ەسترادا جۇلدىزدارى استاناداعى تۇرعىن ءۇي الاپتارىندا ناۋرىز مەيرامىنا قاتىستى - فوتو

استانا. قازاقپارات - كەشە ميچۋرينو جانە پرومىشلەننىي تۇرعىن الاپتارىندا ناۋرىز مەيرامىنىڭ قۇرمەتىنە بەلگىلى وتاندىق انشىلەرىنىڭ كونسەرتتەرى مەن حالىقتىق سەرۋەندەر ءوتتى، دەپ حابارلايدى استانا قالاسى اكىمدىگىنىڭ رەسمي سايتى.

كونسەرتكە قازاقستاندىقتاردىڭ سۇيىكتى انشىلەرى كلارا تولەنبايەۆا، دوسىمجان تاڭاتاروۆ، اسقار جايلاۋبايەۆقاتىستى. ولار ءوز رەپەرتۋارلارىنداعى كەڭىنەن تانىمال بەلگىلى ەسترادالىق كومپوزيتسيالاردى ورىندادى. مۇنىمەن قوسا، جينالعان قاۋىم استانا قالاسىنىڭ مەملەكەتتىك اكادەميالىق فيلارمونياسىنىڭ سوليستەرىپەريزات تۇراروۆانىڭ، جانارگۇل راحات قىزىنىڭ، جاقسىكەلدى ماياساروۆتىڭ، پرەزيدەنت وركەسترىنىڭ سوليستى، حالىقارالىق كونكۋرستاردىڭ لاۋرەاتى ايزات كارابەكوۆانىڭ، دارىندى دومبىراشى قۇرمانعازى بايتاسوۆتىڭ جانە ۆوكاليست ءمادينا احمەتوۆانىڭ، ايدانا سماحانوۆانىڭ، باۋىرجان نۇرىمبەتوۆتىڭ، ولجاس سابيجاننىڭ، ايگەرىم حاسانوۆانىڭ جانە اسەم وماروۆانىڭ شىعارماشىلىعىمەن تانىستى. «دابىل»، «سارىارقا»، «ءداۋىر»، «رەترو»، «بۋم» توپتارى، «الامان» مەن «Z» تريولارى، «ديارت» جانە «باستاۋ» اسپاپتى ۇجىمدارى، «Art Music» كۆارتەتى سىندى ەلىمىزدىڭ تانىمال شىعارماشىلىق ۇجىمدارى كوپشىلىككە كوتەرىڭكى كوڭىل- كۇي سىيلادى.

 

بەلگىلى ءانشى كلارا تولەنبايەۆا قالا تۇرعىندارىن مەرەكەمەن قۇتتىقتادى: «كەيىنگى ەكى جىلدا استانانىڭ ماڭايىنداعى تۇرعىن الاپتارىن ارالاپ، كونسەرت بەرىپ ءجۇرمىز. بۇل تەك ناۋرىزدا عانا وتەتىن شارا ەمەس، قالا كۇنىندە دە، بىلتىرعى ەكسپو ۋاقىتىندا دا ۇيىمداستىرىلعان كونتسەرتتەرگە دە قاتىستىق. بۇل جولعا قويىلعان وتە جاقسى جوبا دەپ ويلايمىن، ويتكەنى شەتكى اۋداندارداعى تۇرعىنداردىڭ قالا ورتالىعىندا بولىپ جاتقان كونسەرتتەرگە ءجيى قاتىسۋعا مۇمكىندىگى بولا بەرمەيدى. مۇنداي ءىس-شارالار حالىقتىڭ كوڭىلىن كوتەرەدى، كورەرمەن مەرەكەنى سەزىنەدى.

ءوزىمىز دە مارقايىپ قالامىز، اقساقالدار، اپالار، ءتىپتى كىشكەنتاي بۇلدىرشىندەر كەلىپ، بار نيەتىمەن، شىن ىقىلاسىمەن ءانىڭدى تىڭدايدى، بۇل بىزگە ۇلكەن مارتەبە، ءارى شابىت بەرەدى. ناۋرىز - تىرشىلىكتىڭ باستاۋى، كوزى، بارلىق نارسەنىڭ جاڭارىپ، كۇن مەن ءتۇننىڭ تەڭەلەتىن ۋاقىتى، قازاقتىڭ ايتۋلى ءتول مەرەكەسى. سوندىقتان بۇكىل حالىق بولىپ ناۋرىزدى ەرەكشە كۇتەمىز. بۇل - وتباسىلىق مەرەكە، تاتۋلىققا، بەرەكە- بىرلىككە شاقىراتىن مەيرام. بارشا قازاقستاندىقتاردى ۇلىستىڭ ۇلى كۇنىمەن شىن جۇرەكتەن قۇتتىقتايمىن».

