ون جىل بويى جۇمىسسىز جۇرگەن قوستانايلىق اكىمنەن كومەك سۇرادى
مارات بۋچيەۆتى جەتى جاسىندا اتا-اناسى قارابالىق اۋدانىنان اكەلىپ، قوستانايداعى اقىل-ەسى جەتىلمەگەن جەتىم بالالارعا ارنالعان №2 -مەكتەپ-ينتەرناتىنا تاپسىرىپ كەتكەن. مەكتەپ- ينتەرناتتى بىتىرگەن سوڭ، اتالعان وقۋ ورنىنىڭ ىقپالىمەن، قوستانايداعى تۇرمىستىق قىزمەت كورسەتۋ كوللەدجىنە ءتۇسىپ، اياق كيىم تىگۋ ماماندىعىن الىپ شىققان. ماراتتىڭ ايتۋىنشا، ول وسى ماماندىقپەن جۇمىس ىستەمەگەن، اياق كيىم جوندەۋ قولىنان كەلە دە قويمايدى، ەبى جوق.
«شاراسىزدىقتان ءتۇرلى قۇرىلىس ورىندارىندا جەگىلىپ، بازارلاردا جۇك ءتۇسىرىپ، قارا جۇمىستار جاساپ، تيىن-تەبەن تاۋىپ كەلدىم. تۇرعىلىقتى جەرىم بولماعاندىقتان، ءار كۇنى ءار جەردە تۇنەپ ءجۇردىم. ءبىر كۇنى قولىمداعى ديپلومىمدى دا جوعالتىپ الدىم. مۇمكىندىك بولسا، سول ديپلومدى قايتادان قالپىنا كەلتىرگىم كەلەدى. نە كەرەك، جاعدايىمدى بايانداپ قالا اكىمىنەن كومەك سۇراعىم كەلدى»، - دەدى مارات بۋچيەۆ قازاقپارات تىلشىسىنە.
وسىلايشا، 26 جاستاعى جىگىت قوستاناي قالاسىنىڭ اكىمى بازىل جاقىپوۆتىڭ ەسەپ بەرۋ كەزدەسۋىنە كەلىپ، جاعدايىن ايتتى.
«جيىننان سوڭ ماعان قوستاناي جىلۋ ەنەرگەتيكالىق كومپانياسىنىڭ ديرەكتورى اسقار بەكپاعانبەتوۆ جاقىنداپ، كومەك بەرەتىنىن جەتكىزدى. قالاداعى كوپقاباتتى ۇيلەردىڭ پودەزدەرىندە تۇنەپ جۇرگەنىمدى ەستىپ، جاتىن ورىن تاۋىپ بەردى. بۇعان قوسا ول كومپانيانىڭ جىلۋ قازاندىعى ماشينيسى قىزمەتىن ۇسىندى. ءوزىمدى جاقسى مامان رەتىندە كورسەتسەم دەيمىن. قازىر مەنىڭ ءومىرىم كۇرت وزگەردى. ءبىر كەزدەرى ءوز-وزىمە قول جۇمساۋعا دا بەل بۋعانمىن. باستىسى ومىردەن تۇڭىلمەۋ قاجەت»، - دەپ ءبولىستى مارات.