قازاقستاندا جالعىز زاڭدى تولەم قۇرالى بار - ۇلتتىق بانك
وسىعان وراي كريپتوۆاليۋتالار ەل اۋماعىندا تولەم قۇرالى رەتىندە پايدالانىلمايدى.
بۇل تۋرالى قازاقپارات بانكتىڭ باسپا ءسوز قىزمەتىنە سىلتەمە جاساپ حابارلايدى.
«قارجى ۇيىمدارىنا سونداي-اق زاڭنامادا تىكەلەي كوزدەلمەگەن وپەراتسيالاردى جۇرگىزۋگە تىيىم سالىنادى. وسىلايشا، تىكەلەي رەتتەۋگە قاراماستان، بۇگىنگى كۇنى قارجى سەكتورىندا مەنشىكتى نەمەسە كليەنتتىك وپەراتسيالار بويىنشا، سونداي-اق ەسەپ ايىرىسۋ بىرلىگى رەتىندە كريپتوۆاليۋتالاردى پايدالانۋ زاڭناماعا قايشى كەلەدى»، - دەپ تۇسىنىكتەمە بەردى ۇلتتىق بانكتىڭ تولەم جۇيەلەرى دەپارتامەنتى باسقارماسىنىڭ باستىعى الينا يمانعازينا.
ا. يمانعازينا حالىقتىڭ كريپتوۆاليۋتالارعا دەگەن سۇرانىسى تەز ءارى جوعارى كىرىس الۋ ماقساتىندا ينۆەستيتسيالارعا ارنالعان نىسانا رەتىندە بايقالاتىنىن اتاپ ءوتتى. ول بۇل رەتتە كريپتوۆاليۋتالاردىڭ ەشقانداي قۇندىلىعى، قۇنى جوق ەكەندىگىن ءتۇسىنۋ قاجەت جەتكىزدى. باعا الىپساتارلىق كۇتۋلەرمەن ءورشي تۇسەتىن سۇرانىسپەن عانا قامتاماسىز ەتىلەدى. تەك سوڭعى ەكى ايدا ەڭ بەلگىلى كريپتوۆاليۋتا - بيتكويننىڭ باعاسى 2,5 ەسە قۇلدىرادى. بۇل نارىقتاعى كەيىنگى ءىس- قيمىلدى بولجاۋ مۇمكىن ەمەس. بۇل حالىق سالعان قاراجاتتى جوعالتۋدىڭ جوعارى تاۋەكەلدەرىنە اپارادى.
«بۇدان باسقا، كريپتوۆاليۋتالاردىڭ تانىمالدىعى اياسىندا قارجىلىق پيراميدالار بەلگىلەرى بار ءتۇرلى الاياقتىق سحەمالارى تۋىندايدى. سونىمەن بىرگە كريپتوۆاليۋتالار ارقىلى جاڭا جوبالارعا قاراجات تارتۋ (ICO) بەلسەندى تۇردە جارنامالانۋدا. ICO ينۆەستيتسيالاۋ قاعيداتتارى IPO- عا ۇقساس ەكەندىگىنە قاراماستان، بۇل جاعدايدا ەشكىم ەميتەنتتەردى تەكسەرمەيدى جانە ينۆەستورلاردىڭ قۇقىقتارىن قورعاۋعا كەپىلدىك بەرمەيدى. كريپتوۆاليۋتالارمەن بارلىق وپەراتسيالاردى حالىق پەن زاڭدى تۇلعالار تاۋەكەلگە بەل بۋىپ جاسايدى»، - دەدى بانك وكىلى.
كريپتوۆاليۋتالارمەن جاسالاتىن وپەراتسيالارمەن قاتار جۇرەتىن تەرىس سالداردى ازايتۋ ءۇشىن ۇلتتىق بانكتىڭ ساراپشىلارى كريپتوۆاليۋتالىق قارجىلىق پيراميدالاردىڭ پايدا بولۋىن بولدىرماۋ، حالىقتىڭ سيفرلىق جانە قارجىلىق ساۋاتتىلىعىن ارتتىرۋ، وسى سالاداعى زاڭنامانى قاتاڭداتۋ جونىندەگى جۇمىستاردى كۇشەيتۋ قاجەت دەپ سانايدى.