تۇرگەن: ايۋلى سارقىراماسىنا سەرۋەن - فوتو

 استانا. قازاقپارات - بۇگىن «قازاقستاننىڭ سوكرالدى گەوگرافياسى» باعدارلاماسى نەگىزىندە جۇرگىزىپ كەلە جاتقان ساياحاتىمىزدى الماتى وبلىسى، تۇرگەن شاتقالىنداعى ايۋلى سارقىراماسىنىڭ قىسقى كورىنىستەرىنە ارنايمىز.

تۇرگەن شاتقالى - الماتىدان شىعىسقا قاراي 70 شاقىرىم جەردە ورنالاسقان. ءبىز شاتقالعا جاقىنداپ قالعاندا ارى- بەرى جىلجىپ جاتقان تۇمان بۇلتتار قارسى الدى.

 

ايۋلى سارقىراماسىنا ءوتۋ ءۇشىن ىلە- الاتاۋ مەملەكەتتىك ۇلتتىق تابيعي پاركى رەسپۋبليكالىق مەملەكەتتىك مەكەمەسىنىڭ تۇرگەن فيليالىنىڭ باقىلاۋ- تەكسەرۋ بەكەتىنەن ءوتۋ كەرەك. كىرۋ جارناسىن تولەپ، تەحنيكالىق قاۋىپسىزدىككە قول قويعاننان كەيىن - پارك اۋماعىنا ساياحاتتاۋعا رۇقسات بەرىلەدى.

 

پارك اۋماعىنا كىرگەن بويدا، بيىك- بيىك شوقىلار بىرىنەن سوڭ ءبىرى اسەم كورىنىسىمەن تامساندىرىپ جاتتى.

 

جوسپارلعان سارقىرامامىزعا دا جەتىپ الدىق. الدىمىزدان ايۋلى سارقىراماسى اسەم كورىنىسىمەن جان- جادىراتتى.

 

 ايۋلى سارقىراماسىنا اپاراتىن جول وڭاي ءارى قىسقا. سارقىراما تەرەڭ جارتاستىڭ قۋىسىندا ورنالاسقان. سارقىرامانىڭ بيىكتىگى 30 مەتر. بۇل جەردى ايۋلار مەكەندەۋىنە بايلانىستى «ايۋلى» دەپ اتالعان.

 

سارقىرامانىڭ قاسىنداعى جارتاستارعا ورمەلەۋ وڭاي ەمەس. ءبىز سوعان قاراماستان جوعارىدان كورىنىس الۋ ءۇشىن بيىككە كوتەرىلدىك. شوگىندى تاۋ جىنىستارى كوپ بولعاندىقتان، كوپشىلىك شىعۋىنا كەڭەس بەرمەيمىز.

 

 تۇرگەندە بارلىعى جەتى سارقىراما بار ەكەن. بيىكتىگى مەن ادەمىلىگىنە قاراي مۇنداعى ەكى سارقىراما ەرەكشە اتالادى. سونىڭ ءبىرى ءبىز رەپورتاج جاساپ وتىرعان «ايۋلى» سارقىراماسى بولاتىن.

  

سارقىرامانىڭ جوعارعى جاعى ورتاشا بيىك تاۋلارمەن جالعاسقان. تىك جارتاستار مەن قۇزدار بار. جايلاۋ بولارلىق ءۇستىرت تە جاتىر. تەك بارلىعىن ارالاپ كورۋ ءۇشىن كوپ ۋاقىت كەتەدى.

  

سارقىراما تاۋدىڭ كۇنگەي بەتىندە ورنالاسقاندىقتان بولار، اينالاسى عانا قاتادى دا، ءوزى توقتاۋسىز سارقىراپ جاتادى. گەوگرافتاردىڭ بولجامى بويىنشا، سارقىرامانىڭ جاسى ەكى ميلليون جىلعا جەتەتىن كورىنەدى.

 

ال تومەندە سارقىرما سۋى تۇرگەن وزەنىنە بارىپ قوسىلادى. باستاۋىن ىلە الاتاۋىنىڭ مۇزدىقتارىنان الاتىن تۇرگەن وزەنى، ىلە وزەنىنىڭ قاپشاعاي بوگەنىنە قۇيادى.

 

ەندەشە، وسىنداي سۇلۋلىقتى بارىندا باعالاي وتىرىپ، ونى كەلەشەك ۇرپاققا ساقتاي بىلەيىك! تۋعان جەردىڭ تابيعاتىن تانىتۋ، ناسيحاتتاۋ، قۇرمەتتەۋ جانە ايالاۋ ءاربىر پەرزەنتتىڭ پارىزى بولۋى ءتيىس!

 

دايىنداعان: دوسجان بالابەك ۇلى، الماتى وبلىسى

«ايقىن» گازەتى