تاريحتان وشىرىلگەن بەينە

None
None
 استانا. قازاقپارات - ءا. قاستەيەۆ مۋزەي- ۇيىندەگى اينەكتەلگەن ۆيترينادا ءابىلحان اعانىڭ 1935 -جىلى ماۋسىمنىڭ 24 ىندە ءبىر توپ كومسومول جەتەكشىلەرىمەن، جوعارى، ارناۋلى ورتا وقۋ ورىندارى ستۋدەنتتەرىمەن تۇسكەن فوتوسۋرەتى بار.

 بارلىعى توعىز ادام. ءبىراق، بىرەۋىنىڭ اتى- ءجونى جازىلماعان، سۋرەتتەگى بەت- ءجۇزى تىرنالىپ وشىرىلگەن. بىلايعى جۇرت مۇنىڭ سەبەبىن بىلمەۋى دە مۇمكىن. ويتكەنى، مۋزەيگە كەلۋشىلەردىڭ كەيبىرى سۋرەتتىڭ بەتى نەگە تىرنالعانىن سۇراپ جاتادى. ال، ماعان مۇنداي سۋرەتتىڭ سىرى بەلگىلى سياقتى. 1980 -جىلداردىڭ ورتاسىندا «بالدىرعان» جۋرنالىندا قىزمەتتە جۇرگەن كەزىمدە بەلگىلى تۇركىتانۋشى عالىم، فيلولوگيا عىلىمدارىنىڭ دوكتورى، پروفەسسور التاي امانجولوۆ اعامىز اكەسى، ايگىلى عالىم سارسەن امانجولوۆتىڭ پورترەتىن سالىپ بەرۋىمدى سۇراعان ەدى. پورترەت جاساۋعا لايىقتى فوتوسۋرەتتى تاڭداۋ ءۇشىن مارقۇم التاي اعانىڭ وتىنىشىمەن ۇيىندە بولىپ، وتباسىلىق فوتو- البومدارىن پاراقتاعانبىز. سوندا، ەرتەدە تۇسكەن فوتولاردا بىرنەشە ادامنىڭ بەت- ءجۇزى وسىلايشا وشىرىلگەن ەكەن.

مۇندايدى بۇرىن كورمەگەندىكتەن مەن، التاي اعادان نەلىكتەن تىرنالعانىن سۇرادىم. سوندا ايتقانى: 1937-38 -جىلدارى «حالىق جاۋى» دەپ ۇستالىپ، سوتتالىپ كەتكەن جانداردىڭ فوتوسۋرەتتەرىن ساقتاعان ادامدار دا «حالىق جاۋىنا» تىلەكتەس دەپ ايىپتالعان كورىنەدى. سوندىقتان ولاردىڭ سۋرەتتەگى بەت- جۇزدەرىن دە، اتى- جوندەرىن دە ءوشىرىپ تاستاپ وتىرعان. نەتكەن قاتىگەز، ۇرەيلى، وپاسىز ساياسات جۇرگىزىلگەن دەسەڭىزشى... مىنە، ءابىلحان اعامەن بىرگە سۋرەتكە تۇسكەن ءبىر توپ جاستاردىڭ ءبىرى، ءسىرا، سول 1937-38 -جىلداردىڭ زوبالاڭىندا رەپرەسسياعا ۇشىراسا كەرەك. سودان دا بەت- بەينەسى، اتى- ءجونى دە وشىرىلگەن بولۋى كەرەك دەپ توپشىلايمىز.

 ەركىن نۇرازحان، ءا. قاستەيەۆ مۋزەي- ءۇيىنىڭ جەتەكشىسى www.zhasorken.kz

سوڭعى جاڭالىقتار