ءۇيىن ءسۇرىپ تاستاماق بولعاندا قىتاي ءۇش قاباتتى باسپاناسىن التى مەترگە جىلجىتىپ، امان الىپ قالدى - ۆيدەو

نۇر-سۇلتان. قازاقپارات - ول ول ما، ول بيلىكتەن ءۇيىن ءسۇرۋى ءۇشىن بەرىلەتىن وتەماقى الىپ، ەكى وقپەن ءبىر قويان اتىپ الدى.

تارقاتىپ ايتقاندا، قىتايدىڭ جياڭشي پروۆينسياسىندا شارۋاشىلىعىن دوڭگەلەتىپ وتىرعان گاۋ يپين ەسىمدى قىتايدىڭ باسپاناسىنا ءسۇرىلۋ قاۋپى تونەدى. ەسكى ءۇي بولسا ءبىرسارى، سالىنعانى ءبىر قولدىڭ ساۋساق سانىنا جەتپەيتىن جىلدار عانا وتكەن، ياعني، 2014 -جىلى ءبىر ميلليون يۋان قارجىسىنا تۇرعىزعان ءۇش قاباتتى باسپاناسىن امان الىپ قالۋ ءۇشىن قۋلىققا بارۋىنا تۋرا كەلدى. ەندى شە؟! بار جيعان-تەرگەنىن جۇمساپ، قالتاسىن قاعىپ سالعان ءۇيىن ءسۇرىپ تاستاسا، ەڭبەگى ەش كەتپەي مە.

ءۇيى سالىنعان جەردەن جول توسەلەتىن بولعاندىقتان ونىڭ باسپاناسى سۇرىلەتىن بولىپ، بيلىك وتەماقى رەتىندە 680 مىڭ يۋان تولەيدى. بۇل قارجى ءۇيىن تۇرعىزۋعا كەتكەن قارجىنىڭ جانىندا بولماشى سوما ەدى. ارى ويلانىپ، بەرى تولعانىپ، ءبىر شەشىمگە كەلگەن فەرمەر جۇمىسشىلاردى جالداپ، التى اپتا ىشىندە باسپاناسىن قازىعى قاعىلعان جەردەن التى مەترگە جىلجىتادى. جۇمىسشىلارعا جالداۋ اقىسىنا 360 مىڭ يۋان تولەيدى. بيلىكتەن بەرىلگەن وتەماقىنىڭ جارتىسىنداي سوما. فەرمەردىڭ كورشىسىنىڭ باسپاناسىنا دا ءسۇرىلۋ قاۋپى ءتونىپ تۇر. ول دا كورشىسىنەن كورگەنىن ىستەۋگە بەل بۋىپ وتىر. الايدا، ونىسى ىسكە اسا ما، ونى بىلمەيمىز. ويتكەنى، بىرىنشىدەن، ونىڭ ءۇيى ءتورت قاباتتى، ەكىنشىدەن - باسپاناسىن سۇرۋدەن امان الىپ قالۋ ءۇشىن كورشىسى سەكىلدى التى مەترگە ەمەس، ءجۇز مەترگە دەيىن جىلجىتۋعا تۋرا كەلەدى.

islam.kz