مۇحتار شاحانوۆ قاپىدا ايىرىلعان العاشقى ماحابباتى تۋرالى سىر شەرتتى

استانا. قازاقپارات - حالىق اقىنى مۇحتار شاحانوۆ باعدارلاماسىنا سۇحبات بەرىپ، ءبىراز جايدىڭ باسىن اشتى

اقىن پويىزدان سەكىرىپ قازا بولعان العاشقى ماحابباتى، ءۇش ايەل العانى، بالالارى مەن نەمەرەلەرى تۋرالى ايتىپ، اباي مەن ماحامبەت، جازۋشىلار وداعى جايلى پىكىر بىلدىرگەن. سۇحباتتىڭ ىقشامدالعان نۇسقاسىن نازارلارىڭىزعا ۇسىنامىز.

- ءوز بالالارىڭىزدىڭ بويىنا ۇلتتىق تاربيەنى سىڭىرە الدىڭىز با؟

- بۇرىن الماتى قالاسىندا جالعىز عانا قازاق مەكتەبى بولدى. سوندا مەن قالانىڭ ءبىر شەتىندە تۇرامىن. بالام قازاق مەكتەبىندە وقىسىن دەپ قالانىڭ ەكىنشى شەتىندەگى مەكتەپكە بەردىم. ءوزىنىڭ ۇلتتىق نەگىزىنە تامىر جىبەرە الماسا، انا تىلىندە سويلەي الماسا ول مەنىڭ بالام ەمەس، مەنىڭ نەمەرەم ەمەس دەگەن ۇستانىمعا توقتادىم. سوندىقتان دا مەنىڭ نەمەرەلەرىمنىڭ بارلىعى قازاقشا بىلەدى.

- جازۋشىلار وداعىنان ءوزىڭىزدى جوعارى قوياسىز با؟ الدە ساناساتىن ساتتەرىڭىز بولا ما؟

- جازۋشىلار وداعىنا قاراپ قالعان كۇنىم جوق. تەك شىندىق ءۇشىن عانا جاعالاسىپ جۇرگەن جايىم بار. جازۋشىلار وداعىنىڭ 800 گە جۋىق مۇشەسىنىڭ 8 ى عانا ۇلتتىق مۇددە جولىنداعى كۇرەستە بىزبەن بىرگە بولعان ەدى. قالعانىنىڭ ءسوزى ءبىر باسقا، ءىسى ءبىر باسقا. مۇشەلىككە ءوتۋ ءۇشىن دە اقشا تولەگەن كەزدەر بولعان. جارتىكەش جۋرناليستەردىڭ بارلىعى مۇشە بولىپ العان. جازۋشىلار وداعىنىڭ جاقىندا بولعان قۇرىلتايىنداعى مەنىڭ سوزدەرىمدى بۇرمالاپ جەتكىزگەن. مەن «ۇلتتىق مۇددەگە كەلگەندە ورازالين قورازالين بولمادى. تاۋىقالين ءشوجاليننىڭ دەڭگەيىندە سامعادى» - دەدىم. سونى بۇرمالاپ جىبەرگەن.

ال ابايدىڭ جىرى بيىك تۇرعانىمەن، ماحامبەتتى ءىسى ءۇشىن ابايدان بيىك قويامىن. باسىمدى كەسىپ الساڭدار دا شىن ءسوزىم وسى. ماحامبەت شىندىق ءۇشىن، ۇلتتىق مۇددە ءۇشىن باسىن بەرگەن. ماحامبەت ۇلكەن كۇرەسكەر.

- ابايدا بەسەۋ، پۋشكيندە 113، سىزدە نەشە ماحاببات بار؟ ەۆەرەستىڭ بيىگىنە شىعا الدىڭىز با؟

- اباي تاعدىر قوسقان بەس ايەلدىڭ ىشىنەن ساناسىنا ساي كەلەتىن ادام تاپپادى. پۋشكين تانىسقان 113 قىزدىڭ ىشىنەن دە ءوزىنىڭ ساناسىنا ساي كەلەتىن ادام تابىلمادى. 113 مىڭ قىزبەن تانىسسا دا ول ادامدى تاپپاس ەدى. ويتكەنى ماحاببات دەگەنىمىز ەكى ادامنىڭ سانا بيىگىندە جولىعۋى. ول ىلۋدە بىرەۋ بولاتىن دۇنيە. ءوزىم ءۇش ايەل الدىم. قازىر ءۇشىنشى ايەلىممەن تۇرىپ جاتىرمىن. ءبىراق سول سانا بيىگىندە جولىعاتىن ايەل ماعان دا جولىقپادى. ەۆەرەستىڭ شىڭىنا شىعا المادىم. باعىڭ دا، سورىڭ دا ايەلدەن. وزىڭە ساي ادام جولىقپاعاننان كەيىن تاعدىرىڭ سولاي بولادى. بۇل وتە كۇردەلى ماسەلە. مەنىڭ كۇلاندا دەگەن ەرەكشە قىزىم بولدى. تۇلكىباس جاقتا تۇراتىن. بۇرىن سول جەرگە پويىز توقتايتىن. كەيىن توقتامايتىن بولىپتى. ونى ايتپاعان. سودان كەيىن بۇلار سەكىرگەن. سەكىرگەندە پويىزدىڭ استىنا ءتۇسىپ كەتكەن. قاسىنداعى قىز اياعىن سىندىرعان. ايتپەسە ول ماعان ەرەكشە قىز بولىپ جولىعىپ ەدى. كۇلاندا ءتىرى بولسا ەۆەرەستىڭ شىڭىنا شىعىپ قالۋىم ابدەن مۇمكىن ەدى.

- اتاعىڭىز، ابىرويىڭىز جەتەدى. ال جيعان-تەرگەن اقشاڭىز بار ما؟

- مەن تازا كەلە جاتىرمىن. وتكەندە ەكى-ءۇش اي پاتەراقىمدى تولەي الماي ءجۇردىم. تەك ايلىقپەن عانا كۇن كورەمىن. «جالىن» جۋرنالىنان 130 مىڭ تەڭگە ايلىق الامىن. سوڭعى بىرنەشە اي بولدى الماي ءجۇرمىن. اقشا جوق.

دەرەككوز: Reactor