قاراعاندىلىق زەينەتكەر ءتورت جىل بويى ۇيىنەن شىقپاعان

None
None
قاراعاندى. قازاقپارات - قاراعاندى وبلىسىنىڭ اقتاس كەنتىندە جالعىزباستى كەيۋانا پاتەرىنەن 4 جىل بويى دالاعا شىقپاعان، دەپ حابارلايدى قازاقپارات ءتىلشىسى.

2013 -جىلى زەينەتكەر الەفتينا شەرباكوۆانى ارالاسىپ جۇرگەن كورشىسى كۇتپەك بولىپ قامقورشىلىققا الۋ قۇجاتىن راسىمدەتىپ العان. وسىدان كەيىن كورشىسى جالعىزباستى قاريانىڭ زەينەتاقىسىن الىپ وتىرعان، ءارى ونى دالاعا شىعارماي سىرتىنان كىلتتەپ كەتەتىن بولعان. قاريانىڭ دەنەسىنىڭ ءبىر جاق بولىگى سال بولىپ قالعاندىقتان قىبىرلاپ ءۇي ىشىندە ازەر جۇرەدى. ءتورت جىل بويى ءوز ۇيىندە قاماۋدا بولعان قاريا وزىنە كورشىسى تاراپىنان قىسىم جاسالعانىن ايتادى.

«نەگە زەينەتاقىمدى ۇيگە اكەلىپ بەرمەيدى دەپ بارلىعىنان سۇراپ شىقتىم. ەشكىم ەشتەڭە بىلمەيدى، ايتپايدى. ال مىنا الاياقتار مەنىڭ اقشامدى الىپ وتىرىپتى. كەيىن ءبىر جولى كەلگەندە زەينەتاقىمدى سۇراپ ەدىم، ول ماعان قاتتى ايعايلاپ، ايتپاعان ءسوزى قالمادى. سوسىن قاتتى قورقىپ قايتىپ سۇرامايتىن بولدىم. ول ماعان مىنا جەرگە ىشەتىن سۋ قويىپ كەتەدى، سوسىن كۇندە سۋعا پىسكەن بوتقا اكەلىپ بەرەدى»، - دەيدى تىل ارداگەرى الەفتينا شەرباكوۆا.

زەينەتكەردىڭ ايتۋىنشا بۇل باسپاناعا كورشىسى وزگە كورشىلەرىن «مەنىڭ پاتەرىم» دەپ جولاتپاي قويىپتى. تەك وسى جىلدىڭ قاڭتار ايىندا قاريانىڭ مۇشكىل ءحالىن كورىپ جۇرگەن كورشىلەرى شۋ شىعارىپ، اراشا تۇسكەن.

2013 -جىلدان بەرى زەينەتكەردىڭ ۇيىنە الەۋمەتتىك كومەك كورسەتەتىن ماماندار دا باس سۇقپاعان.

«كورشىسى كومەكتەسەتىن بولعان سوڭ بۇل قاريا ءبىزدىڭ كومەكتى الۋدان باس تارتقان. ەگەر قاريانى بىرەۋ كۇتىپ قارايتىن بولسا، ءبىزدىڭ مۇندا كەلۋگە قاقىمىز جوق. 25 جىل وسى سالادا ءجۇرمىن مۇنداي ۇلكەن كىسىگە قىسىم كورسەتكەن جاعدايدى ءبىرىنشى رەت كورىپ وتىرمىن»، - دەيدى اقتاس كەنتىنىڭ ۇيدە الەۋمەتتىك كومەك كورسەتۋ ءبولىمىنىڭ مامانى ليۋدميلا لۋكوۆەتس.

بۇگىندە كەيۋاناعا اراشا تۇسكەن وزگە كورشىلەر ادۆوكاتتىڭ كومەگى ارقىلى سوتقا جۇگىنگەن. جالعىزباستى قاريا سوتتان پاتەردى سىيعا تارتۋ بويىنشا جاسالعان قۇجاتتىڭ كۇشىن جويۋدى جانە ءتورت جىل بويى قولىنا تيمەگەن زەينەتاقىنى كورشىسىنىڭ كەرى قايتارۋىن تالاپ ەتىپ وتىر.

زەينەتكەردىڭ سوزىنشە، كورشىسى 2013 -جىلدان 2018 -جىلدىڭ قاڭتارىنا دەيىن 2 ميلليون 500 مىڭ تەڭگە زەينەتاقىسىن قالتاسىنا باسقان.

بۇگىندە سوت پروتسەسسى جالعاسۋدا.

 ارايلىم ساتىبالدى قىزى

سوڭعى جاڭالىقتار