ەلوردا جاستارى ۇيىمداستىرعان فلەشموبتا «رۋحاني جاڭعىرۋ» لوگوتيپى بەينەلەندى

استانا. قازاقپارات - مەملەكەت باسشىسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ ءبىر جىلدىعىنا ارناپ فلەشموب وتكىزىلدى، دەپ حابارلايدى ەلوردا اكىمدىگىنىڭ رەسمي سايتى.

استانا قالاسى اكىمدىگىنىڭ «قوعامدىق دامۋ ىستەرى باسقارماسى» مەملەكەتتىك مەكەمەسى «استانا جاستارى» جاستار رەسۋرستىق ورتالىعىمەن بىرلەسىپ، ەلباسى ن. ءا. نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ 1 جىلدىعىنا ارناپ فلەشموب وتكىزدى.

ءىس-شاراعا «قازاقستاننىڭ 100 جاڭا ەسىمى» جوباسىنىڭ جەڭىمپازدارى، بلوگەرلەر، استانا قالاسىنىڭ ورتا ارناۋلى وقۋ ورىندارىنىڭ بەلسەندى ستۋدەنتتەرى مەن جالپى ورتا مەكتەپتىڭ وقۋشىلارى، سونداي-اق «استانا جاستارى» جاستار رەسۋرستىق ورتالىعىنىڭ ەرىكتىلەرىنىڭ قاتىسۋىمەن وتكەن شارادا 300 گە جۋىق قاتىسۋشى «رۋحاني جاڭعىرۋ» باعدارلاماسىنىڭ بەلگىسى بولعان قىران قۇس پەن «Qazaqstan» جازۋلارىن بەينەلەدى.

«رۋحاني جاڭعىرۋ» باعدارلامالىق ماقالاسى - ۇلتىمىزدىڭ بارلىق سالت-داستۇرلەرىن، ءتىلىمىز بەن تاريحىمىزدى ۇمىتپاي جاڭاشىلدىققا ىلەسۋ ءۇشىن باعدار سىلتەۋ دەپ ويلايمىن. جاستار مەملەكەتتىك ساياساتتىڭ جۇزەگە اسۋىنا قولداۋ كورسەتۋگە ءارقاشان دايىن. ءبىزدىڭ ورتالىق باعدارلامالىق ماقالادا كورسەتىلگەن باعىتتار بويىنشا 6 ءىرى جوبانى جۇزەگە اسىرۋدا. جاستاردى دۇرىس باعىتتا تاربيەلەۋ جولىندا باعدارلامانىڭ الار ورنى ۇلكەن. جاستاردىڭ كەمەل بولعانى بۇل جەكە ازاماتتارىمىز ءۇشىن دە، ءاربىر جەكە تۇلعادان قۇرالعان قوعام، تۋعان ەلىمىز ءۇشىن دە وتە ماڭىزدى ۇدەرىس»، - دەدى «استانا جاستارى» جاستار رەسۋرستىق ورتالىعىنىڭ باسشىسى مۇحامەدجان بولىسبەك.