قوستاناي وبلىسىنا كوشىپ بارۋشىلارعا مىڭعا جۋىق جۇمىس ورنى ۇسىنىلدى

None
None
قوستاناي. قازاقپارات - بيىل قوستاناي وبلىسىنا ەلىمىزدىڭ باسقا وڭىرلەرىنەن 300 گە جۋىق وتباسى قونىس اۋدارماق.

ولار ءۇشىن باسپانا، جۇمىس ورىندارى ازىرلەندى، دەپ حابارلايدى قازاقپارات.

جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى گۇلنار ابەنوۆا ايتقانداي، بيىل جۇمىس كۇشى تاپشى ايماقتارعا وتباسىلاردى كوشىرۋ بويىنشا جوسپار جاسالدى. 2016-جىلى قوستانايعا باسقا وبلىستاردان - 22، 2017-جىلى - 30 عانا وتباسى قونىس اۋدارعان. 2018-جىلى بۇل كورسەتكىش 10 ەسەگە ۇلعايدى. بيىل قوستاناي وبلىسى 272 وتباسىن قابىلداۋعا دايىن.

«قازىر ءبىز سىرت وبلىستاردان قونىس اۋدارۋشىلار ءۇشىن ارنايى پاسپورتتار ازىرلەدىك. وندا ءوڭىردىڭ الەۋمەتتىك ينفراقۇرىلىمى: مەكتەپتەر، مەكتەپكە دەيىنگى مەكەمەلەر، دەنساۋلىق ساقتاۋ جانە باسقا دا نىساندار تۋرالى دەرەكتەر كورسەتىلگەن. كەلۋشىلەردى قابىلدايتىن اۋدان- قالالار بوس جۇمىس ورىنداردىڭ ءتىزىمىن جاسادى. بۇگىندە 216 جۇمىس بەرۋشى 962 بوس ورىن ۇسىندى. سونداي-اق، وتانداستارىمىزدى تۇرعىن ۇيمەن قامتاماسىز ەتۋ ماسەلەسى شەشىلىپ كەلەدى. وتباسىلاردىڭ قوسالقى شارۋاشىلىقپەن اينالىسۋىنا دا مۇمكىندىك بار»، - دەدى باسقارما باسشىسى.

بەلگىلى بولعانداي، وبلىسقا مۇعالىم، مەحانيزاتور، دارىگەر، كولىك جۇرگىزۋشىلەرى سياقتى ماماندار جەتىسپەيدى. گۇلنار ابەنوۆانىڭ ايتۋىنشا، وڭتۇستىكتەن كەلەتىن وتباسىلار جوعارىدا اتالعان ماماندىقتارعا قىزىعۋشىلىق تانىتىپ وتىر.

«ءبىزدىڭ ۆەدومستۆو ءاربىر قالا، اۋداندارداعى جىلجىمايتىن مۇلىك نارىعىنا ساراپتاما جۇرگىزدى. ماسەلەن، اۋدان ورتالىقتارىنداعى باسپانا 500 مىڭ تەڭگەدەن باستاپ، 6 ميلليون تەڭگەگە دەيىن باعالاندى. ال اۋىلداردا 300 مىڭ تەڭگە كولەمىندە ءۇي تابۋعا بولادى. قالالىق جەرلەردە پاتەر باعاسى 1,5-9 ميلليون تەڭگە ارالىعىندا»، - دەپ دەرەك كەلتىردى گ. ابەنوۆا.

ايتا كەتەيىك، قوستانايلىق دەلەگاتسيا اقپان ايىندا ماڭعىستاۋ وبلىسىنداعى بوس ورىندار جارمەڭكەسىنە قاتىستى. سونىمەن قاتار ناۋرىز-ءساۋىر ايلارىندا باسقا وبلىستاردا وتەتىن جارمەڭكەلەرگە قاتىسىپ، قوستانايعا كەلۋگە قىزىعۋشىلىق تانىتقان مامانداردى ىزدەيدى. بيىل وبلىس بويىنشا ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلامالارىنا 1 ميلليارد تەڭگەدەن استام قاراجات قاراستىرىلعان.

سوڭعى جاڭالىقتار