جالعان اقشا: قازاقستاندا تەڭگەنىڭ قاي كۋپيۋراسىن قولدان ءجيى جاسايدى
مەملەكەتتىك كىرىستەر كوميتەتىنىڭ پروفيلاكتيكالىق جۇمىس جانە باقىلاۋ باسقارماسى باسشىسى ورىنباسارىنىڭ مىندەتىن اتقارۋشى ەردەن جۇمانىڭ ايتۋىنشا، بۇگىندە قىلمىسكەرلەر كوپ جاعدايدا ەسكى نومينالداعى 2000 تەڭگەنى جاسايدى. «سەبەبى ول كۋپيۋرانىڭ قورعانىس ەلەمەنتتەرى ەسكىرگەن. ال 5000, 10000, 20000 تەڭگەلىكتەردى قولدان جاساۋ قيىن. سوسىن كۋپيۋرانىڭ سوماسى ۇلكەن بولسا، ونى ءجىتى تەكسەرەدى. ءبارىمىز سولاي ىستەيمىز. ماسەلەن، دۇكەندە 10000 تەڭگەنى بەرسەك، ساتۋشىلار بىردەن تەكسەرە باستايدى. ال 2000 تەڭگەنى ولاي تەكسەرمەيدى. قىلمىسكەرلەر وسىنى جاقسى بىلەدى. سودان كەيىن ۇساق اقشانى جاساۋعا تىرىسادى» ، - دەدى ە. جۇما بۇگىن استانادا وتكەن باسپا ءسوز ءماسليحاتىندا.
ونىڭ سوزىنە قاراعاندا، قىلمىسكەرلەر، كوبىنىسە، ۇلتتىق ۆاليۋتانى جاسايدى. سەبەبى ونى تاكسيدە، دۇكەندە، بازاردا جانە تاعى باسقا جەردەردە بەرە سالعان جەڭىل. ال شەتەلدىك ۆاليۋتانى ايىرباستاۋ قاجەت. ونداي اقشانى ايىرباستاۋ بەكەتتەرىندە ارنايى قۇرىلعىلارمەن تەكسەرەدى.
ايتا كەتەيىك، وتكەن جىلى قازاقستاندا جالعان اقشا جاساۋ بويىنشا 214 قىلمىس تىركەلدى. سونىڭ ىشىندە 511 2دانا ۇلتتىق ۆاليۋتا، ونىڭ جالپى سوماسى 7,4 ميلليون تەڭگەنى قۇرادى. ال شەتەلدىك ۆاليۋتانىڭ 497 جالعان كۋپيۋراسى انىقتالدى. ول اقشانىڭ سوماسى 26 ميلليون تەڭگەدەن استى.