الەكساندر كوساچەۆ «تالدىقورعان ءبورىسى» اتاندى - فوتو

تالدىقورعان. قازاقپارات - تالدىقورعاندا قالا اكىمىنىڭ جۇلدەسى ءۇشىن قازاق كۇرەسىنەن وتكىزىلگەن «تالدىقورعان بورىسىندە» الەكساندر كوساچەۆ جەڭىمپاز اتاندى.

ەندى بالۋان وبلىستىق «جەتىسۋ ءبورىسى» تۋرنيرىندە «قازاقستان بارىسىنا» جولداما الۋ ءۇشىن كۇش سىناسادى، دەپ حابارلايدى قازاقپارات ءتىلشىسى.

بيىلعى باسەكەگە 20 بالۋان قاتىستى. بۇل جەردەگى 20 سانى كەزدەيسوق تاڭدالماعان ەكەن. «استانا قالاسىنىڭ 20 جىلدىعىنا وراي وسىنداي تارتۋ جاسادىق»، - دەيدى قالالىق اكىمدىكتىڭ باسپا ءسوز قىزمەتى.

تۋرنيردە ءۇشىنشى ورىندى شىڭعىس سايلاۋ ۇلى، ەكىنشى ورىندى ءادىلباي الىشەر يەلەنسە، ءبىرىنشى ورىندى الەكساندر كوساچەۆ قانجىعالادى.

ال ەرلان تويبايەۆ «جەڭىسكە دەگەن جىگەرى ءۇشىن»، ەرنار ابدراحمانوۆ «ۇزدىك ءادىس كورسەتكەنى ءۇشىن» نوميناتسياسىمەن ماراپاتتالدى.

ەكى اپتادان كەيىن وتەتىن وبلىستىق «جەتىسۋ بورىسىندە» الەكساندر كوساچەۆ پەن ۇلان رىسقۇل شىعىپ، باقتارىن سىنايدى. ۇلان رىسقۇل بىلتىرعى «قازاقستان بارىسىنىڭ» كۇمىس بەلبەۋ يەگەرى اتانعانى ءۇشىن بيىلعى قالالىق ىرىكتەۋدەن بوساتىلدى.

ايتا كەتۋ كەرەك، الەكساندر كوساچەۆ بىلتىر دا «تالدىقورعان ءبورىسى» اتانعان بولاتىن.