«مەرەكە ورتاق. ءبىراق استانادا كەرەمەت دۋماندى ءىس-شارالار ءوتىپ جاتقانىمەن، قالانىڭ قاسىنداعى ەلدى-مەكەندەردىڭ تۇرعىندارى وعان كوپ بارا بەرمەيدى. سوندىقتان وسى تۇرعىن الاپتارىندا كونتسەرت وتكىزۋ قۇپتارلىق دۇنيە، مەنى قۋانتقان باستاما. تۇرعىن الاپتارىنىڭ كورەرمەندەرىنىڭ كەلگەن ونەرپازدارعا دەگەن كوزقاراسى، ءىلتيپاتى ەرەكشە جىلى. ناۋرىز - ەلدى ىنتىماققا، اۋىزبىرلىككە شاقىراتىن شۋاقتى مەيرام. ۇلىس وڭ بولسىن، اق مول بولسىن، مەرەكەلى كۇندەرىمىز كوپ بولعاي»، - دەپ دوسىمجان تاڭاتاروۆ تىلەگىن جەتكىزدى.

«ىڭكارىم» ءانسامبلىنىڭ ءبيى مەرەكەلىك كونسەرتتىڭ كوركىن كەلتىردى. شارانى تاماشالاۋعا كەلگەن تۇرعىن الاپتارىنىڭ تۇرعىندارى كوڭىلدى فلەشموبتارعا بەلسەنە قاتىسىپ، «قارا جورعا» حالىق ءبيىن ورىندادى.

سونىمەن قاتار، ساحنا تورىندە قازاق حالقىنىڭ ۇلتتىق سالت-داستۇرلەرى دە كورسەتىلدى. ءداستۇرلى جابدىقتار قويىلعان ادەمى كيىز ۇيلەر الىستان-اق كوزدىڭ جاۋىن الادى. شاراعا كەلۋشىلەر ءۇشىن مەرەكەلىك داستارقاننىڭ باستى تاعامى - ناۋرىز كوجە، پالاۋ مەن ىستىق باۋىرساق دايىندالدى.

ناۋرىز مەرەكەسى ۇلتتىق سپورت تۇرلەرىنەن جارىسسىز وتپەيدى. بۇل جولا قالا تۇرعىندارى مەن قوناقتارى ارقان تارتۋ، توعىزقۇمالاق زياتكەرلىك ويىنىندا شەبەرلىك بايقاستى. بۇدان باسقا، جينالعاندار اراسىندا گىر كوتەرۋ، ارمرەستلينگ، شاحمات جانە دويبىدان جارىس ۇيىمداستىرىلدى. جارىسقا قاتىسۋشىلار كوپ بولدى.

 

شارا اياسىندا ميچۋرينو تۇرعىن الابىنىڭ «ميراس» اۋلا كلۋبىنىڭ تاربيەلەنۋشىلەرى قازاق كۇرەسىنىڭ ايلا- امالدارىن كورسەتتى، سونىمەن قاتار پرومىشلەننىي تۇرعىن الابىندا ورنالاسقان «سان- سيرو» فۋتبول مەكتەبىنىڭ تاربيەلەنۋشىلەرى فۋتبولدان تۋرنير وتكىزدى.

«بۇل جەردە كوپ حالىق تۇرادى. ناۋرىز جىل سايىن تويلانادى، كەرەمەت انشىلەر كەلىپ ونەرىن پاش ەتەدى. بيىل مىنە مەرەكە بالالارعا، تۇرعىنداردىڭ دەم الۋى ءۇشىن ارنايى سالىنعان جاڭا سپورتتىق- ويىن الاڭى بار شاعىن ساياباعىمىزدا وتۋدە. قىس بويى كورمەگەن تانىستارىمىزدى كەزدەستىرىپ، ارقا- جارقا بولىپ قالدىق. بۇل ءىس- شارانىڭ وسكەلەڭ ۇرپاق ءۇشىن دە زور تاربيەلىك ءمانى بار، سالت- ءداستۇرىمىز كورىنىس تابادى، ۇلتتىق ويىندارىمىز ۇيىمداستىرىلادى. وتە قۋانىشتىمىز»، - دەدى «پرومىشلەننىي» الابىنىڭ تۇرعىنى ىرىستى كەنجەبەكوۆا.

ەلوردانىڭ تۇرعىن الاپتارىنداعى ناۋرىز مەيرامىنا ورايلاستىرىلعان حالىقتىق سەرۋەندەر 21 -ناۋرىزدا جالعاسىن تابادى. بۇل كۇنى ساعات 11.00-دە پريگورودنىي جانە ۇركەر تۇرعىن الاپتارىندا كوكتەم مەرەكەسىنە ارنالعان كونسەرتتەر ۇيىمداستىرىلادى. 22 -ناۋرىزدا وسى سياقتى شارالار كوكتال-1 جانە ءوندىرىس تۇرعىن الاپتارىندا، ال 23 -ناۋرىزدا سارايشىق شاعىن اۋدانىندا وتەدى.