قۋراعان اعاشتان كادەسىي جاسايتىن قاريا ءوز ءۇيىن كورمەگە اينالدىرعان - فوتو

اقتوبە. قازاقپارات - اقتوبەلىك قاريا حاكيم بەكمۇحامەد اعاش تامىرىنان، دىڭگەگىنەن، بۇتاعىنان ءتۇرلى كادەسىي جاسايدى.

كەپتىرىلگەن، سىرلانعان قولونەر بۇيىمدارىن تۇگەل ۇيىندە ساقتايدى، دەپ حابارلايدى قازاقپارات ءتىلشىسى.

اقتوبە قالاسىندا تۇراتىن قاريا حاكيم بەكمۇحامەد سۋ شارۋاشىلىعى سالاسىندا جۇمىس ىستەگەن. مەملەكەتتىك قىزمەتتە جۇرگەنىمەن اتادان تاراعان شەبەرلىگىنىڭ ارقاسىندا ونداعان بۇيىم جاسادى. ءارقايسىسىنىڭ ءوز اتاۋى بار، ءمان-ماعىناسى زور. ءبىراق ونىڭ بۇل ونەرىن تابيعاتقا جاقىن ادام عانا تۇسىنە الادى. بارلىعى 40 قا جۋىق بۇيىم ۇيدە ساقتاۋلى. ءوز ءۇيىن كورمەگە اينالدىرعان قاريا بۇيىمىن ساتپايدى، اتادان بالاعا ميراس ەتىپ قالدىرادى.

«قايىڭ، سەكسەۋىل، قارا اعاش، قاراعاي اعاشتارى بار. مۇنىڭ ءبارى ءار جىلدارى جاسالعان بۇيىم. نەگىزى 70-جىلداردان باستاپ اعاش جونىپ، بۇيىم جاسادىم. سوڭعى ەكى جىلدان بەرى جاڭا دۇنيە جاساۋدى توقتاتتىم. شيكىزات، ياعني، اعاش تابۋ قيىن. كەز كەلگەن اعاشتان جاقسى بۇيىم شىقپايدى»، - دەدى شەبەر حاكيم بەكمۇحامەد.

كەز كەلگەن ادام اعاشتان جاسالعان بۇيىمنىڭ ءمان-ماعىناسىن تۇسىنە المايدى. ول ءۇشىن تابيعاتتى ءسۇيىپ، تاۋ- تاستىڭ ءتىلىن ۇعىنا ءبىلۋ كەرەك. اڭشى، بالىقشى، ورمانشى... سونىمەن قاتار، قولونەر شەبەرى دە اعاشتاعى سيقىردى سەزىنەدى. سوندىقتان بولسا كەرەك، قالتالى ازامات قولونەر بۇيىمدارىنىڭ ءوز باعاسىن بەرە المادى.

«اقتوبەنىڭ قالتالى ازاماتى ء«ۇيىڭىزدى ساتىڭىز» دەپ سۇرادى. ساتا المادىم. كەيىن قولونەر بۇيىمدارىنىڭ جارتىسىن ساتىپ الۋعا ۇسىنىس بەردى. «شىن كوڭىلىڭمەن العىڭ كەلەتىن بولسا، كەز كەلگەنىن الىپ، باعاسىن بەر» دەپ ايتتىم. ونىڭ ۇسىنىسى مەنىڭ ويىمنان شىققان كەزدە ساتاتىن ەدىم. ءبىراق ءبىر توقتامعا كەلە الماي، كەتىپ قالدى. شىنىن ايتقاندا، قالتالى ازاماتتار بىرەگەي تۋىندىلاردى ساتىپ الۋعا، شىن باعاسىن بەرۋگە دايىن ەمەس. ا ق ش- تا وقيتىن نەمەرەم «اتا، ءسىزدىڭ قولىڭىزدان شىققان دۇنيەنىڭ باعاسى قىمبات» دەپ ايتادى. «يسپانيادا بولساڭىز، ميلليونەر بولاسىز» دەپ قىزىعاتىندار دا بار. جابىق ءباسساۋداعا سالۋدى دا سۇرادى. ءبىراق بارىنەن باس تارتتىم. قارتايدىم، ءبىراق بالالاردىڭ نە ىستەيتىنىن بىلمەيمىن. ءبارى ۇرپاعىما قالادى»، - دەدى شەبەر.

دەگەنمەن قاريا ەش مويىمادى. ول ءۇشىن باعا، اقشا ماڭىزدى ەمەس. وزگە ادامدار تۇسىنە مە، جوق پا وعان دا ءمان بەرمەيدى.

«ەشكىم شاڭىن سۇرتپەيدى، ۇستامايدى. «مەنىڭ اعاشتارىما قول تيگىزبەڭدەر» دەپ بارىنە ەسكەرتتىم. كىر قولدى اعاشقا تيگىزۋگە بولمايدى. ءبارىن ءوزىم كۇتىپ، ۇستايمىن. نەمەرەلەرىم دە ويناپ جۇرگەندە ۇستامايدى. شىنىمدى ايتسام، بالالارىم ەمەس، نەمەرەم قىزىعادى. كىتابىن بەرىپ، جاسالۋ تەحنولوگياسىن ۇيرەتىپ ءجۇرمىن. اعاشتان جاڭا دۇنيە جاساپ شىعارۋ قيىن. ەسكى اعاش قۋرايدى، قۇرت جەيدى، ءشىريدى. تازارتىپ، ەكىنشى ءومىر سىيلاۋ ءۇشىن وي ۇشقىرلىعى كەرەك. ال اعاش جونۋعا، كەسۋگە قاجەتتى قۇرال-جابدىقتىڭ باسىم بولىگىن ءوزىم جاسادىم»، - دەدى ول.

شەبەر ۇزاق جىلدان بەرى اقتوبە قالاسىندا وتكىزىلەتىن كورمەگە قاتىسا الماي ءجۇر. سوندىقتان ونى اقتوبەلىكتەر تانىمايدى. العاشىندا رەنجىپ، كەيىن ءوز تۋىندىلارىنا ارناپ كىتاپ شىعاردى. بار بولعانى 50 دانا كىتاپ كەيىنگى ۇرپاق ءۇشىن وشپەس تارتۋ بولىپ تۇر. مۇندا ءار تۋىندى جەكە سۋرەتكە ءتۇسىرىلىپ، ونىڭ ءمان-ماعىناسى جازىلعان.

اۆتور: التىناي ساعىندىقوۆا