ەلباسىنىڭ بەس باستاماسى قازاقستاندىقتاردىڭ ءومىر ساپاسىن جاقسارتۋعا باعىتتالعان - ساراپشى
بۇل تۋرالى ق ر پرەزيدەنتى جانىنداعى مەملەكەتتىك باسقارۋ اكادەمياسى قولدانبالى زەرتتەۋلەر ينستيتۋتىنىڭ ديرەكتورى ايگۇل كوشەربايەۆا مالىمدەدى، دەپ حابارلايدى قازاقپارات.
«مەنىڭ ويىمشا، مەملەكەت باسشىسى اتاپ كورسەتكەن بەس باستامانىڭ بارلىعى ءومىر ساپاسىن جاقسارتۋعا باعىتتالعان. ءومىر ساپاسى دەگەنىمىز - ۇلتتىڭ باسەكەگە قابىلەتتىلىگىنىڭ نەگىزگى كومپونەنتتەرىنىڭ ءبىرى. قازاقستان باسەكەگە قابىلەتتى بولىپ، دامىعان 30 ەلدىڭ قاتارىنا ەنۋى كەرەك»، - دەدى ايگۇل كوشەربيەۆا ق ر پرەزيدەنتى جانىنداعى ستراتەگيالىق زەرتتەۋلەر ينستيتۋتىندا ەلباسى باستامالارىن تالقىلاۋعا ارنالعان جيىندا.
ساراپشىنىڭ ايتۋىنشا، وڭىرلەردە حالىقتىڭ باسپاناعا قولجەتىمدىلىك دەڭگەيى ءارتۇرلى.
«كەي وڭىرلەردە ءبىر ادامعا 22 شارشى مەتر باسپانادان كەلەدى، ال كەي وڭىرلەردە بۇل كورسەتكىش 15 شارشى مەترگە دەيىن تومەندەيدى. ەگەر قولجەتىمدى باسپانا باستاماسى ساپالى جۇزەگە اسىرىلسا، حالىقتىڭ باسىم بولىگى پاتەرگە قول جەتكىزىپ، ءوز جاعدايىن دۇرىستاي الادى»، - دەيدى ا. كوشەربايەۆا.