كوشى-قون باقىلاۋىنىڭ ءبىرتۇتاس اقپاراتتىق بازاسىن جاساۋ قاجەت - ءماجىلىس دەپۋتاتى
بۇل تۋرالى بۇگىن ماجىلىستەگى ۇكىمەت ساعاتىندا دەپۋتات نۇرلان ءابدىروۆ ايتتى، دەپ حابارلايدى قازاقپارات.
دەپۋتاتتىڭ پايىمىنشا، كوشى-قون لەگىن ناقتى ۋاقىت رەجىمىندە باقىلاۋ مۇمكىندىگىنىڭ جوقتىعى كوشى- قون سالاسىنداعى پروبلەمالاردىڭ ءبىرى بولىپ تابىلادى.
«مىسالى، ىشكى ىستەر مينيسترلىگى مەن ۇلتتىق قاۋىپسىزدىك كوميتەتىنىڭ اقپاراتتىق جۇيەلەرى ءوزارا ءتيىستى تۇردە ينتەگراتسيالانباعان. ولاردىڭ ءارقايسىسى جەكەلەپ العاندا قۇقىق قورعاۋ ورگاندارىنىڭ كوزىنە تۇسپەگەن كوشىپ كەلۋشىلەردىڭ جاساعان قۇقىق بۇزۋشىلىقتارىن تالداۋ جولىمەن انىقتاۋعا مۇمكىندىك بەرمەيدى»، - دەدى ول.
وسىعان وراي دەپۋتات ىشكى ىستەر مينيسترلىگى مەن ۇلتتىق قاۋىپسىزدىك كوميتەتىنىڭ ءبىرتۇتاس اقپاراتتىق بازاسىن جاساۋ قاجەتتىگىن نازار اۋداردى.
«وسىعان بايلانىستى، كوشى- قون باقىلاۋىنىڭ ءبىرتۇتاس اقپاراتتىق بازاسىن جاساۋ قاجەت. بۇل بازادا بۇزۋشىلىقتاردى انىقتاۋدىڭ اۆتوماتتاندىرىلعان الگوريتمدەرى، سونداي- اق بەلگىلى ءبىر اكىمشىلىك- اۋماقتىق بىرلىكتە جۇرگەن شەتەلدىكتەر مەن ازاماتتىعى جوق ادامداردىڭ ساندىق جانە ساپالىق قۇرامىن ايقىنداۋ مۇمكىندىگى بولۋعا ءتيىس»، - دەدى نۇرلان ءابدىروۆ.
ايتا كەتەيىك، نۇرلان ءابدىروۆ 2017 -جىلى قازاقستاندا قوسارلانعان ازاماتتىعى بار شامامەن 600 ادام جازاعا تارتىلعانىن ايتقان بولاتىن.
سونىمەن قاتار ونىڭ دەرەگىنشە، قازاقستانعا كەلگەن شەتەلدىكتەردىڭ تەڭ جارتىسى ۋاقىتشا تىركەۋگە تۇرمايدى.