يۋكيو ميشيما جاپون جازۋشىسى. قۇنداق - اڭگىمە

استانا. قازاقپارات - جازۋشىنىڭ اڭگىمەسىن جازۋشى- اۋدارماشى قۋاندىق شاماحاي ۇلىنىڭ تارجىمالاۋىمەن وقىرماندار نازارىنا ۇسىنىپ وتىرمىز.

 كوزى تىرىسىندە نوبەل سىيلىعىنا ءۇش مارتە ۇسىنىلعان جازۋشى ميشيما ەلىنىڭ كونستيتۋتسياسىنداعى قارۋلى كۇشتەردى قىسقارتۋ جايىنداعى تارماقتى سامۋراي سالتىنا قايشى دەپ ساناپ، نارازىلىق تانىتقان. وسىلايشا ول 1970 -جىلى قاراشانىڭ 25-ندە ءتورت سەرىگىمەن بىرگە جاپونيا ارمياسىنىڭ ورتالىق كەڭسەسىنە باسىپ كىرىپ، حاراكيري جاساپ، قارنىن جارىپ قازا تاپقان.

***

يەوشيكونىڭ كۇيەۋى ۇنەمى قاربالاس ۇستىندە. ءتىپتى، اقشامنان كەيىن دە الدە ءبىر جەدەل كەزدەسۋ وعان مىندەتتى تۇردە دايىن تۇرادى. ايەلىن ۇيىنە تاكسيمەن جونەلتىپ، ءوزى جوق بولادى. ءتۇر- ءتۇسى كەلىستى ارتيست جىگىتكە تۇرمىسقا شىققان ايەل زاتى بۇعان سەنبەسىنە امالى بار ما؟ كۇيەۋى ءار كەشتى وزىمەن بىرگە وتكىزەدى دەپ ويلاعان ايەلدىڭ ءۇمىتى اقىماقتىق بولعان شىعار. ونىمەن قويماي، باتىستىق ۇلگىدەگى ءۇي جيھازدارى، ەدەندە كەشەگىدەن قالعان، كوزگە شالىنىپ قالاتىن قان داقتارىنان ىڭعايسىزداناتىن زايىبى ۇيگە جالعىز ءوزى بارۋدان قانشالىقتى ۇرەيلەنىپ وتىرعانىن بۇل جىگىت بىلمەيدى دەيسىڭ بە؟

يەوشيكا بالا كەزىنەن وتە سەزىمتال. ول مۇنىڭ ءمىنى ەمەس، مىنەزى. ۇنەمى كوڭىلى بەيمازا كۇي كەشكەن سوڭ، ول ەشقاشان ەتەيىپ- تولىقسىپ كورگەن ەمەس. قازىر الدەقاشان بويجەتىپ ەسەيسە دە، ەتجەڭدى كەلىنشەك ەمەس، ءۇپ ەتكەن جەلگە ۇشىپ كەتەر قاڭباقتاي ارىق. جاس كەلىنشەكتىڭ كوڭىل- كۇيىندەگى وسى ءبىر السىزدىك ونىمەن كەزدەيسوق تانىسقان بارلىق ادامعا انىق اڭعارىلىپ تۇرادى.

اقشامنان بۇرىن يەوشيكو كۇيەۋىمەن بىرگە بولۋ ءۇشىن تۇنگى كلۋبقا بارعانى سول ەدى، ونىسى «الگى نارسە» تۋرالى اۋزى كوپىرە ايتىپ، دوستارىن كۇلكىگە قارىق قىپ وتىرعانىن كورىپ، شىنىمەن قورقايىن دەگەن ەدى. امەريكالىق ۇلگىمەن كيىنىپ، جاپىراقتى شىلىم بۇرقىراتىپ وتىرعان كۇيەۋى ءتىپتى وعان بەيتانىس ادامداي كورىنگەنىن قايتەرسىڭ.

«ناعىز ادام سەنگىسىز تاريح قوي!» دەپ، قويىپ ول بي ءانسامبلىنىڭ تارتىمدى قيمىلىنان اسىپ تۇسكىسى كەلگەندەي قىزىق ۇلگىمەن قولىن قيمىلداتادى.

