قوستانايدا اسىل تۇقىمدى مال ارنايى چيپ ارقىلى قورعالماق
قارابالىق اۋدانىندا ورنالاسقان «استىق يندۋسترياسى» اگروحولدينگى قۇرامىنا «سيەۆەر-اگرو ن» اسىل تۇقىمدى مال شارۋاشىلىعى كومبيناتى، «تەررا» بورداقىلاۋ الاڭى، «توعىزاق» استىق ونىمدەرى كومبيناتى جانە «اق-ءبيداي-اگرو» فيرماسى سەكىلدى ءبىرقاتار نىسان كىرەدى. بۇگىن اگروحولدينگتىڭ الداعى جۇمىس جوسپارى مەن جەتىستىكتەرى شەتەلدىك عالىمدارعا تانىستىرىلدى.
«ءبىزدىڭ وبلىستا ا و ك سيفرلاندىرۋ پيلوتتىق جوباسىنا قاتىسۋعا مۇمكىندىگى بار 20 كاسىپورىن ىرىكتەلىپ الىندى. سولاردىڭ ءبىرى «استىق يندۋسترياسى» اگروحولدينگى ءوز بازاسىندا بىرنەشە جاڭاشىلدىق ۇسىندى. وسىعان وراي تاجىريبەلەرىمەن ءبولىسۋ ءۇشىن يتاليا، ا ق ش، فرانسيا، رەسەي مەملەكەتتەرىنىڭ عالىمدارىن شاقىردىق. دامىعان ەلدەردىڭ جاڭا تەحنولوگيالارىن ءبىزدىڭ ءوڭىردىڭ اۋىل شارۋاشىلىعىنا پايدالانساق، ونىمدىلىك قۋاتى الدەقايدا ارتادى»، - دەدى قوستاناي وبلىسى اكىمىنىڭ ورىنباسارى مەيىرجان مىرزاليەۆ.
«استىق يندۋسترياسى» اگروحولدينگى باس ديرەكتورى داۋلەت احمەتقاليەۆتىڭ سوزىنشە، سيفرلاندىرۋ باعدارلاماسى بويىنشا قولعا الىنعان جوبالاردىڭ كومەگى زور.
«جاقىندا مالداردى چيپتەۋدى باستايمىز. وسى ارقىلى اسىل تۇقىمدى مالدىڭ ۇرلانباۋىن كومپيۋتەردەن قاداعالاپ وتىراتىن بولامىز. سونداي-اق، بورداقىلاۋ الاڭى دا وزىق تەحنولوگيا بويىنشا جابدىقتالاتىن بولادى. مۇنداعى مال تاۋلىگىنە 700 گرام سالماق قوسادى. قولداعى مالدىڭ 20 پايىزى وسى بورداقىلاۋ الاڭىندا، قاجەتتى سالماق الىنعاننان كەيىن ولاردى اۋىستىرىپ وتىرامىز، وسىلاي ۇدەرىس جالعاسا بەرەتىن بولادى. جالپى، ەشقانداي قوسپاسىز تابيعي جەم بەرىلەتىن مالدان الىناتىن ەت ساپاسى دا جوعارى بولادى»، - دەدى د. احمەتقاليەۆ.
بۇگىندە «تەررا» بورداقىلاۋ الاڭىندا 8 مىڭ ءىرى قارا جەمدەلەدى. كومپانيا وبلىستاعى ەت كلاستەرىنىڭ قالىپتاسۋىنا ۇلەس قوسىپ وتىر. «سيەۆەر-اگرو ن» شارۋاشىلىعى 3500 ەت باعىتىنداعى جانە 2800 ءسۇت باعىتىنداعى اسىل تۇقىمدى مال وسىرەدى. ال «اق-ءبيداي-اگرو» اگروفيرماسى 3-4 اۋداندا 85 مىڭ گەكتار القاپقا بۇرشاق، مايلى داقىلدار وسىرۋمەن اينالىسادى. ولاردىڭ ىشكى جانە سىرتقى نارىقتا جوعارى سۇرانىسقا يە ءونىمى قارابالىق اۋدانىندا وڭدەلەدى.