭ جارىم شارشى مەتردەن اساتىن نىساندار تەكسەرۋگە جاتادى. ال كولەمى ودان كىشى، ءبىراق جۇرت كوپ شوعىرلاناتىن جەرلەردى ەشكىم تەكسەرە المايدى. استانا قالاسىنىڭ اكىمى اسەت يسەكەشەۆ وسىعان اشىنادى.

«شاعىن كافەلەر، كومپيۋتەرلىك كلۋبتار مەن تۇنگى كلۋبتاردى ءبىز تەكسەرە المايمىز. ولاردى تەكسەرسەك، ءوزىمىزدى جاۋاپقا تارتۋى مۇمكىن. سوندىقتان ءبىز كاسىپكەرلەردىڭ نازارىن اۋدارتقىمىز كەلەدى. ويتكەنى، ءورت قاۋىپسىزدىگىن ءبارى بىردەي ءجىتى ساقتاپ وتىرعان جوق»، - دەدى اسەت يسەكەشەۆ.

 اكىم ول ءۇشىن ەكى نۇسقا ۇسىنادى. ءبىرى - مەملەكەتتىك باقىلاۋدى قولعا الۋ. ەكىنشىسى ءوز- ءوزىن رەتتەۋ مەحانيزمى. ياعني، شاعىن كاسىپكەرلەر عيماراتتىڭ ءورت قاۋىپسىزدىگىن ءوزى رەتتەپ وتىرۋى كەرەك.

سوڭعى جاڭالىقتار