 - ەڭبەكپەن قامتۋ ورتالىعىنىڭ جولداۋىمەن بالامىزعا جاڭا كۇتۋشى ايەل كەلدى. ەڭ الدىمەن مەنىڭ كوزىمە تۇسكەنى ونىڭ ءىشى بولدى. ءدال كيمونوسىنىڭ ىشىنە جاستىق تىعىپ العانداي قارنى قامپيعان بىرەۋ ەكەن! ول ايەل مىنا ءسىز بەن ءبىزدىڭ ءبارىمىز بىرىگىپ تاۋسا المايتىن تاماقتى جالعىز ءوزى- اق شايناماي جۇتا سالار دەگەن ويعا كەلدىم.

وسىلاي دەگەن ول ءسوزىن ارى قاراي «ءبىزدىڭ كۇرىش سالعان قابىمىزدى ءبيتىپ قانا...» - دەپ، ساۋساعىن شەرتىپ كورسەتەدى دە: «...ساۋداسىن بىتىرەدى» - دەيدى.

- تاماققا دەگەن تابەتى سۇمدىق، جۋان بەلىن «اسقازاننىڭ سوزىلۋى» دەپ تۇسىندىرەدى. الدىڭعى كۇنى ءبىزدىڭ بالالار بولمەسىنەن بىرەۋدىڭ ويبايلاعان داۋسى ەستىلدى. ءبىز ەكەۋىمىز ابىرجىپ كەتىپ، ءاي- ءشاي جوق سالىپ ۇرىپ جەتىپ بارساق، الگىمىز ەدەندە جۇرەلەپ وتىرىپ العان قارنىن قوس قولداپ ۇستاپ، ءدال سيىر سەكىلدى ىشقىنىپ وتىر- ەي. قاسىنداعى توسەك ۇستىندە ۇلىمىز قورىققاننان شەكەسىنىڭ تامىرى ودىرايعانشا باقىرىپ جىلاپ جاتىر. ول دا ەشتەڭە ەمەس، ەڭ ادەمى بولىگىن قازىر ايتامىن!

«شار جۇتىپ قويعاننان ساۋ ما ەكەن، ءوزى؟» دەپ سۇرادى، الگى دوستارىنىڭ ءبىرى، يەوشيكونىڭ كۇيەۋى سەكىلدى ارتيست جىگىت.

- سويتپەگەندە شە! ومىرىمدە كورمەگەنىمە تاپ بولىپ زارەمنىڭ ۇشقانىن ايتساڭشى. مەن اسقازاننىڭ سوزىلۋى تۋرالى اڭگىمەسىنە ابدەن سەنگەنىمدى ايتساڭشى. ءبىراق، ءبىر ءساتتى دە قالت جىبەرمەدىم. شايلىق جالعىز سىرماعىمدى استىنان سۋىرىپ الىپ، وعان ءبىر جامىلعىنى لاقتىرا سالدىم. سول ارالىقتا ول قاقپاعا قىسىلىپ قالعان تورايشا شىڭعىردى دەرسىڭ. دارىگەر كەلگەندە ونىڭ بالاسى باياعىدا شىعىپ قويعان بولاتىن. ءۇيىمىزدىڭ الگى بولمەسى لەزدە شوشقا قوراسىنا اينالىپ شىعا كەلدى!

- سولاي بولادى عوي - دەسىپ ءبارى قارقىلداپ كۇلدى.

 سول ءبىر قورقىنىشتى وقيعاعا كۋاگەر بولعان كۇيەۋى الدە ءبىر كۇلكىلى ارەكەت كورگەندەي اڭگىمەلەپ وتىرعانىن كورگەندە يەوشيكو جاعاسىن ۇستادى. ءبىر ءسات كوزىن جۇمىپ ەدى، الگى جاڭا تۋعان ءسابيدىڭ بەينەسى ەلەستەدى. ءدال قارسى الدىندا پاركەت ەدەننىڭ ۇستىندە، قان- قان بولعان گازەت قاعازىنا وراۋلى جاتقان نارەستەنىڭ ارىق ءتانى.

