بيىلدان باستاپ «دارىن» مەملەكەتتىك جاستار سىيلىعى جىل سايىن بەرىلەتىن بولدى

استانا. قازاقپارات - «دارىن» مەملەكەتتىك جاستار سىيلىعى بۇدان بىلاي  ءبىر رەت ەمەس، جىل سايىن بەرىلەدى.

بۇل تۋرالى قازاقستان حالقى اسسامبلەياسىنىڭ «جاڭعىرۋ جولى» رەسپۋبليكالىق جاستار قوزعالىسىنىڭ قۇرىلتايىندا ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ ءمالىم ەتتى، دەپ حابارلايدى «قازاقپارات» ح ا ا ءتىلشىسى.

ايتا كەتسەك، ەلىمىزدە «جاڭعىرۋ جولى» رەسپۋبليكالىق جاستار قوزعالىسى قۇرىلعان بولاتىن. تىڭ قوزعالىستىڭ ءتوراعاسى بولىپ ماكسيم سپوتكاي سايلاندى. ماكسيم سپوتكايدىڭ ايتۋىنشا، قوزعالىستىڭ ميسسياسى - دىنىنە، تىلىنە، ۇلتىنا قاراماستان، قازاقستاننىڭ بارلىق جاستارىن ەلىمىزدىڭ كەشەندى جاڭعىرۋىنا اتسالىستىرۋ بولىپ تابىلادى.

تىڭ قوزعالىستىڭ بۇگىنگى قۇرىلتايىندا ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ جاستارعا ساتتىلىك تىلەدى.

«مەن ءوز ءسوزىمدى قازاقتىڭ ءبىرتۋار باتىرى باۋىرجان مومىش ۇلىنىڭ قاناتتى سوزىمەن باستاعىم كەلەدى. باتىرىمىز «20 جاس - تاريحي ەرلىكتەر جاسايتىن جاس. سوعان ءاردايىم ءازىر بولۋ كەرەك» دەگەن ەكەن. ۇلت بولىپ ۇيىسىپ، ەل بولىپ ەڭسەمىزدى كوتەرگەن كەزەڭدە قولعا الار ءىسىمىزدىڭ ءبىرى - جاس ۇرپاقتى تاربيەلەۋ بولدى. حالقىمىزدىڭ بولاشاعى - بۇگىنگى ۇرپاق. قاي عاسىردا بولسىن ۇلت ءومىرىن وركەندەتۋشى سانالى دا سالاۋاتتى، رۋحى بيىك ۇرپاقتى تاربيەلەۋ - قوعام الدىنداعى ەڭ باستى مىندەتتەردىڭ ءبىرى»، - دەدى مينيستر.

نۇرلان ەرمەكبايەۆ ەلباسى اتاپ وتكەندەي، 140 ەتنوستىڭ باسىن قۇرايتىن بارلىق قازاقستاندىقتاردىڭ بىرلىگى - بۇل عالامات قۇندىلىق، سوندىقتان ەتنواسارالىق كەلىسىمدى ساقتاۋدىڭ ماڭىزى زور ەكەنىن اتاپ ءوتتى. سونىمەن قاتار، ەلباسىنىڭ «بولاشاققا باعدار - رۋحاني جاڭعىرۋ» باعدارلامالىق ماقالاسىندا ءبىلىمدى، كوزى اشىق، كوكىرەگى وياۋ بولۋعا ۇمتىلۋ - ءبىزدىڭ قانىمىزدا بار قاسيەت دەپ ايتقانىن جاستاردىڭ ەسىنە سالدى.

«بۇگىن ءبىز بارلىعىن جالپى اقپاراتتاندىرۋ جانە بەلسەندى جاھاندىق بىرىگۋ پروتسەستەرى زامانىندا رۋحاني ادامگەرشىلىك پەن تەحنولوگيا، تەحنوكراتيا اراسىنداعى جولدى ەڭسەرۋ الدىندا تۇرمىز. «رۋحاني جاڭعىرۋ» باعدارلاماسى اياسىندا ءدىن ىستەرى جانە ازاماتتىق قوعام مينيسترلىگى «اتامەكەن» جوباسىن جۇزەگە اسىرىپ جاتىر. ول ەكى «الەۋمەتتىك باستامالار كارتاسى» مەن «جومارت جۇرەك» اتتى جوبالاردان تۇرادى. «الەۋمەتتىك باستامالار كارتاسى» ازاماتتاردىڭ بەلسەندىلىگىن ارتتىرۋعا، «جومارت جۇرەك» دەمەۋشىلىك ەتكەن ازاماتتاردى قولداۋعا ارنالعان»، - دەدى ول.

مينيستر سونىمەن بىرگە، وتكەن جىلى ۇلتتىق قۇندىلىقتاردى ناسيحاتتاۋعا ارنالعان «اباي جولى ۇلتتىق مەكتەبى» دەگەن جوبانى باستاپ، ول قازىرگى ۋاقىتتا كوپتەگەن ج و و- لاردا جۇمىس ىستەپ جاتقانىن ايتتى.

«300 مەكتەپ پەن ج و و، كوللەدجدەر مەن مەكتەپتەردە «تۇلەكتەر تاقتاسى» اتتى ينتەراكتيۆتى تاقتالار ورناتىلدى. «دارىن» مەملەكەتتىك سىيلىعى بيىلدان باستاپ ەكى جىلدا ءبىر رەت ەمەس، جىل سايىن بەرىلەتىن بولادى. قازىرگى ۋاقىتتا ۇكىمەت وسىناۋ سىيلىقتىڭ يەگەرى اتانعان جاستارعا بەرىلەتىن سىياقىنىڭ مولشەرىن ارتتىرۋدى قاراستىرۋدا»، - دەدى ەرمەكبايەۆ.

اۆتور: ايان بەكەن ۇلى