قازاقستان مەن وزبەكستانعا كەلگەن تۋريستەر ءۇشىن ورتاق ۆيزا جاسالماق

استانا. قازاقپارات - قازاقستان مەن وزبەكستان الداعى ۋاقىتتا تۋريستەر ءۇشىن ورتاق ۆيزا شىعارۋدى كوزدەۋدە.

بۇل تۋرالى استانادا وتكەن قازاقستان رەسپۋبليكاسى مەن وزبەكستان رەسپۋبليكاسى اراسىنداعى ەكىجاقتى ىنتىماقتاستىق جونىندەگى ۇكىمەتارالىق كوميسسياسىنىڭ 17-وتىرىسىندا تىلشىلەرمەن تىلدەسكەن ق ر مادەنيەت جانە سپورت ءمينيسترى ارىستانبەك مۇحامەدي ۇلى ايتىپ بەردى، دەپ حابارلايدى «قازاقپارات» ح ا ا ءتىلشىسى.

«قازىرگى ۋاقىتتا ءبىزدىڭ مەملەكەتتەر ۆيزا تۋرالى كەلىسىپ جاتىر. دەمەك، وزبەكستان اۋماعىنداعى تۋريستەر ءۇشىن بەرىلەتىن ۆيزا قازاقستاندا دا جارامدى بولار ەدى. بۇل بىلايشا ايتقاندا ورتاق ۆيزا بولادى. قازاقستانعا كەلگەن شەتەلدىك مەيماندار (سول ۆيزامەن - اۆت.) وزبەكستانعا دا بارا الار ەدى»، - دەدى مينيستر.

ارىستانبەك مۇحامەدي ۇلىنىڭ ايتۋىنشا، اتالعان كەلىسىمگە ەكى ەلدىڭ سىرتىق ىستەر مينيسترلىكتەرىنىڭ قۇرىلىمدارىمەن تۋريستىك ىنتىماقتاستىق تۇرعىسىندا قول قويىلعان.

«بۇگىنگى كوميسسيا وتىرىسىنىڭ سوڭىندا وسى ۋاعدالاستىق اياسىندا كەلىسىمگە قول قويىپ، ۇكىمەتكە قاۋلى ۇسىنامىز. البەتتە، ۋاقىت ءوتىپ بارا جاتقاندىقتان، ءبىز بۇل پروتسەسستى تەزدەتۋىمىز كەرەك»، - دەدى مينيستر.

ەسكە سالا كەتسەك، بۇگىن استانادا وتكەن قازاقستان رەسپۋبليكاسى مەن وزبەكستان رەسپۋبليكاسى اراسىنداعى ەكىجاقتى ىنتىماقتاستىق جونىندەگى ۇكىمەتارالىق كوميسسياسىنىڭ 17-وتىرىسىندا قازاقستان مەن وزبەكستان تاراپى ءبىرقاتار ەكىجاقتى كەلىسىمدەرگە قول قويعان بولاتىن.