مۇنىڭ ءبارىن دارىگەر ادەيى جاساعانىنا يەوشيكو تولىق سەنىمدى ەدى. وسىنداي ادام توزگىسىز جاعدايدا ءبىر شيكى وكپەنى دۇنيەگە اكەلگەن انانى مازاق ەتكەندەي الگى دارىگەر كومەكشىسىنە بۇرىلىپ «بالاسىنا قۇنداق ىزدەپ اۋرە بولعانشا وقىلعان گازەتتىڭ قاعازىنا وراپ الا سالۋ الدە قايدا جەڭىل» دەگەنىن قايتەرسىڭ. دۇنيە ەسىگىن ەندى عانا اشقان جاس سابيگە سونشالىقتى سۋىق نيەت تانىتقانى يەوشيكونىڭ ءيت جىنىنا ءتيدى. بارلىق ارەكەتتەرىنە جيىركەنىشپەن قاراعان ول شكافتان سۋ جاڭا ماقتاداي جۇمساق ماتانى سۋىرىپ الىپ، ۇل بالانى قۇنداقتاپ ورىندىقتىڭ ۇستىنە اقىرىن عانا جاتقىزىپ قويعان بولاتىن.

ول كەزدە كۇيەۋى شىعىپ كەتكەن ەدى. ءوزىن تىم مەيىربان ەتىپ كورسەتپەۋ ءۇشىن بۇل تۋرالى ول كۇيەۋىنە ايتپاسا دا، وسى وقيعا ويىنان كەتپەي ورالا بەرەدى. كەشكىسىن دجاز ساز وركەسترىنىڭ اۋەنى اۋەلەپ، كۇيەۋى دوستارىمەن اڭگىمە- دۇكەن قۇرىپ وتىرعان ساتتە يەوشيكو ءۇن- ءتۇنسىز عانا الگى وقيعانى ويلاۋمەن بولدى.

ەدەننىڭ ۇستىندە ەسكى گازەتپەن ورالىپ جاتقان سول ءبىر كىشكەنتاي ۇلدىڭ كەيپى شىن مانىندە ەت دۇكەنىن ەلەستەرلىكتەي، سول ءبىر سۋرەت ساناسىنان ەشقاشان وشپەسىن جاس كەلىنشەك سەزىپ ەدى. ءوزى مولشىلىق پەن توقشىلىققا تولى ءومىر قىزىعى ورتاسىندا شالقىپ وسكەن يەوشيكو سول ءبىر شاتا بالانىڭ تىرشىلىكتە كورەر قيىندىعىن ويلاعاندا جانى اۋىرسىنادى. «سول ءبىر ۇيات ءارى ءيت تىرلىكتىڭ جالعىز كۋاگەرى مەن بولدىم عوي» دەگەن وي ساناسىندا سۋماڭداي بەرەدى.

اناسى بالاسىنىڭ گازەتكە وراۋلى جاتقانىن كورگەن دە جوق، سول سياقتى جاڭا تۋعان نارەستە ءوزى قايدان ءبىلسىن. سوندىقتان، سول ءبىر قورقىنىشتى وقيعا مەنىڭ عانا ەسىمدە ساقتالىپ قالا بەرمەك. قانشا ۋاقىت وتسە دە، بۇل قۇپيانى مەن اشپايمىن. بالا ەسەيگەن سوڭ ءوزىنىڭ قالاي دۇنيەگە كەلگەن تاريحىن بىلگىسى كەلسە دە، وعان شىندىقتى بەتىنە باسقانداي عىپ ايتار ادام تابىلماس. وسىلايشا، الدەكىمنىڭ الدىندا كىنالى سەكىلدى ەتەتىن سەزىم ىشتە ساقتاۋعا ءماجبۇر بولعانىمدى قاراشى! اقىرى، بالانى ەدەننىڭ ۇستىنەن الىپ، جۇمساق ماتاعا وراپ قۇنداقتاعان، ۇيىقتاتۋ ءۇشىن جوعارى كوتەرىپ، ورىندىققا جاتقىزعان ادام مەنمىن عوي.

تۇنگى كلۋبتان شىققان سوڭ، يەوشيكو كۇيەۋى شاقىرعان تاكسيگە وتىردى.

