قالا ماڭىنداعى رۇقسات ەتىلمەگەن جەر قوقىس الاڭىنا اينالعان - قوستاناي وبلىسى

قوستاناي. قازاقپارات - ليساكوۆ تۇرعىندارى قالا ماڭىنداعى رۇقسات ەتىلمەگەن جەردى قوقىس الاڭىنا اينالدىرعان.

بۇل تۋرالى اكىمدىكتە وتكەن كەڭەيتىلگەن جيىندا وبلىس اكىمىنىڭ ءبىرىنشى ورىنباسارى عاۋەز نۇرمۇحامبەتوۆ ايتتى، دەپ حابارلايدى قازاقپارات ءتىلشىسى.

عاۋەز نۇرمۇحامبەتوۆتىڭ ايتۋىنشا، اعىمداعى جىلى سانيتاريالىق تازارتۋ، اباتتاندىرۋ جانە كوگالداندىرۋ جونىندەگى جۇمىستار ەكى اي - 12 -ءساۋىر مەن 14 -ماۋسىم ارالىعىندا وتەدى. ەنەرگەتيكا جانە تۇرعىن ءۇي- كوممۋنالدىق شارۋاشىلىق باسقارماسى اپتا سايىن ەلدى مەكەندەردى اباتتاندىرۋ بويىنشا اتقارىلعان جۇمىستارعا مونيتورينگ جۇرگىزەدى.

«بىلتىرعى تازالىق ايلىعى كەزىندە وبلىس بويىنشا 660 قوقىس الاڭى تازارتىلدى. ونىڭ ورنىنا 30 مىڭ اعاش ەگىلىپ، 406 ساياباق اشىلدى. كوممۋنالدىق ءبولىم ماماندارى پوليگوندارعا 75 مىڭ تونناداي قوقىس شىعاردى. قازىرگى ۋاقىتتا رۇقسات ەتىلمەگەن جەرلەردى قوقىس تاستايتىن ورىنعا اينالدىرعاندارمەن كۇرەستى قولعا الۋ قاجەت. ماسەلەن، ليساكوۆ قالاسىنىڭ شەتىندەگى رۇقسات ەتىلمەگەن جەر قوقىس الاڭىنا اينالعان. ادامدار مۇندا قۇرىلىس ماتەريالدارىنىڭ قالدىقتارىن دا تاستاعان»، - دەدى وبلىس اكىمىنىڭ ورىنباسارى.

سونداي-اق، ع. نۇرمۇحامبەتوۆ رۇقسات ەتىلمەگەن جەرلەرگە قوقىس تاستايتىندارمەن كۇرەسۋ ءۇشىن بەينەباقىلاۋ كامەرالارىن ورناتۋدى ۇسىندى. بۇعان قوسا، ءتارتىپ بۇزۋشىلارعا ءىرى كولەمدە ايىپپۇل سالۋ قاجەت.

«بۇل ماسەلەمەن قالالار مەن اۋدانداردىڭ اكىمدەرى تىكەلەي اينالىسۋلارى ءتيىس. مىسالى، 2014 -جىلى ليساكوۆ اكىمدىگى رۇقسات ەتىلمەگەن قوقىس تاستايتىن جەرلەردى جويۋ جانە بولدىرماۋ ءۇشىن 2 بەينەباقىلاۋ كامەراسىن ورناتتى. بۇل جۇمىس جەمىسىن بەردى. 51 قۇقىقبۇزۋ فاكتىسى انىقتالىپ، تۇرعىندارعا 274 مىڭ تەڭگە ايىپپۇل سالىندى. ناتيجەسىندە، قالالىقتار كۇل- قوقىستى پوليگونعا تاستايتىن بولدى»، - دەدى ع. نۇرمۇحامبەتوۆ.

بيىل قوستانايدا سانيتارلىق جۇمىستاردى جۇرگىزۋ، كوگالداندىرۋ جانە اۆتوكولىك جولدارىن اباتتاندىرۋ بويىنشا بيۋدجەتتەن 10,5 ميلليارد تەڭگە ءبولىندى.