جاڭا رەكورد: الماتىدا ەڭ ۇلكەن كەسە شاي تىركەلدى

الماتى. قازاقپارات - بيىل ناۋرىز مەرەكەسىندە قازاقستان رەكوردتار كىتابىنداعى كورسەتكىش جاڭاردى، دەپ حابارلايدى قازاقپارات ءتىلشىسى.

الماتىدا بيىل دا ناۋرىز مەيرامى اۋقىمدى تۇردە اتالىپ ءوتتى. ءتۇرلى ەتنو مادەني ورتالىقتار، شەبەرلەر مەن ونەرپازدار جينالعان جۇرتقا مەرەكەلىك كوڭىل-كۇيدى سىيلادى. ءدال وسى كۇنى قازاقستان رەكوردتار كىتابىنداعى كورسەتكىشتەر جاڭاردى.

اربات الاڭىندا 2000 ليترلىك سىيىمدىلىقتاعى، بيىكتىگى 2,5 مەتردەن اساتىن 1 كەسە ءسۇت قوسقان شاي دايىندالدى. سوسىن ەلىمىزدەگى رەكوردتىق ەڭ ۇلكەن كەسەدەن تۇرعىندارعا شاي تاراتىلىپ بەرىلدى.

سونىمەن قاتار، ارباتتا الەمدەگى ەڭ ۇلكەن قۇراق كورپەنى تىگۋ باستالدى.

جوسپار بويىنشا 25500 شارشى مەترلىك كورپە 20 -قىركۇيەككە تامان تىگىلىپ بىتەتىن بولادى. قازىر مۇنداي كورپەنىڭ رەكوردى پورتۋگاليا ىسمەرلەرىنە تيەسىلى. 2000 -جىلى ولار 25100 شارشى مەتر كورپە قۇراعان ەدى.