نۇرلان ونەربايەۆ قازاقتىڭ اقجاۋلىقتى انالارىنا تاعزىم ەتتى - فوتو
«بيىل استانانىڭ تورىندە قانشاما ونەر كەشى وتەدى. ويتكەنى، بيىل ءبىزدىڭ ەلوردامىز استانانىڭ 20 جىلدىق مەرەيتويى، قۇتتى بولسىن اعايىن! مىنە، وسى مەرەكەنىڭ العاشقىسى كوكتەمدە جادىراپ، ءبارىمىزدى قۋانتىپ كەلگەن انالارىمىزدىڭ مەرەكەسى»، - دەدى ءان كەشى بارىسىندا نۇرلان ونەربايەۆ.
سونىمەن قاتار ول ءان كەشىنە جينالعان بارلىق قاۋىمدى انالارىمىزدى ايالاپ، اق ءسۇت بەرگەنى ءۇشىن، مەيىرىمى، ماحابباتى ءۇشىن تاعى دا ءبىر رەت تاعزىم ەتۋگە شاقىرىپ، كەزەكتى ءانىن انالارعا ارنادى.
«قازىر تىڭدايتىن اندەرىڭىز مەنىڭ بۇگىنگى كەشىمنىڭ وزەكتى ءانى بولماق. بۇعان دەيىن مەن قانشاما انا تۋرالى ءان ايتتىم. الايدا بۇل ءانىمنىڭ ورنى بولەك. ويتكەنى، بۇل ءاندى ءوزىمنىڭ اناما ارناعىم كەلەدى. انام ارقىلى بۇكىل قازاقتىڭ اقجاۋلىقتى انالارىنا تاعزىمىم دەپ قابىل الىڭىزدار»، - دەگەن ول «جالعانداعى جالعىزىمسىڭ انا» دەپ اتالاتىن ءاندى ورىندادى.
سونىمەن قاتار، نۇرلان ونەربايەۆ قازاق تاريحىندا ەرلەرمەن قاتار اتقا ءمىنىپ، ەلىمىزدى، جەرىمىزدى قورعاعان ارۋلاردىڭ دا از بولماعاندىعىن باسا ايتا كەلە «مەن قازاقتىڭ قىزدارىنا قايران قالام» دەپ اتالاتىن حالىقتىڭ اراسىندا كەڭىنەن تاراعان تۋىندىسىن ورىندادى.
ايتا كەتەرلىگى، 2011-جىلى ەلوردادا نۇرلان ونەربايەۆتىڭ شىعارماشىلىق كەشى، ال 2016-جىلى «قازاقستان» ۇلتتىق ارناسىنىڭ «سالەم، قازاقستان!» جوباسى اياسىندا «اۋىلعا ساعىنىش» دەگەن اتاۋمەن كونسەرتى وتكەن بولاتىن. جالپى، ءانشى 2011-جىلدان بەرى موڭعولياداعى، قىتايداعى قازاق قانداستارىمىزدى ارالاپ، ەلىمىزدىڭ بىرنەشە ايماقتارىندا ونەر كورسەتتى. ال الماتىداعى ەڭ سوڭعى شىعارماشىلىق كەشى 2017-جىلدىڭ 24- قاراشاسىندا رەسپۋبليكا سارايىندا «ساعىنىش» دەگەن اتاۋمەن ۇيىمداستىرىلدى.
نۇرلان ونەربايەۆتىڭ ۇلكەن ساحناداعى انشىلىك، ورىنداۋشىلىق ونەر جولى 1986-جىلداردان باستالدى. ول «ساعىنىش»، «اناشىم»، «اكە ارمانى»، «قازاق قىزى»، «سۇلۋلىق»، «اۋىلىم»، «تۋعان كۇن»، «ساعىندىم اۋىلدى»، «جان اعا»، «ماحاببات كوكتەمى»، «قاراعىم-اي»، «اققۋىم»، «تاڭعى تىلەك»، «اق تىلەك»، «اي دا، كۇن دە» اندەرىن، سونداي-اق حالىق اندەرىنەن «دۋداراي»، «ساندۋعاش»، «ءبىر ءبيداي ارپا»، «ۇكىلى كامشات»، «وي كوك»، «بەۋ، ايداي»، «بيپىل» اندەرىن ورىنداپ ءجۇر.
كونسەرتتىك باعدارلامامەن تۇركيا، يتاليا، جاپونيا، چەحيا، سلوۆاكيا، ماروككو، قىتاي، گەرمانيا، موڭعوليا ەلدەرىندە بولدى.
اۆتور: مارلان جيەمباي