قازاقستاندىق سپورتشىلار پحەنچحانعا قازى- قارتا الا كەلدى - ەلسيار قاناعاتوۆ

None
None
پحەنچحان. قازاقپارات - ەرتەڭ، 9 - اقپاندا وڭتۇستىك كورەيانىڭ پحەنچحان قالاسىندا 18 - قىسقى وليمپيادا ويىندارى باستالادى. اق وليمپيادا قارساڭىندا «قازاقپارات» ح ا ا ءتىلشىسى قازاقستان رەسپۋبليكاسى ۇلتتىق وليمپيادا كوميتەتى سپورت ديرەكسياسىنىڭ باسشىسى ەلسيار قاناعاتوۆتان ارنايى سۇحبات العان ەدى.

- ەلسيار بايمۇحامەد ۇلى، ەرتەڭ رەسمي اشىلاتىن ايتۋلى دوداعا سپورتشىلارىمىز قانشالىقتى دايىن؟

 - بارلىعى جوسپار بويىنشا ءجۇرىپ جاتىر. سپورتشىلارىمىز پحەنچحانداعى وليمپيادانىڭ ەكى قالاشىعىنا ءبولىنىپ ورنالاستى. ۇستىڭگى قالاشىقتا شاڭعى جانە شانا سپورتى تۇرلەرىنىڭ سپورتشىلارى، بياتلون، فريستايل مەن موگۋلشىلار جايعاسسا، تومەنگى قالاشىققا شورت- ترەكشىلەر، كونكيشىلەر، مانەرلەپ سىرعاناۋشىلار ورنالاستى. بۇگىنگى تاڭدا ءار سپورتشى وزدەرى سىنعا تۇسەتىن الاڭداردا ەركىن جاتتىعىپ، كورەيالىق الاڭدارمەن تانىسىپ ۇلگەردى. نەگىزىنەن قۇراما جارىسقا ساقاداي دايىن دەپ ايتا الامىز.

- سپورتشىلارىمىز تولىعىمەن كەلىپ بولدى ما؟

 - ءبىر- ەكى سپورت تۇرىنەن سىنعا تۇسەتىن سپورتشىلارىمىز عانا قالدى. فريستايل- اكروباتيكادان جانە مانەرلەپ سىرعاناۋدان ەكى قىزىمىز كەلگەن جوق. ولار جارىس كەستەسىنە سايكەس، سايىستار جاقىنداعاندا كەلەدى. ال دەنيس تەن سەۋلدە، ول سول جاقتا ءجۇرىپ سوڭعى جاتتىعۋىن جاساپ جاتىر.

 - سپورتشىلاردىڭ پحەنچحان اۋا رايىنا، جەر جاعدايىنا، جەرگىلىكتى تاماقتارعا ۇيرەنىسۋى قالاي؟

- جالپى العاندا بىزگە بۇل جەردىڭ اۋا رايى تاڭسىق ەمەس. سارى ارقانىڭ ايازىنان كەلگەن سپورتشىلارىمىز مۇنداعى سالقىن اۋا رايىنا ەلەڭدەپ جۇرگەن جوق. ەڭ باستىسى، جارىس كەزىندە بوران بولماسا بولعانى. ءدال بۇگىنگىدەي اڭىراپ جەل سوعىپ تۇرسا، شاڭعىشى، بياتلونشىلارعا قيىنداۋ سوعۋى مۇمكىن. ءبىراق، جارىسقا ءبىزدىڭ سپورتشىلار عانا شىقپايدى عوي. بوران سوقسا بارىنە بىردەي سوعادى. سوندىقتان كوپپەن بىرگە كورەمىز. تاماقتارىنا كەلەتىن بولساق، سپورتشىلار اراسىندا وزدەرىمەن بىرگە قازى- قارتا الىپ كەلگەندەرى بار. اراسىندا سونى جەيدى. ايتسە دە وليمپيادا قالاشىعىنىڭ تاعامدارى دا جامان ەمەس ەكەن. ۇناپ جاتىر. حالال تاماق تا جەتكىلىكتى ەكەن.

