بالانى ءۇي تىرلىگىن ىستەۋگە قالاي ۇيرەتۋگە بولادى؟

استانا. قازاقپارات - ۇيدەگى بالالار كەيدە ءۇي تىرلىگىن ىستەگىسى كەلمەي، اتا-اناسىنا، اعا- اپكەلەرىنە ءسوز قايتارىپ جاتادى.

بالانى ەرىنشەك دەپ ايتا المايسىڭ، ويتكەنى، وزات وقيتىن بالالار دا ۇيدە ەشتەڭە ىستەمەي ويىن ويناپ، تەلەديدار كورىپ، جاتقىسى كەلەدى.

ءبىز كوبىنە بالانى بۇيرىق بەرۋ ارقىلى جۇمسايمىز. «قاتتى سويلەمەسەڭ، بالا تىڭدامايدى» دەپ ويلايتىن اتا-انانىڭ قاراسى كوپ. «ىدىستى جۋ!»، «ءۇيدى جينا!»، «قوقىستى توك!»، ت. ب. دەپ كەتە بەرەتىن شەكسىز بۇيرىق بالانى دا، ءسىزدى دە قاتتى شارشاتادى. كۇندەردىڭ- كۇنىندە بالا بارىنە قول سىلتەپ: «مەن ەشكىمگە ەشتەڭە مىندەتتى ەمەسپىن، ءوز كيىمىمدى جينايمىن، بولدى، اركىم ءوزىنىڭ كيىمىن جيناپ السىن» دەۋى مۇمكىن.

ەكىنشىدەن، بالا ءۇي جۇمىسىن سەلقوس، ءجۇردىم- باردىم جاساپ، ماسەلەنى ۋشىقتىرىپ جىبەرۋى دە عاجاپ ەمەس. جاعدايدى وعان جەتكىزبەۋ ءۇشىن بالانى ءسابي كەزىنەن تاربيەلەۋ كەرەك. ول ءۇشىن الدىمەن اتا-انا وزدەرىن بالانىڭ الدىندا ءتارتىپتى، تاربيەلى ۇستاۋى قاجەت. «بالاپان ۇيادا نە كورسە، ۇشقاندا سونى ىلەدى». اتا-انا ۇيگە كەلگەندە بالاسىنىڭ كوزىنشە جالقاۋلانىپ جاتا كەتسە، ءبىر-بىرىمەن ايعايلاسىپ سويلەسسە، ۇرسىسسا، ونداي وتباسىدان ءتارتىپتى بالانىڭ شىعا قويۋى ەكىتالاي. سوندىقتان بالام جاقسى بولسىن دەسەڭىز، الدىمەن ءوزىڭىزدى، سوسىن ءسوزىڭىزدى تۇزەڭىز.

بالا - ءسىزدىڭ ايناڭىز. بالادان نە كورسەڭىز، ول - ءسىزدىڭ تاربيەڭىزدىڭ جەمىسى. ەگەر بالا ءوزىن سۇيىكتى سەزىنسە، ءۇي تىرلىگىن بۇلدانباي- اق ماحابباتپەن ىستەي باستايدى. ءۇي تىرلىگىن ىستەۋ ارقىلى ءوزىن وتباسىنا قامقورشى رەتىندە سەزىنەتىن بولادى. ەشقاشان بالانىڭ كوزىنشە «وسى ءۇيدىڭ جۇمىسى بىتپەيدى» دەپ ايتۋعا بولمايدى. اتا-انا نە ىستەسە، بالا دا سونى ىستەيدى. ءبىر جاستاعى ەسىن بىلمەيتىن بالانىڭ ۇلكەندەر نە ىستەسە، سونى قايتالايتىنىن بايقاعان بولارسىز؟

بالانى دۇرىس جۇمساۋ ءۇشىن ءسابيىڭىز ەس بىلە باستاعان شاقتا مىناداي ويىن ۇيىمداستىرىڭىز. ءبىر قاعازعا ۇلكەن اعاشتىڭ سۋرەتىن سالىپ، ءتۇرلى-ءتۇستى قاعاز قيىندىلارىنا بالاڭىز بۇگىن قانداي ءۇي تىرلىگىن ىستەدى، سونى جازاسىز.

مىسالى، بالا بۇگىن «ىدىس جۋۋعا كومەكتەستى»، «ءۇي جيناستى»، «ەسىك الدىن سىپىرعاندا قالاقتى ۇستاپ تۇردى»، ت. ب. دەپ جازىپ، ءبىر-بىرلەپ بالاڭىزبەن بىرگە اعاشقا جابىستىرىڭىز. قاعاز نەعۇرلىم كوپ بولسا، سوعۇرلىم بالاڭىزدى ماقتاڭىز. بىرتە-بىرتە بالا ءوزى ادەتتەنىپ، اكە-شەشەسى جۇمىستان كەلگەندە، اعاشتى كورسەتەتىن بولادى.