- مىنا قىزدى ۋشيگومەگە جەتكىزە سال! - دەپ، جۇرگىزۋشىگە ايتتى دا ەسىگىن جابا سالدى.

يەوشيكو تەرەزە سىرتىندا كۇلىمسىرەگەن كۇيەۋىنىڭ جۇزىنە تەسىلە قاراعاندا ونىڭ مارجانداي تىزىلگەن اپپاق تىستەرى عانا انىق كورىندى. ارقاسىن ورىندىققا سۇيەپ شالقايعاندا جۇبايلىق ومىرلەرىنىڭ تىم جەڭىل، تىم وڭاي ءارى تىم قيىندىقسىز ەكەنىن سەزىنگەندە ءبىرتۇرلى مۇڭ تورلاعانداي بولدى. ءدال وسى ساتتە ءوز ويىن سوزبەن جەتكىزۋ بۇل كەلىنشەك ءۇشىن وتە اۋىر ەدى. تاكسيدىڭ ارتقى تەرەزەسىنەن ول كۇيەۋى جاققا سوڭعى رەت كوز تاستادى. ول كوشە بويلاپ ۇزاق- ۇزاق ادىمداپ، ءوزىنىڭ «Nash» كولىگىنە قاراي جەتتى، تىم قانىق ءتۇستى تۆيد ماتادان جاسالعان كۇرتەسىن الىپ كيدى دە ارلى- بەرلى اعىلعان جۇرتتىڭ اراسىنا كىرىپ كوزدەن تاسا بولدى.

تاكسي ورنىنان قوزعالىپ، الەم- جالەم ءدامحانالار ساپ تۇزەگەن ءبىر كوشەمەن قۇلداپ، سىرتقى جولعا دەيىن يىنتىرەسكەن ادامدارعا تولى تەاتردىڭ جانىنان ءوتتى. ويىن ەندى عانا اياقتالسا دا، شامدارى الدەقاشان سونگەن، تەاتردىڭ الدىڭعى جاعىن اشەكەيلەۋ ءۇشىن ورناتىلعان جاساندى شيە اعاشتارىنىڭ گۇلدەرى الا كولەڭكەدە جاي ءبىر ءتۇرلى قاعازداردىڭ قيىندىسى ىسپەتتى اعاراڭداپ كورىنۋى تىم كوڭىلسىز.

 «ءسابي بالا ءوزىنىڭ دۇنيە ەسىگىن قالاي اشقانىنىڭ قۇپياسىن بىلمەي ءوستى دەگەن كۇننىڭ وزىندە مارتەبەلى جان بولا قويماس» دەگەن وي يەوشيكوعا ساپ ەتە قالعانى سول ەدى، وسى تاقىلەتتەس بىردەمەلەر بىرىنەن سوڭ ءبىرى كەزەككە تۇرعانداي- اق بولدى. «العاش ونىڭ قۇنداعى بولعان گازەت قاعازى ونىڭ بار ءومىرىنىڭ رامىزىنە اينالاتىن شىعار. الايدا، مەن نەگە عانا ول ءۇشىن وسىنشاما قام جەيمىن؟ مۇمكىن، ءوز ۇلىمنىڭ بولاشاعىنا الاڭدايمىن با؟ جيىرما جىلدان كەيىن جەتىك ءبىلىم العان، قوعامدا قالىپتاسقان مەنىڭ ۇلىم تاعدىردىڭ الدە ءبىر تالكەگىمەن وزىمەن قۇرداس الگى بالامەن جۇزدەسىپ قالسا شە. وشپەندىلىكپەن ول بۇزاقى پىشاق سۋىرىپ الىپ ۇلىما ەش اياۋسىز سىلتەپ كەپ قالسا...؟».

 ءساۋىر ايىنىڭ بۇلتتى بولسا دا، جىلىمىق كەشىندە كەلەشەك تۋرالى وسىنداي ويعا كەلگەنى يەوشيكونىڭ تۇلا بويىن تىتىركەندىرىپ جىبەرگەندەي بولدى. ول كولىكتىڭ ارتقى ورىندىعىندا دىردەكتەپ وتىردى. «ساقتاي گور، جاراتقان! ەگەر ونداي ءسات تۋسا، ۇلىمنىڭ ورنىندا ءوزىم تۇرامىن».

