قازاقستان مەن تاجىكستان ءدىن سالاسىندا بىرگە جۇمىس ىستەۋگە ۋاعدالاستى
اتاپ ايتقاندا، ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ پەن تاجىكستان ۇكىمەتى جانىنداعى ءدىن ىستەرى، ۇلتتىق داستۇرلەر، مەرەكەلەر مەن سالت- جورالاردى رەتتەۋ كوميتەتىنىڭ ءتوراعاسى داۆلوتزادا سۋلايمون ىنتىماقتاستىق تۋرالى مەموراندۋمعا قول قويدى.
قۇجات اياسىندا ءدىن سالاسىنداعى مەملەكەتتىك ساياساتتى جۇرگىزۋ، ونىڭ ىشىندە ءدىني ەكسترەميزمنىڭ الدىن الۋ ماسەلەلەرى بويىنشا تاجىريبە الماسۋ قاراستىرىلعان. سوندىقتان تاراپتار ءوزارا قىزىعۋشىلىق تۋدىرعان تاقىرىپتار تۇرعىسىندا كەزدەسۋدەر مەن جيىندار ۇيىمداستىرماق. ناقتىراق ايتقاندا، دەسترۋكتيۆتى ءدىني يدەولوگيانىڭ ءارى ءدىني ەكسترەميزم كورىنىستەرىنىڭ تارالۋىن بولدىرماۋ ماقساتىندا ءتۇسىندىرۋ جۇمىستارىن ىسكە اسىرۋ جوسپارلاۋدا.
بۇدان بولەك، ەكى ەلدىڭ ۆەدومستۆولارى بىرلەسكەن زەرتتەۋلەر جۇرگىزۋ ءۇشىن عىلىمي ۇيىمدار اراسىنداعى ىنتىماقتاستىقتى دامىتۋعا نيەت بىلدىرۋدە.
قۇجاتتا تاراپتار بىرلەسە ءوز مەملەكەتتەرىنىڭ ۇلتتىق زاڭنامالارى اياسىندا ءدىن سالاسىنداعى ىنتىماقتاستىقتى جۇزەگە اسىراتىندىعى كورسەتىلگەن.