جەتى پروتسەنتتىك يپوتەكا: جاڭا باعدارلاما اياسىندا قانشا پاتەر سالىنادى؟
«ءبىزدىڭ ەسەبىمىز بويىنشا (جىل سايىن - اۆت.) 100000 پاتەر، 5 ميلليون شارشى مەتر جاڭادان قۇرىلىس نىساندارى سالىنادى دەگەن ءسوز. نەسيە بەرۋ جاعىنان دا ۇلكەن سەرپىلىس بولادى. سوسىن تۇرعىن ءۇي سالۋ قۇرىلىسىندا دا ۇلكەن سەرپىلىس بولادى. ەندى، بۇل جەردە ەڭ جاۋاپتى مەكەمە ول - ۇلتتىق بانك. ءبىزدىڭ مينيسترلىك تە بىرگە جۇمىس جاسايتىن بولادى»، - دەدى قۇرىلىس ىستەرى جانە تۇرعىن ءۇي كوممۋنالدىق شارۋاشىلىق كوميتەتىنىڭ ءتوراعاسى مارحابات جايىمبەتوۆ قازاقپارات تىلشىسىنە بەرگەن سۇحباتىندا.
كوميتەت باسشىسىنىڭ ايتۋىنشا، جاڭا باعدارلاماعا ءبىر تريلليون تەڭگە تارتىلسا، تۇرعىن ءۇي سالاسىندا ءبىراز شارۋانى تىندىرىپ تاستاۋعا بولادى. ەندىگى كەزەكتە ۇلتتىق بانكتىڭ جانىنان ارنايى كومپانيانى قۇرىپ، تەزدەتىپ جۇمىسقا كىرىسۋ كەرەك.
ايتا كەتەيىك، پارلامەنت پالاتالارىنىڭ بىرلەسكەن وتىرىسىندا مەملەكەت باسشىسى نۇرسۇلتان نازاربايەۆ قازاقستاندىقتاردى باسپانامەن قامتاماسىز ەتۋدىڭ جاڭا باعدارلاماسىن ازىرلەۋدى تاپسىردى. وسىعان بايلانىستى ق ر ۇلتتىق بانكى جانىنان 7 پروتسەنتتىك يپوتەكانى بەرەتىن جاڭا كومپانيا قۇرىلادى. ق ر ينۆەستيتسيالار جانە دامۋ ءمينيسترى جەڭىس قاسىمبەكتىڭ ايتۋىنشا، ارزان يپوتەكا بارىنە جەتەدى.