سەناتور مال ۇرلىعىن اۋىر قىلمىس ساناتىنا جاتقىزۋدى ۇسىندى

None
None
استانا. قازاقپارات - مال ۇرلىعىن اۋىر قىلمىستار ساناتىنا جاتقىزعان دۇرىس. بۇل جايىندا ق ر پارلامەنتى سەناتىنىڭ دەپۋتاتى سارسەنباي ەڭسەگەنوۆتىڭ پرەمەر-مينيستر باقىتجان ساعىنتايەۆتىڭ اتىنا جولداعان دەپۋتاتتىق ساۋالىندا ايتىلعان، دەپ حابارلايدى قازاقپارات.

«سوڭعى ءۇش، 2015-2017 -جىلدارى 65 مىڭنان استام مال ۇرلانعان. وسى مەرزىمدە مال ۇرلاعانى ءۇشىن ۇستالعان 50 مىڭنان استام ادامنىڭ جارتىسىنا جۋىعى - بۇرىن ۇرلىق جاساعاندار. وسىعان قارماستان قىلمىستىق ءىستى قاراۋ كەزىندە اقتالمايتىن نەگىزدەر جانە تاراپتاردىڭ تاتۋلاسۋى بويىنشا 21158 قىلمىستىق ءىس نەمەسە 40 پايىزدان استامى توقتاتىلعان. ادامدار قىلمىستىڭ بۇل تۇرىنە قاتىستى قۇقىق قوعاۋ ورگاندارىنىڭ ءىس-ارەكەتتەرى مەن سوت اكتىلەرىنىڭ تيىمدىلىگى، پارمەندىلىگى تومەن دەيدى. ولاردىڭ پىكىرىنشە، جاعدايدىڭ مۇنداي بولۋىنا قولدانىستاعى قىلمىستىق زاڭنامانىڭ السىزدىگى سەبەپ. سوندىقتان ق ر قىلمىستىق كودەكسىنىڭ ۇرلىققا قاتىستى 188-بابىنىڭ مال ۇرلىعىنا بايلانىستى بولىگىن سارالاپ، جازانى كۇشەيتۋ باعىتىندا ووزگەرىستەر مەن تولىقتىرۋلار ەنگىزۋ كەرەك دەپ ەسەپتەيدى»، - دەيدى ول.

دەپۋتاتتىڭ اتاپ وتۋىنشە، قوعامدا مال ۇرلىعىن جاساعانداردىڭ تەرگەۋ كەزىندە بوستاندىقتا ءجۇرۋى، ولاردا باس بوستاندىعىنان ايىرۋدان بولەك جەڭىل جازانىڭ تاعايىندالۋى مال ۇرلىعىنا توسقاۋىل بولا المايدى دەگەن وي قالىپتاسقان.

قىلمىسكەردىڭ جابىرلەنۋشىگە كەلتىرگەن زالالدى وتەۋ ارقىلى جابىرلەنۋشىمەن تاتۋلاسۋىنا بايلانىستى قىلمىستىق ءىستى توقتاتۋ نورماسىنىڭ كولەڭكەلى تۇستارى بار. تۇگەلدەي بولماعانىمەن كوپ جاعدايدا تاتۋلاسۋ تىكەلەي نەمەسە قورقىتىپ ۇركىتۋ، جابىرلەنۋشى ءۇشىن ماڭىزدى فاكتورلارعا قىسىم جاساۋ ارقىلى جۇرەدى. زالال كوپ جاعدايدا ۇرلانعان مالدى ساتۋدان تۇسكەن قارجى ەسەبىنەن وتەلەدى. سوندىقتان بۇل ۇرى ءۇشىن ەكونوميكالىق اۋىرتپالىق ەمەس. شالعاي اۋىلداردا تۇراتىن جابىرلەنۋشى ءۇشىن اۋدان ورتالىعىنا تەرگەۋ جانە سوت پروتسەستەرى ءۇشىن بىرنەشە رەت كەلىپ كەتۋ اۋىرتپالىق تۋدىرادى. سوندىقتان ولار بۇل قيىندىقتاردان قاشىپ، جوعالعان 1-2 مال باسى ءۇشىن شاعىمدانبايدى.

«اۋىل، اسىرەسە شالعايدا ورنالاسقان ەلدى مەكەندەر تۇرعىندارى ءۇشىن مال داۋلەت پەن بايلىقتىڭ بەلگىسى ەمەس. بۇل ادامدار ءۇشىن مال ءومىر ءسۇرۋدىڭ، كۇنكورىسىنىڭ، تىرشىلىك جاساۋىنىڭ جالعىز كوزى. بۇل بۇگىنگى كۇننىڭ اقيقاتى. سوندىقتان تۇيە، سيىر، جىلقى سياقتى ءىرى قارا مالىن ايتپاعاننىڭ وزىندە ءبىر-ەكى باس قويىنىڭ قولدى بولۋى ادامدار ءۇشىن ۇلكەن ماتەريالدىق شىعىن، وراسان زور پسيحولوگيالىق سالماق. مال ۇرلىعى كاسىبىن مال شارۋاشىلىعىمەن بايلانىستىرعان كاسىپكەرلەر ءۇشىن دە ۇلكەن ماسەلە. بۇل مال شارۋاشىلىعىن دامىتۋ جونىندەگى مەملەكەتتىك ساياساتتىڭ تولىق جۇرۋىنە زيان كەلتىرەتىن قاساقانا ارەكەت. وسى تۇرعىدان العاندا مال ۇرلىعى قوعامدىق قاۋىپتىلىگى جوعارى قىلمىس. سوندىقتان مال ۇرلىعىنىڭ الدىن الۋ، وسى سالاداعى قىلمىستىڭ قايتالانۋىن بولدىرتپاۋ، جازانىڭ الەۋمەتتىك ادىلەتتىلىگىن قامتاماسىز ەتۋ ماقساتىندا مال ۇرلىعىن اۋىر قىلمىستار ساناتىنا جاتقىزعان دۇرىس»، - دەدى ەڭسەگەنوۆ.

ونىڭ ايتۋىنشا، بۇل باعىتتا كورشى مەملەكەتتەردىڭ زاڭنامالارىن زەردەلەۋ قاجەت. ماسەلەن، قىرعىز ەلىندە مال ۇرلىعى جەكە باپ رەتىندە قاراستىرىلعان. وسىعان بايلانىستى دەپۋتات ۇكىمەت باسشىسىنان ءتيىستى مەملەكەتتىك ورگاندارعا مال ۇرلىعىنا بايلانىستى زاڭنامانى جەتىلدىرۋ تۋرالى تاپسىرما بەرۋدى ۇسىندى.

سوڭعى جاڭالىقتار