قازاقتىڭ قولونەر تۋىندىلارى قىتاي تۋريستەرىنىڭ قىزىعۋشىلىعىن تۋدىردى - ەلشى - فوتو

استانا. قازاقپارات - استاناداعى «پەكين پالاس» قوناق ۇيىندە قازاقتىڭ قولونەر تۋىندىلارىنىڭ كورمەسى ءوتتى، دەپ حابارلايدى «قازاقپارات» ح ا ا ءتىلشىسى.

كورمە بەيجىڭدەگى «EXPO-2019»  حالىقارالىق كورمەسى مەن قىتايداعى كوكتەم فەستيۆالىنە ارنالعان «Open Road» ءىس-شاراسىنىڭ قۇرمەتىنە وتكىزىلدى. شارا قازاقستان رەسپۋبليكاسىنداعى قىتاي حالىق رەسپۋبليكاسىنىڭ ەلشىسى چجان حانحۋەيدىڭ، «Expo & Women» حالىقارالىق ۇيىمى، ەتنو-ديزاين جانە قولونەردى دامىتۋ كوميتەتىنىڭ قولداۋىمەن ۇيىمداستىرىلعان.

كورمەگە دومبىرا، ۇلتتىق ويۋ-ورنەكتەرمەن ورنەكتەلگەن ىدىستاردى، كۇمىس پەن تەمىردەن ۇلتتىق ناقىشتا ەستەلىك تۋىندىلاردى جاسايتىن قولونەر شەبەرلەرى كەلگەن. كورمەنى تاماشالاۋشىلار قولونەر شەبەرلەرىنىڭ ونەرىنە زور ىقىلاستارىن ءبىلدىردى.

«قازاقتىڭ ۇلتتىق قولونەرىنىڭ كورمەسىنە قاتىسۋ مەن ءۇشىن ۇلكەن قۇرمەت. «ءبىر بەلدەۋ، ءبىر جول» باعدارلاماسىنىڭ جۇزەگە اسىرىلۋى تۇرعىسىندا قازاقستان قىتاي حالقىنىڭ اراسىندا ەرەكشە تانىمال مەملەكەت بولىپ كەلە جاتىر. قىتايداعى ءيت جىلعى كوكتەم مەرەكەسىن تويلاۋ كەزىندە تۇسىرىلگەن ترانسلاتسيادا قازاقتىڭ ۇلتتىق ناقىشىنداعى ويۋلار ءۇش رەت كورسەتىلىپ، حالقىمىز ۇلى ابايدىڭ ولەڭدەرىمەن كەڭىرەك تانىستى. وتكەن جىلى استانادا ەكسپو كورمەسى وتكەن كەزدە قازاق قولونەرىنە تيەسىلى بىلعارى سۋرەتتەر، قابىرعا كىلەمدەرى مەن وزگە دە بۇيىمدار قىتاي تۋريستەرىنىڭ زور قىزىعۋشىلىعىن تۋدىردى. شاعىن عانا قولونەر تۋىندىسى ەكى ەلدىڭ بايلانىسىن نىعايتۋدا دا ءوز ۇلەسىن قوسارىنا كۇمانىم جوق»، - دەدى قازاقستانداعى قىتاي ەلشىسى چجان حانحۋەي.

كورمە سوڭى كونسەرتكە ۇلاسىپ، قازاق ەستراداسىندا بەلگىلى جۇگىنىسوۆتەر ۇشتىگى اننەن شاشۋ شاشتى.