«جيىرما جىلدان كەيىن مەن قىرىق تورتتە بولادى ەكەنمىن. مەن ول جىگىتكە بارامىن دا گازەتكە وراۋلى جاتقانىندا ونى قالاي ماقتادان جاسالعان جۇمساق ماتاعا قۇنداقتاپ، العانىمدى قاز- قالپىندا ايتىپ بەرەمىن».

 تاكسي ساياباق كەشەنى، يمپەراتور ورداسىنىڭ سۋ ارىقتارىمەن قورشالعان قاراڭعى كەڭ داڭعىلىمەن جۇيتكىپ كەلەدى. الىستا بوي كوتەرگەن ەكى ءزاۋلىم قۇرىلىستان تۇسكەن جارىق يەوشيكوعا كەلىپ قادالعانداي سونداي ءبىر جايسىزدىق تۋدىرادى.

 جيىرما جىلدان كەيىن سول ءبىر بەيباق بالا ناعىز ءتىس اۋرۋىنا اينالىپ جۇرمەسە يگى ەدى. ول تاستاندى، سەنىمنەن جۇرداي، تار تىرلىككە ەزىلگەن، جالعىزدىقپەن ساندالعان ەگەۋقۇيرىق سەكىلدى جان بولىپ وسەدى. جارىق دۇنيە ەسىگىن انانداي بولىپ اشقان بالانىڭ پەشەنەسىنە وزگە نە جازىلۋى مۇمكىن؟ اكەسىن بوقتاپ، شەشەسىمەن ارپالىسىپ وسكەن پەندە كوشە كەزىپ جۇرەر، ءداۋ دە بولسا.

 ءوزىن ءۇزىلىسسىز مازالاعانىنا قاراعاندا، يەوشيكو وسى ءبىر قاراڭعى پايىمداردىڭ وزىنەن كوڭىلىنە راقات تاباتىنداي بولىپ كەتتى. تاكسي حانزومونعا جەتىپ، بريتانيا ەلشىلىگىنىڭ قاسىنان ءوتتى. ءدال وسى ساتتە الگى اتاقتى شيە اعاشتارىنىڭ ساپ تۇزەۋى بار ونەرىن كورسەتكەندەي يەوشيكونىڭ كوز الدىندا كەزەكتەسە زۋلايدى. ءبىر ساتتىك سەزىمگە قاتتى بەرىلىپ كەتكەن كەلىنشەك ءتۇن قاراڭعىسىن دا ەلەمەي شيە گۇلدەرىنىڭ اشىلۋىن كوزبەن كورگىسى كەلدى. قويان جۇرەك جاس كەلىنشەك ءۇشىن شىنىمەن دە تاڭدارلىقتاي- اق شەشىم. كوڭىل- كۇيى الابۇرتقان جانە ۇيىنە بارۋدان يمەنە ۇرەيلەنگەن جان عوي. سول كۇنى كەشكە بۇل كەلىنشەكتىڭ ميىنا قايداعى- جايداعى ءساتسىز بىردەمەلەر ەنىپ، نىعىزدالىپ قالعان- تۇعىن.

يەوشيكو كەڭ كوشەدەن ءوتتى. قويۋ قاراڭعىدا جالعىز ادامنىڭ نازىك دەنە ءبىتىمى اعاراڭداپ كورىنەدى. ادەتتە جول كەسىپ وتكەن سايىن قورىققانىنان قاسىنداعى ادامدى تاس قىپ ۇستاپ الاتىن كەلىنشەك بۇل جولى قاپتاعان كولىك اراسىنان جالعىز ءوزى بۇرالاڭداپ ءوتىپ، بىرەر ساتتەن كەيىن وردا ارىقتارىمەن جالعاسقان ۇزىن ساياباققا ەندى. ساياباقتىڭ اتاۋى چيدوريگافۋچي نەمەسە مىڭ قۇس شاتقالى ەدى.

