تامارا اسار شەتەلدىكتەر اسىراپ العان قازاق بالاسىنىڭ ايانىشتى تاعدىرىن باياندادى

None
None
 استانا. قازاقپارات - تامارا اسار فرانسيا قازاقتارىنىڭ ۇيىمداستىرۋىمەن وتكەن ناۋرىز مەرەكەسىنە قاتىسقان ەدى. پاريجدە جۇرگەن ءانشى ساحنا سىرتىندا قازاق بالاسىن كەزدەستىرگەنىن ايتىپ، ونىڭ ايانىشتى تاعدىرىن باياندادى.

بۇل تۋرالى Stan.kz اقپاراتتىق اگەنتتىگى حابارلايدى.

«لۋۆر الاڭىندا ناۋرىز تويى قىزعان كەز ەدى. مەن ساحنانىڭ ارت جاعىندا ءوز كەزەگىمدى كۇتىپ، قازاق كوستيۋمىمدى قىزىقتاپ كەلگەن فرانسۋزدار مەن باسقا دا ۇلت وكىلدەرىمەن فوتوعا ءتۇسىپ، بار بىلگەن اعىلشىنىممەن فرانسۋز ءتىلىمدى بىلدىرلاتىپ ارالاستىرىپ، جارتىسىن ەموتسياممەن اۋزى باسىمدى جىبىرلاتىپ، قولىمدى سەرمەپ، بارلىق جەستيكۋلياتسيامدى قوسىپ، ويىمدى جەتكىزىپ ءماز بوپ تۇرعانمىن.

جانىما ءبىر فرانسۋز ايەلى كەلىپ، الدەنەنى تۇسىندىرە باستادى. بىردەن تۇسىنبەسەم دە، باسىمدى يزەي بەردىم، مۋزىكا قاتتى ويناپ تۇرعاسىن قاتتى تاقالىپ، قۇلاعىما ىسسى دەمىمەن ۇرلەپ، الدەنەنى ايتىپ جاتىر، ءبىر ساتتە تىلدەن بولەك «سانا- تۇيسىگىم» قوسىلعانداي بولدى، تىڭداي باستادىم. ول ماعان ءبىر سويلەمدى قايتا- قايتا ايتا بەرىپ ەدى، جۇرەگىم «شىم» ەتتى، ءالى دۇرىس تۇسىنگەن جوقپىن. قاسىنداعى بالانى كورسەتە بەرەدى دە «Mon fils kazakh»- دەپ قايتالاي بەرەدى، سول سويلەم قۇلاعىمدا ءالى تۇر»، - دەپ باستادى اڭگىمەسىن ءانشى.

قازاقتىڭ بالاسىن كورگەندە جۇرەگى ءدىر ەتە تۇسكەن ءانشى كوپ سوزباي اۋدارماشىنى شاقىرعان. ءسويتىپ، فرانسۋز ايەلىنىڭ قاسىنداعى جاسءوسپىرىمنىڭ ۇلتى قازاق ەكەنىن بىلگەن.

«مىنا فوتوداعى بالانى ءتورت جاسىندا اسىراپ الىپتى. جەزقازعاندىكى ەكەن. ۇلتى - قازاق، اتى - مۇحاممەد. ءبىراق قازىر ەكى ەسىمى بار، قازاقشا- فرانسۋزشا. جاسى ون تورتتە. مەنىڭ قابىلداۋىمدا ونىڭ كوزى مۇڭعا تولى، ەڭسەسى ەركە بالاعا ۇقسامايتىن سياقتى، الدە مەنىڭ كوزىمە سولاي كورىنگەن شىعار؟ ايتەۋىر مەن ءدال وسى جولى السىزدىك تانىتتىم. شىداي الماي، بالانى قۇشاقتاي الدىم. كادىمگىدەي بۇكىل قازاقتىڭ قۇشاعىن سىيلاعىم كەلدى، ىشتەي سىزدەردەن سالەم ايتقانداي بولدىم.

تاماعىما بىرنارسە كەپتەلىپ، جۇرەگىم تارسىلداپ، جاق- سۇيەكتەرىم جىبىرلاپ- اشىپ، مۇرنىمنىڭ ۇشىن ىزالى جاس كەرنەپ، بارا جاتىر. ەل جان- جاعىمنان مەنىمەن فوتوعا ءتۇسىپ جاتقاسىن، كوز جاسىما ەرىك بەرۋگە ۇيات قىسىپ، ءيت- زىقىم شىعىپ تۇر. «تامارا اسار، قازىر ساحناعا شىعاسىڭ، بۇل فرانسيا، پاريج، لۋۆر، قازاقستاننىڭ ناۋرىزى، ەلدىڭ، ەلشىلىكتىڭ ابرويى، پورا- پوراڭ شىعىپ، ساحنادا جىلاپ تۇرماقپىسىڭ؟ جىلاما، جىلاما» دەپ ءوزىمدى- ءوزىم ىشتەي تەجەپ، اۋتوترەنينگ جاساپ، بويىمنىڭ ءدىرىلىن توقتاتۋعا تىرىسىپ، فوتووبەكتيۆتەرگە «كەزەكشى جىميۋدان»  قوسىپ، ەزۋىمدى كۇشپەن تارتىپ تۇردىم دا، ساحناعا كوتەرىلىپ كەتتىم. اللانىڭ جازعانى وسىلاي بولعان شىعار، مۇحامەد - پايعامباردىڭ اتتاسى، قازاقتىڭ قانى، فرانسۋزدىڭ ۇلى مۇحاممەد»، - دەپ تۇيىندەدى ءسوزىن ول.

سوڭعى جاڭالىقتار