ەلباسى اۋدارىلعان كىتاپتار جونىندە: مۇنداي وقۋلىقتارمەن قازاق بالاسى ءالى تانىسپاعان

None
None
استانا. قازاقپارات - استاناداعى نازاربايەۆ ورتالىعىندا «قازاق تىلىندەگى 100 جاڭا وقۋلىق» جوباسى اياسىندا اۋدارىلعان العاشقى كىتاپتاردىڭ تانىستىرىلىمى باستالدى.

سالتاناتتى شاراعا ق ر پرەزيدەنتى نۇرسۇلتان نازاربايەۆ قاتىسۋدا، دەپ حابارلايدى قازاقپارات ءتىلشىسى.

ايتا كەتكەن ءجون، ن. نازاربايەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنىڭ جاريالانعانىنا ءبىر جىل تولىپ وتىر. سونىڭ ىشىندە «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى دا بار. وسى ۋاقىتقا دەيىن اتالعان جوبا اياسىندا فيلوسوفيا، ءدىنتانۋ، انتروپولوگيا جانە جۋرناليستيكا بويىنشا 18 كىتاپ پەن وقۋ قۇرالى جارىققا شىقتى. ءاربىر وقۋلىق 10 مىڭ دانامەن باسىلىپ، الداعى ءبىر ايدىڭ ىشىندە جوعارى وقۋ ورىندارى مەن كىتاپxانالارىنا تاراتىلادى. بيىلدان باستاپ وقۋ باعدارلاماسىنا دا ەنگىزىلەدى. سونداي- اق، بارلىق وقۋلىقتاردىڭ ەلەكتروندى نۇسقالارى جانە سونىڭ نەگىزىندە ازىرلەنگەن بەينەدارىستەر توپتاماسى قازاقستاننىڭ اشىق ۋنيۆەرسيتەتى پلاتفورماسى (OpenU.kz) ارقىلى تاراتىلاتىن بولادى.

«نەگىزى، كىتاپتاردىڭ بارلىعى مەنىڭ ۇستەلىمدە جاتىر. ءبىر اپتادان بەرى وتىرىپ، ءبارىن پاراقتاپ، ءبىز وقىعان كەزدە قولعا تيمەگەن دۇنيەلەر ەكەنىنە كوزىم جەتتى. مەنەدجمەنت بولسىن، باسقارۋ بولسىن، ءبارىن ءبىلىپ- تانىپ جاتىرمىز عوي. ءبىراق مىناۋ پسيحولوگيا، ءتىل تاريحى سياقتى عىلىم سالالارىمەن تەرەڭ تانىسقانىمىز جوق. اعىلشىن تىلىندە وقىعان جاستارىمىز وقىعان شىعار. ءبىراق قازاقتىڭ بالاسى ءالى تانىسپاعان. سوندىقتان ءبىز ءبىر جاعىنان قازاق ءتىلىن بايىتىپ، ەكىنشى جاعىنان ءبىلىمدى ودان ارى وسىرەمىز دەپ، وسى جوبانى قولعا الىپ وتىرمىز»، - دەدى ەلباسى تۇساۋكەسەر راسىمىندە.

«قازاق تىلىندەگى 100 جاڭا وقۋلىق» جوباسىن ىسكە اسىرۋ ماقساتىندا ۇكىمەتتىك ەمەس جانە كوممەرتسيالىق ەمەس نەگىزدە جۇمىس ىستەيتىن «ۇلتتىق اۋدارما بيۋروسى» قوعامدىق قورى قۇرىلدى. الەمنىڭ جەتەكشى باسپالارىمەن بايلانىس جاسالدى. العاشقى 18 وقۋلىقتىڭ گلوسساريلەرى نەگىزىندە 3 مىڭنان استام عىلىمي تەرميندەر مەن ۇعىمدار جينالدى. سولاردىڭ ۇشتەن ءبىرى قولدانىسقا جاڭادان ەنگىزىلىپ وتىر. وقۋلىقتاردىڭ ءتىزىمى مەن جوبا تۋرالى تولىق اقپاراتتى www.100kitap.kz سايتىنان الۋعا بولادى.

 

 

سوڭعى جاڭالىقتار