نۇرسۇلتان نازاربايەۆ پەن ەمومالي راحمون قانداي ماسەلەلەردى تالقىلادى
«ءبىزدىڭ كەزدەسۋىمىزدىڭ اياسىندا مەملەكەتارالىق قارىم- قاتىناسقا، وڭىرلىك جانە جاھاندىق كۇن تارتىبىنە قاتىستى پروبلەمالاردىڭ بارلىق سپەكتورلارى بويىنشا پىكىر الماسىلدى. ساۋدا- ەكونوميكالىق ىنتىماقتاستىققا باسا نازار اۋدارىلدى. قازاقستان تاجىكستان ءۇشىن ءىرى ەكسپورتتىق سەرىكتەس سانالادى. ءبىز ءۇشىن دە تاجىكستان ماڭىزدى ساۋدا سەرىكتەس. وتكەن جىلدىڭ قورىتىندىسى بويىنشا، ءوزارا تاۋار اينالىمىنىڭ كولەمى شامامەن 800 ميلليون دوللارعا جەتىپ، ءبىر جىلدا 30 پايىز ءوسىم كورسەتتى. الەمدىك ەكونوميكاداعى اۋمالى- توكپەلى جاعدايدا بۇل وتە جاقسى كورسەتكىش»، - دەپ اتاپ ءوتتى ەلباسى.
قازاقستان پرەزيدەنتى تاجىك ارىپتەسىمەن ءالى دە بولسا ەكى ەلدىڭ اراسىندا پايدالانىلماعان الەۋەتتىڭ مول ەكەندىگىن، تاياۋ ۋاقىتتا تاۋار اينالىمى كولەمىن ءتىپتى 2 ميلليارد دوللارعا دا جەتكىزۋ جايى تالقىلانعانىن اتاپ ءوتتى. سونىمەن قاتار قازىرگى ۋاقىتتا تاجىكستان، وزبەكستان، قىرعىزستان جانە تۇرىكمەنستان ەلدەرىمەن وتە بايىپتى كەلىسسوزدەر جۇرگىزگەنىن ايتتى.
«جابىق بولعان تەمىر، اۆتوموبيل جولدارى اشىلىپ، بىزگە بارىنشا قولايلى جاعدايلار جاسالۋدا. تاجىكستاندا جاڭعاق، قارا ورىك، انار ءپىستى. ال بىزدە ءالى قار جاتىر جانە ءبىز اتالعان جاڭا پىسكەن جەمىستەردىڭ سورەلەرىمىزدە بولعانىن قالايمىز. كەلىسسوزدەر باراسىندا، جول كارتاسىن جاساۋعا ۋاعدالاستىق، وندا بۇل ماسەلەنى قالاي جۇزەگە اسىرۋ قاجەتتىگىن اتاپ وتەتىن بولامىز»، - دەدى نۇرسۇلتان نازاربايەۆ.
سونىمەن قاتار ەلباسى بۇگىندە قازاقستاندا قۇراستىرىلعان جەڭىل كولىكتەر، تەمىر جول لوكوموتيۆتەرى تاجىك نارىعىنا شىققانىن باسا ايتتى.
«سونىمەن قاتار، ءوزارا ينۆەستيتسيا شارتتارىن، ەكى ەلدىڭ بيزنەس كاسىپورىندارىنىڭ قىزمەتىن ودان ارى جاقسارتۋ شارتتارىنىڭ ماڭىزدىلىعى اتالىپ ءوتىلدى. وسى ماقساتتا ەلدەر اراسىندا ىسكەرلىك كەڭەسىن قۇرىپ، بيزنەس فورۋمدار وتكىزۋ، بايلانىستاردى جولعا قويۋ مۇمكىنشىلىكتەرىن تالقىلادى. بۇعان قوسا، قازاقستان تاجىك ەكونوميكاسىنىڭ ءىرى ينۆەستورلارىنىڭ ءبىرى سانالادى. سوڭعى -5-7 جىلدا 120 ميلليون ينۆەستيتسيا قۇيدى. وسى تۇرعىدا ءبىز استانا- دۋشانبە تىكەلەي اۋە رەيسىن اشۋ ماسەلەسىن قاراستىردىق»، - دەدى قازاقستان پرەزيدەنتى.
اۆتور: مارلان جيەمباي