استانادا ورالحان بوكەيدىڭ اعىلشىن تىلىندەگى «كىسى كيىك» كىتابىنىڭ تۇساۋى كەسىلدى - فوتو

استانا. قازاقپارات - ەلوردادا قازاقتىڭ ءبىرتۋار قالامگەرى ورالحان بوكەيدىڭ اعىلشىن تىلىندەگى «كىسى كيىك» كىتابىنىڭ تۇساۋى كەسىلدى، دەپ حابارلايدى «قازاقپارات» ح ا ا ءتىلشىسى.

استاناداعى «مارريوت» قوناق ۇيىندە وتكەن تۇساۋكەسەرگە قازاقستاننىڭ ەڭبەك سىڭىرگەن قايراتكەرى الىبەك اسقاروۆ پەن ەلىمىزگە بەلگىلى جازۋشىلار قۋانىشباي قۇرمانعالي، كادىربەك سەگىزبايەۆ كەلدى. سونىمەن بىرگە، ايتۋلى شاراعا كىتاپتى اۋدارعان سايمون حوللينگسۆورت پەن سايمون گەگەن لوندوننان ارنايى ۇشىپ كەلىپ، شاراعا قاتىستى. اۋدارماشىلار ورالحان بوكەيدىڭ كىتابىن ا. كيمنىڭ قازاق تىلىنەن ورىس تىلىنە ءتارجىمالانعان نۇسقاسىن اۋدارعان.

حالىقارالىق قازاق پەن كلۋبىنىڭ پرەزيدەنتى، بەلگىلى پۋبليتسيست بيگەلدى ءعابدۋلليننىڭ ايتۋىنشا، جازۋشىنىڭ كىتابىن اعىلشىن تىلىنە اۋدارۋعا «قازاق تەلەكوم» ا ق دەمەۋشىلىك ەتكەن. بيگەلدى عابدۋللين اعىلشىن تىلىندەگى باسىلعان كىتاپتى ەڭ ءبىرىنشى جازۋشىنىڭ قارىنداسى عاليا بوكەي قىزىنا سىيلادى.

«حالىقارالىق قازاق پەن كلۋبىنىڭ پرەزيدەنتى بولىپ كەلگەلى الدىمىزعا ءبىر ماقسات قويدىق. ءبىز ادەبيەتىن عانا ەمەس، قازاقتىڭ ءوزىن ءالى دەتولىق تانىپ جاتىر دەپ ايتا المايمىز. ابايىمىزدى بىلمەيدى. سوندىقتان، ءبىزدىڭ ادەبيەتىمىزدى الەمگە تانىتۋدىڭ ءبىر عانا جولى بار - ونى اعىلشىن تىلىنە اۋدارۋ. سەن جازۋشى رەتىندە اعىلشىن تىلىندە كىتابىڭ شىقپاسا، سەن دۇنيەجۇزىندە جوقسىڭ. لوندونداعى اۋدارما شەبەرلەرىنىڭ وتە ساپالى جۇمىسىنىڭ باعالانىپ، لوندوندا ۇلتتىق ادەبيەتتىڭ ەڭ ءساتتى اۋدارىلعان تۋىندىلارىنىڭ قاتارىنا ەنىپ وتىر. ەندى لوندونداعى Penguin باسپاسى ءوزىنىڭ قارجىسىمەن ورالحان بوكەيدىڭ كىتابىن باسىپ، اۋدارماشىلارعا قالاماقىسىن بەرگەلى وتىر»، - دەيدى بيگەلدى عابدۋللين.

ايتا كەتسەك، وسى ۋاقىتقا دەيىن قازاق پەن كلۋبى دەمەۋشىلەردىڭ كومەگىمەن اعىلشىن تىلىندە مۇقاعالي ماقاتايەۆتىڭ «تاڭدامالى ولەڭدەرى»، بەردىبەك سوقپاقبايەۆتىڭ «مەنىڭ اتىم قوجا»، ولجاس سۇلەيمەنوۆتىڭ «كود سلوۆا»، ءابىش كەكىلبايەۆتىڭ «اڭىزدىڭ اقىرى»، گەرولد بەلگەر مەن سماعۇل ەلۋبايدىڭ كىتاپتارىن باسىپ شىعارعان.