ماڭعىستاۋدا قىز-كەلىنشەكتەر قارۋدان وق اتىپ جارىستى

ماڭعىستاۋ وبلىسى. قازاقپارات - اقتاۋدا حالىقارالىق ايەلدەر مەرەكەسى قارساڭىندا ەرەكشە جارىس ءوتتى.

ماڭعىستاۋ وبلىسىنىڭ ىشكى ىستەر ورگاندارىندا قىزمەت ەتەتىن قىز-كەلىنشەكتەر اراسىندا «مەرگەن قىزدار» اتتى سايىس ۇيىمداستىرىلدى، دەپ حابارلايدى قازاقپارات ءتىلشىسى.

باسەكەگە بارلىعى 26 بۇرىمدى پوليتسەي قاتىستى. ولار «ماكاروۆ» تاپانشاسىنان وق اتىپ، شەبەرلىكتەرىن سىنعا سالدى.

ماڭعىستاۋ وبلىستىق ءىىد ارنايى دايارلىق باسقارماسىنىڭ باستىعى، پوليتسيا پولكوۆنيگى ەرماحان اققوزيەۆتىڭ ايتۋىنشا، جارىستار ەكى ديستسيپلينا بويىنشا ءوتتى - ستاتيكالىق جانە تاكتيكالىق. ستاتيكالىق كەزەڭدە مەرگەندەر نىساناعا ءدوپ تيگىزۋى ءتيىس بولسا، تاكتيكادا - جىلدامدىققا ءمان بەرىلدى.

ۇيىمداستىرۋشىلاردىڭ ايتۋىنشا، اتۋ دايارلىعى ساباعىندا كورسەتىلگەن جاتتىعۋلاردى ايەل قىزمەتكەرلەر تەز مەڭگەرىپ الادى ەكەن. ويتكەنى ولاردىڭ ساۋساقتارى باسۋ شۇرىپپەسىنە وتە يكەمدى. سونداي مەرگەندىگىمەن كوزگە تۇسكەن قاتىسۋشىنىڭ ءبىرى - ءى ءى د شتاب باسقارماسىنىڭ بولىمشە باستىعى، پوليتسيا مايورى اقمارال كوكەنوۆا. قۇقىق قورعاۋ ورگانىندا 14 جىل جۇمىس ىستەگەن ول، مۇنداي سايىسقا ءبىرىنشى رەت قاتىسقان.

«بىزدەر ءۇشىن، قىزدار ءۇشىن بۇل كەرەمەت سايىس بولىپ وتىر. ىشكى ىستەر ورگانىندا قىزمەت اتقاراتىن بولعاندىقتان بىزدەر قانداي تاۋەكەلگە دە دايىن بولۋىمىز كەرەك. قولىمىزعا قارۋدى ءبىرىنشى رەت ۇستاپ تۇرعانىمىز جوق. ءبىز ءۇشىن ۇيرەنشىكتى جاعداي. مەرگەن قىز اتانۋعا ءارقايسىسىمىز تىرىسۋدامىز»، - دەيدى اقمارال كوكەنوۆا.

سايىس قورىتىندىسىندا ءى ءى د شتاب ينسپەكتورى ناتاليا ەۆستەگنەيەۆا، ءى ءى د جىلدام قيمىلدايتىن ارنايى جاساقتىڭ ينسپەكتور-پسيحولوگى ايگەرىم يباتۋلايەۆا، جاڭاوزەن قالالىق ءى ءى ب يۋۆينالدى پوليتسيا توبىنىڭ ينسپەكتورى يسكرا اسالوۆا، ءى ءى د جەدەل كريميناليستيكا باسقارماسىنىڭ ينسپەكتورى بالجان كۋبەگەنوۆا جەڭىسكە جەتىپ، كۋبوكتارمەن ماراپاتتالدى.

اۆتور: ايگەرىم اشىقبايەۆا