وسى كەشتە ساياباقتا جاپپاي شيە اعاشتارى گۇلدەپ جاتتى. گۇلىنىڭ جاپىراقتارى بۇلتتى مامىراجاي اسپان استىندا جاپپاي اق مونشاق تاققانداي. اعاشتار اراسىندا تارتىلعان سىمدارعا تاعىلعان قاعاز شامدار الدەقاشان ءسونىپ، ورنىنا قىزىل، سارى، جاسىل ءتۇستى ەلەكتر شامدار وشكىن عانا جىلتىلدايدى. تۇنگى ساعات وننان اسىپ كەتكەندىكتەن شيە گۇلدەۋىن كورۋگە كەلگەندەردىڭ دەنى ۇيلەرىنە قايتىپ كەتىپتى. سول ماڭنان ءوتىپ بارا جاتقان ءبىرلى- جارىم ادام اياعىنىڭ استىنا تىرەلگەن شولمەكتەردى جان- جاعىنا قاراي تەۋىپ، قاعاز بىردەمەلەردى اياعىمەن تاپتاپ كەتەدى.

«گازەت قاعازدارى» دەگەن وي ساپ ەتە قالىپ ەدى، يەوشيكونىڭ ساناسى باياعى سول وقيعاعا قاراي ويىستى دا كەتتى. سونداي ايانىشتى حالدە دۇنيەگە كەلۋشى تۋرالى ەستىگەن جان ونىڭ كىم ەكەنىن ءبىلىپ قويسا، ول بەيباقتىڭ ءومىرى سول كۇيى قۇرىدىمعا كەتەر. مەن وعان جات ادام بولسام دا، ونىڭ مۇددەسى ءۇشىن قازىردەن باستاپ ونى قۇپيا ساقتاۋىم كەرەك. بۇل ءبىر ادام بالاسىن بولامىن با، قۇريمىن با دەگەنگە تىرەيتىن قۇپيا.

 وسىنداي ويلارمەن ساناسى تۇمشالانعان كەلىنشەك ساياباقتى شارلاپ، ادىمداپ ءجۇر. وندا قالعانداردىڭ ءبارى قوس عاشىقتار. يەوشيكوعا نازار اۋدارعان دە ەشبىرى بولمادى. الگىندە عانا ارىقتىڭ بويىندا تاس ورىندىقتا وتىرعان ەكى قوس اعاشتاردى ەمەس، سۋدىڭ اعىنىنا تەسىلىپ قاراپ قالىپتى. ارىقتىڭ ارعى جاعىندا يمپەراتور ورداسىنىڭ ساياباعى ورمان ىسپەتتى بارانداپ كوزگە شالىنادى.

ونداعى اعاشتار ءبىرىڭعاي باران تۇسىمەن تۇنگى اسپانعا قول سوزىپ، ۇمتىلىپ تۇرعانداي ءۇرپيىسىپ كوزگە شالىنادى. يەوشيكو شيە اعاشتارىنىڭ اياق جاعىنداعى جولمەن باسىن سالبىراتىپ ءجۇرىپ كەلەدى.

سول ساتتە اناندايتىن جەردەگى تاس ورىندىق ۇستىندە اعاراڭداپ كورىنگەن نارسە كەلىنشەكتىڭ بولجاعانىنداي ءۇيىپ قويعان شيە گۇلدەرى ەمەس، ساياباققا كەلگەن الدە كىمنىڭ ۇمىتىپ قالدىرعان كيىمدەرى دە ەمەس بولىپ شىقتى. جاقىنداپ كەلگەندە عانا اعاراڭداعان سول نارسەنىڭ ورىندىقتا جاتقان ادام ەكەنىن ءبىلدى.

«قوعامدىق ورىندا ۇيىقتاپ جاتقانىنا قاراعاندا، جولى بولماعان ماسكۇنەمدەردىڭ ءبىرى بولدى عوي» دەپ، يەوشيكو تاڭدانىسپەن ويلادى. ءبىراق، ولاي ەمەس. الگى كىسى گازەتپەن بۇكىل دەنەسىن وتە ۇقىپتىلىقپەن وراپ العانى جانە قاعازدىڭ اقتىعى كەلىنشەكتىڭ نازارىن ەرەكشە اۋداردى. يەوشيكو تاس ورىندىقتىڭ قاسىنا كەلىپ، ۇيىقتاپ جاتقان ادامعا ەڭكەيىپ قارادى.

