ۇرىمجىگە قازاق دياسپوراسىنىڭ ماسەلەسىن تالقىلاۋ ءۇشىن بارامىن - ۆيتسە-مينيستر
بۇل تۋرالى بۇگىن ول ماجىلىستەگى ۇكىمەت ساعاتىندا ايتتى، دەپ حابارلايدى قازاقپارات.
ايتا كەتەرلىگى، ۇكىمەت ساعاتى بارىسىندا ءماجىلىس دەپۋتاتى بەكبولات تىلەۋحان قازاقستانعا كەلىپ ازاماتتىق الا الماي جۇرگەن قانداستارىمىزدىڭ جاعدايىن ايتقان بولاتىن.
«راسىندا بەكبولات قاناي ۇلى كوتەرگەن ماسەلە ورىندى. تاريحي وتانىنا قايتامىن دەگەن قازاقتار شەتەلدە كوپ. وزدەرىڭىز بىلەسىزدەر، ءبىزدىڭ تاراپتان دا قولدان كەلگەنشە جاعداي جاسالىپ جاتىر. ماسەلەن، بىلتىر دۇنيەجۇزى قازاقتارىنىڭ قۇرىلتايىندا ەلباسىمىزعا قىتاي قازاقتارىنا قاتىستى ماسەلە ايتىلدى. ولارعا جەڭىلدىكپەن ازاماتتىق الۋ كەزىندە ءبىراز قۇجاتتار قيىندىق تۋدىرادى ەكەن. ەلباسىمىزدىڭ تاپسىرماسى بويىنشا ىشكى ىستەر مينيسترلىگى سول قۇجاتتاردان باس تارتتى، تالاپ ەتپەيتىن بولدى»، - دەدى ءبىرىنشى ۆيتسە-مينيستر.
دەگەنمەن، ونىڭ ايتۋىنا قاراعاندا، بۇگىندە بۇل ماسەلە باسقا ماسەلەگە اينالىپ شىعا كەلگەن.
«مىسالى قىتايدان كەلگەن قازاقتار جەڭىلدىكپەن ازاماتتىق الادى. ودان كەيىن قىتاي ەلشىلىگىنە بارىپ ءتولقۇجاتتارىن تاپسىراتىن. ال ءۇرىمجى جاققا قايتىپ بارعان كەزدە ولار تۇراقتى تىركەۋدەن شىقپاعاندىقتان قامالىپ جاتىر. ويتكەنى ولار تۇراقتى تىركەۋدەن شىقپاعاننان كەيىن قوسىمشا الەۋمەتتىك تولەمدەر الىپ وتىر. جەرگىلىكتى بيلىك سوعان تىيىم سالماق. مىنە وسىندا ماسەلەلەر تۋىنداۋدا»، - دەدى ول.
وسى رەتتە ۆيتسە-مينيستر شەتەلدەن كەلگەن قانداستارىمىزدىڭ ازاماتتىق الۋلارىنا جەڭىلدىك جاساۋ ماسەلەسىن جان-جاقتى قاراستىرۋ قاجەتتىگىن باسا ايتتى.
«سول ەلدەگى تالاپتارعا قايشى كەلمەيتىندەي جاساۋىمىز كەرەك. جالپى جوعارىدا ايتقان ماسەلەگە قاتىستى قىتاي ۇكىمەتىمەن كەلىسسوزدەر وتكىزىپ جاتىرمىز. مەن ەرتەڭ ۇرىمجىگە ساپارلاماقپىن. سول جاقتاعى قازاق دياسپوراسى ماسەلەسىن تالقىلاۋ ءۇشىن رەسمي ساپارمەن بارامىن»، - دەدى مۇحتار تىلەۋبەردى.
شەتەلدەن كەلگەن قانداستارىمىزدىڭ ازاماتتىق الۋىنا ءبىرقاتار جەڭىلدىك جاسالعانىن ىشكى ىستەر ءمينيسترى قالمۇحانبەت قاسىموۆ دا ايتتى.
«دەگەنمەن، ورالمان مارتەبەسىن العاننان كەيىن ءبىر جىلدىڭ ىشىندە بىزگە ارىز بەرىپ، ازاماتتىعىن الۋى كەرەك. ولار كوبىنە ءبىر جىلدىڭ ىشىندە جۇگىنبەيدى، 15-17 ايدان كەيىن ارىز بەرەدى. سوندىقتان ءبىز ولاردى قايتارامىز. قازىر ءبىز زاڭعا وزگەرىستەر ەنگىزەيىك دەپ جاتىرمىز. سوندا ارىز بەرۋ مەرزىمىن ۇزارتىپ، جەڭىلدىك جاسايتىن بولامىز»، - دەدى قالمۇحانبەت قاسىموۆ.