+7 (701) 759 90 19 Лента
13 °С : استانا
30 °С : الماتى
USD 346.68 EUR 404.02
RUB 5.47 CNY 51.15
جاڭالىقتار

قازاقستان مەن تاجىكستان باسشىلارى سۋ پروبلەماسىن شەشۋ جولدارىن تالقىلادى

14 ناۋرىز 19:28 625
:ءبولىسۋ
قازاقستان مەن تاجىكستان باسشىلارى سۋ پروبلەماسىن شەشۋ جولدارىن تالقىلادى

استانا. قازاقپارات - سۋ پروبلەماسىن شەشۋدە تاجىكستانمەن ۇستانىمىمىز بىردەي. بۇل تۋرالى بۇگىن تاجىكستان پرەزيدەنتى ەمومالي راحمونمەن كەلىسسوزدەردەن كەيىنگى بىرلەسكەن مالىمدەمە جاساۋ بارىسىندا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات.

سۋ- ەنەرگەتيكا پروبلەماسى ءار ۋاقىتتا ماڭىزدى تاقىرىپ بولدى. ءامۋداريا مەن سىرداريا وزەنىنىڭ بويىندا 70 ميلليون ادام ءومىر ءسۇرىپ جاتىر. اتالعان ادامداردىڭ ومىرلەرى وسى وزەندەرمەن بايلانىستى. ءوزارا ءتيىمدى ىنتىماقتاستىق، بارلىق ماسەلەلەردى كەلىسسوزدەر جولىمەن شەشۋ - ءبىزدىڭ بارلىق حالىقتارىمىز ءۇشىن وتە ۇلكەن مانگە يە. ورتالىق ازيانىڭ ترانسشەكارالىق وزەندەرىنىڭ رەسۋستارىن بارلىق حالىقتاردىڭ يگىلىگى ءۇشىن پايدالانۋ وتە ماڭىزدى. بۇل ماسەلەدە تاجىكستانمەن بىردەي ۇستانىمدامىز»، - دەدى نۇرسۇلتان نازاربايەۆ.

قازاقستان پرەزيدەنتى وسى رەتتە تاجىكستان باسشىسىمەن سۋ پروبلەماسىن شەشۋدىڭ ءوزارا ءتيىمدى جولدارىن قاراستىرۋ قاجەتتىلىگىن تالقىلاعانىن ايتتى.

«ارالدى قۇتقارۋ قورىنا ايرىقشا ءرول بەرىلەدى جانە اعىمداعى جىلى ءتوراعالىق ەتۋشى تۇرىكمەنستان تامىزدا فورۋم وتكىزبەك، ءبارىمىز سول جەردە جينالامىز»، - دەدى مەملەكەت باسشىسى.

ەلباسىنىڭ ايتۋىنشا، كەلىسسوزدەر بارىسىندا وڭىرلىك جانە جاھاندىق كۇن تارتىبىندەگى وزەكتى تاقىرىپتار بويىنشا دا پىكىر الماسىلدى. اۋعانستانداعى وقيعالارعا بايلانىستى وڭىرلىك قاۋىپسىزدىك ماسەلەلەرىنە باسا ءمان بەرىلدى.

«تولىقتاي العاندا، ءبىز قازاقستان مەن تاجىكستاننىڭ حالىقارالىق ارەناداعى بارلىق ماڭىزدى ماسەلەلەر بويىنشا ۇستانىمى ۇقساس ەكەندىگىن تاعى دا قۋاتتادىق»، - دەدى ەلباسى.

اۆتور: مارلان جيەمباي


:ءبولىسۋ
ونلاين قىزمەتكەرلەر
مۇراعات