قاباتتاپ جايىلعان گازەتتەردىڭ ۇستىنە جاتىپ العان، كەيبىرىن جامىلعان، بوزعىلت ءتۇستى توقىما جەيدە كيگەن جىگىت ەكەن. كوكتەم مەزگىلىنىڭ جىلىمىعى ەنگەن كەز بولعاندىقتان بۇل ماڭاي تۇنەپ شىعۋعا قولايلى ورىنعا اينالسا كەرەك. يەوشيكو ونىڭ ەش كۇتىم كورمەي ۇيپا- تۇيپا ءۇرپيىپ، كىر باسقان جاباعى جۇندەي شاشىنا قارادى. گازەت جامىلىپ ۇيىقتاپ جاتقان ادامدى كورگەندە ونىڭ ويىنا الگى ءبىر وسىندايعا ورالعان ءسابيدى ەسكە العانى انىق. قاراڭعىدا تەرەڭ ۇيقىعا باتقان ونىڭ دەم العان سايىن ەكى يىعى قوزعالاقتايدى.

 يەوشيكونىڭ بارلىق ۇرەيى مەن كۇدىك- كۇمانى اياق استىنان ورىندالعانداي سەزىلىپ كەتتى. قاراڭعىدا ول جىگىتتىڭ اعاراڭداعان ماڭدايى عانا ايىرىقشا كوزگە تۇسەدى. جاس ادامنىڭ ماڭدايى بولا تۇرا قاتال تىرلىكتىڭ تاۋقىمەتىن تارتقاندىعىنىڭ ءىزى سايراپ جاتقانداي ۇزىننان ۇزاق اجىمدەرمەن ايعىزدالىپ كەتىپتى. قوڭىر شالبارىنىڭ بالاعى جوعارى تۇرىلگەن، جالاڭ اياعىنا مىجىرايىپ توز- توزى شىققان سپورتتىق شاقاي ءىلىپ الىپتى. بەتى- ءجۇزى تولىق كورىنبەي تۇرعاندىقتان، ءبىر مارتە كورۋگە دەگەن دەس بەرمەس قىزىعۋشىلىق يوشيكوعا كەنەت وي تۋا قالدى.

ول تاس ورىندىقتىڭ باس جاعىنا شىعىپ، تومەن قاراي ەڭكەيدى. بەتىن الاقانىمەن جارتىلاي كولەگەيلەگەنىمەن تىم جاس جىگىت ەكەنى اڭعارىلىپ تۇردى. يەوشيكو ونىڭ قويۋ قارا قاسىن، ءتۇزۋ مۇرنىن كوردى. ءسال عانا اشىلعان ەرنى جاستىق شاقتىڭ ىستىق لەبىنە تولىپ تۇرعانداي.

يەوشيكو وعان تىم جاقىنداپ كەتىپتى. تىم- تىرىس تۇندە گازەت قاعازىنىڭ سىبدىرى شىققاندا الگى جىگىت سول ساتتە ويانىپ كەتتى. ءدال قاسىندا جاس كەلىنشەكتىڭ تۇرعانىن كورگەن ول قوس جانارى جايناڭ قاعىپ، ورنىنان اتىپ تۇردى. قاس قاعىم ساتتە ونىڭ كۇرەكتەي قارۋلى قولى يەوشيكونىڭ نازىك بىلەگىنەن شاپ بەردى.

ءبىراق، يەوشيكوعا ەشبىر ۇرەي تۋمادى. بوساپ كەتۋگە ارەكەت تە جاسامادى. كەنەت ونىڭ ساناسىنا «ا، الگى جيىرما جىل باياعىدا ءوتىپ كەتكەن ەكەن- اۋ» دەگەن وي ساپ ەتە قالدى.

يمپەراتور ورداسىنىڭ ساياباعىنا قويۋ قاراڭعىلىق پەن قۇلاققا ۇرعان تاناداي تىنىشتىق يەلىك ەتىپ تۇر ەدى.

اۋدارعان: قۋاندىق شاماحاي ۇلى