- سپورتشىلاردىڭ جاتتىعۋ جۇمىستارى كوڭىلدەرىڭىزدەن شىعادى ما؟

 - ارينە، ءبىز ولارعا بارلىق جاعدايدى جاسادىق. بەلگىلەنگەن كەستەگە سايكەس جاتتىعادى، تاماقتانادى، دەمالادى. ءبارىن باقىلاۋدا ۇستاپ وتىرمىز. ورنالاسقان جەرلەرى دە تازا، رەتتى، جىلى. ءبىزدىڭ شتابتىڭ مىندەتى - سپورتشىلارعا جاعداي جاساۋ، ۋاقىتىندا اقپارات بەرۋ، قوناقۇي مەن ستاديوندار اراسىندا تاسۋ، جينالىس وتكىزىپ، تاپسىرما بەرۋ.

- بۇل دودادا كىمدەرگە ءۇمىت ارتا الامىز؟

- شاڭعى سپورتىنان، فريستايل، موگۋلدان سپورتشىلارىمىز وسىعان دەيىنگى الەم كۋبوكتارىندا وتە جاقسى ناتيجەلەرگە قول جەتكىزدى. وليمپيادادا دا وسى سپورت تۇرلەرىنەن جۇلدە كۇتەمىز. باسقا دا سپورت تۇرلەرىنەن جەڭىمپازدار بولمايدى دەپ كەسىپ ايتپاۋ كەرەك. بالكىم ءبىز بولجاماعان جۇلدەلەرگە دە ءىلىنىپ قالارمىز. شورت- ترەكشىلەرىمىز دە وتە جاقسى ونەر كورسەتىپ ءجۇر. قازىر اناۋ- مىناۋ دەپ اتتارىن اتاپ، تۇستەرىن تۇستەمەي- اق قويايىق. جالپى كوپ ماسەلە سپورتشىلاردىڭ باعىنا بايلانىستى. جوعارىدا اتاپ وتكەنىمدەي، ءبىز سپورتشىلارعا بارلىق جاعدايدى جاسادىق. ەندى، ولاردىڭ ءىسى - جۇلدە الۋ، جۇلدەگەر اتانۋ.

- سپورتشىلاردى قوسا ەسەپتەگەندە، وليمپيادادا قازاقستاندىق دەلەگاتسيادا قانشا ادام بار؟

 - جالپى سانى 150-گە جۋىق. ولاردىڭ قاتارىندا اككرەديتاتسياسى جوق ارنايى الىپ كەلگەن ادامدارىمىز بار. ءبىز ولاردى قالاعا ارنايى كەلىسىممەن كىرگىزىپ وتىرمىز.

- ول قانداي ماماندار، نە ىستەيدى؟

- جارىس بولعان جەردە نەشە ءتۇرلى جاعداي دا بولۋى مۇمكىن عوي. سول ءۇشىن ارنايى دارىگەرلەر، ماسساج جاساۋشىلار، پسيحولوگتاردى الىپ كەلدىك. وعان قوسا شاڭعىشىلارىمىزدىڭ اياعىنا شاڭعىنى بايلاپ بەرەتىن، مايلايتىن كومەكشىلەر بار.

- جارىس كەزىندە سپورتشىلارىمىزعا قولداۋ كورسەتەتىن ارنايى جانكۇيەرلەر بولادى ما؟

- ءبىز، ياعني قازاقستان ۇلتتىق وليمپيادا كوميتەتى تۋريستىك كومپانيامەن كەلىسىمشارت جاساسقان بولاتىنبىز. ولار وسى وليمپياداعا جانكۇيەرلەردى مىندەتتى تۇردە اكەلەدى. جارىستا جانكۇيەرلەرىمىز مىندەتتى تۇردە بولادى.

- اڭگىمەڭىزگە راحمەت!

اۆتور: كۇنسۇلتان وتارباي

سوڭعى جاڭالىقتار