قوستاناي تۇرمەسىندەگى قىز-كەلىنشەكتەر اراسىندا ارۋلار بايقاۋى ءوتتى
بۇل شارا تۇزەتۋ مەكەمەسىندە ءداستۇرلى تۇردە ءوتىپ تۇرادى. نەگىزگى ماقسات - سالاۋاتتى ءومىر سالتىن ناسيحاتتاۋ مەن ەستەتيكالىق تۇرعىدا تاربيەلەۋ. ۇيىمداستىرۋشىلاردىڭ ايتۋىنشا، وسىنداي تاربيەلىك ءمانى بار شارالاردى ءجيى وتكىزۋ جازاسىن وتەۋشىلەردىڭ بوس ۋاقىتىن ءتيىمدى وتكىزۋگە مۇمكىندىك بەرەدى.
«بايقاۋ شارتى بويىنشا، قاتىسۋشىلاردىڭ بويى، سالماعى جانە وتباسىلىق جاعدايى ەسكەرىلەدى. قاتاڭ تالاپتار قويىلماعان سوڭ بايقاۋعا كەز كەلگەن ايەل قاتىسۋعا نيەت ءبىلدىردى. سوتتالعانداردىڭ اراسىندا دا ونەرلى جانداردىڭ بارى انىق. وسىنداي سايىستار بويىنداعى سول دارىندى ارى قاراي شىڭداۋعا سەپتىگىن تيگىزەدى»، - دەيدى ۋ ك-161/11 مەكەمەسىنىڭ پسيحولوگ-مامانى دينارا مادياروۆا.
ارۋلار بايقاۋىنا وبلىستىق حالىق شىعارماشىلىعى ورتالىعى مەن قوستاناي قالاسى اكىمدىگىنىڭ جۇمىسپەن قامتۋ ءبولىمىنىڭ قىزمەتكەرلەرى قازىلىق ەتتى. ناتيجەسىندە جۇلدەگەرلەر «نازىك ارۋ»، «يناباتتى ارۋ»، «سىمباتتى ارۋ» اتالىمدارى بويىنشا ماراپاتتالدى.
ال الاياقتىق ارەكەتى بويىنشا سەگىز جىلعا سوتتالعان جانار ەسىمدى ايەل «كوكتەم ارۋى-2018» بايقاۋىنىڭ جەڭىمپازى اتاندى. ايتا كەتەيىك، ول فرانسۋز جانە اعىلشىن تىلدەرىن ەركىن مەڭگەرگەن.