19:04, 21 - اقپان 2018 | GMT +6
ورالمان مارتەبەسى ءۇش ايعا ۇزارتىلماق
استانا. قازاقپارات -ءماجىلىس دەپۋتاتى ايگۇل نۇركينا بۇگىن العاشقى وقىلىمدا ماقۇلدانعان حالىقتىڭ جۇمىسپەن قامتىلۋى جانە كوشى- قون ماسەلەسى تۋرالى زاڭ جوباسى بويىنشا ورالمان مارتەبەسىن ءۇش ايعا ۇزارتۋ كوزدەلىپ وتىرعانىن ايتتى.
«زاڭ جوباسىندا ەلباسى جول اشىپ بەرگەن ۇلى كوشپەن اتاجۇرتقا ورالعان قانداستارىمىزدىڭ تاعى ءبىر وزەكتى ماسەلەسى شەشىمىن تاپقالى وتىر. سەبەبى قازىرگى تاڭدا شەتەلدەن كەلگەن مىڭداعان ورالمان وبەكتيۆتى جانە سۋبەكتيۆتى سەبەپتەرمەن قولدانىستاعى زاڭنامادا قاراستىرىلعان ءبىر جىل ىشىندە قازاقستان ازاماتتىعىن الۋعا قاجەتتى قۇجاتتارىن جيناپ، تاپسىرىپ ۇلگەرە الماي قيىندىق كورىپ جۇرگەندىگى بەلگىلى. بۇل جونىندە ولار پارلامەنتكە تالاي رەت حات جازىپ، ورالمان مارتەبەسىنىڭ مەرزىمىن ۇزارتۋ جونىندە ءوتىنىش بىلدىرگەن بولاتىن. مىنە، وزەكتى ماسەلەنى شەشۋ ماقساتىندا حالىقتىڭ كوشى- قونى تۋرالى زاڭ جوباسىنىڭ 11-بابىنا ءتيىستى تۇزەتۋ ەنگىزىلىپ، الىستان كەلگەن اعايىننىڭ وتىنىشتەرى بويىنشا ورالمان مارتەبەسىن ءۇش ايعا ۇزارتۋ كوزدەلىپ وتىر» ، - دەدى دەپۋتات.
Baq.kz